Kun Paano Kita Pinatatalingkas kan Katotoohan
1 Sa sarong okasyon, si Jesus nagsabi sa mga Judio na nagtubod sa saiya: “Mamimidbid nindo an katotoohan, asin an katotoohan mapatalingkas sa saindo.” (Juan 8:32) Sia nagtataram manongod sa sarong katalingkasan na nakalalabi sa mga katalingkasan sibil, katalingkasan na makukua kan gabos—mayaman o dukha, edukado o bakong edukado. Itinokdo ni Jesus an katotoohan na matao nin katalingkasan sa pagkaoripon sa kasalan asin kagadanan. Arog kan ipinaliwanag ni Jesus, “an lambang naggigibo nin kasalan oripon nin kasalan.” (Juan 8:34) Kanigoan an paghimuyawot niato sa panahon na an gabos na makinuyog na tawo “patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios”!—Roma 8:21.
2 An katotoohan mapadapit ki Jesus asin sa saiyang kabtang sa pagkaotob kan katuyohan nin Dios nagtatao nin siring na katalingkasan. Kaiba dian an kaaraman manongod sa atang na pantubos na itinao nia para sa sato. (Roma 3:24) Dawa ngonyan, an pag-ako asin makinuyog na pagpasakop sa katotoohan sa Biblia nagpapangyari sa sato na magkamit nin igong sokol nin katalingkasan sa pagkatakot, pagkadesesperar, asin gabos na klase nin nakadadanyar na gibo.
3 Katalingkasan sa Pagkatakot Asin Pagkadesesperar: Dai kita kaipuhan na madesesperar sa mga kamugtakan sa kinaban huli ta nasasabotan niato kun taano ta may karatan asin aram niato na iyan madali nang paraon sa daga. (Sal. 37:10, 11; 2 Tim. 3:1; Kap. 12:12) Apuera kaini, pinatatalingkas kita kan katotoohan sa falsong mga katokdoan manongod sa kamugtakan kan mga gadan. Aram niato na dai kita maaano kan mga gadan, na sinda dai nagdudusa nin daing sagkod na pasakit, asin na dai kinukua nin Dios an mga tawo sa kagadanan tangani sanang makaibanan nia sinda sa rona nin mga espiritu.—Ecl. 9:5; Gibo 24:15.
4 An siring na katotoohan nakasustenir sa sarong ama asin sarong ina kan magadan an saindang aki sa sarong aksidente. “May kakulangan sa samong buhay na dai mapaninigoan sagkod na maheling mi na giraray an samong aki paagi sa pagkabuhay liwat,” an sabi kan ina. “Alagad aram mi na temporaryo sana an samong kakologan.”
5 Katalingkasan sa Nakadadanyar na mga Gibo: Puedeng liwaton kan katotoohan sa Biblia an kaisipan asin personalidad nin saro, na nagbubunga nin katalingkasan sa malilikayan na mga problema. (Efe. 4:20-24) An pagkaonesto asin kahigosan puedeng makatabang na pagianon an kadukhaan. (Tal. 13:4) An pagpaheling nin mapagsakripisyong pagkamoot nakapararahay sa relasyon sa iba. (Col. 3:13, 14) An paggalang sa Kristianong pagkapayo nakaiina sa mga problema sa pamilya. (Efe. 5:33–6:1) An paglikay sa pagbuburat, seksuwal na inmoralidad, tabako, asin nakaaadiktong droga nakapararahay sa salud.—Tal. 7:21-23; 23:29, 30; 2 Cor. 7:1.
6 Dai napopondo nin sarong hoben na lalaki an siyam na taon nang adiksion sa droga. Sarong aldaw nanuparan nia an sarong parahayag na naghuhulit sa tinampo. Sia nag-ako nin babasahon, asin ginibo an areglo na songkoon sia sa saiyang harong. Naponan an sarong pag-adal sa Biblia. Pakalihis nin duwang bulan biyo nang nagpondo an lalaking iyan sa paggamit nin droga, asin pakalihis nin walong bulan na pag-adal, sia nabautismohan. An pakaheling sa pakapondo nia sa saiyang adiksion nakapahiro sa saiyang tugang na lalaki asin kunyada na magpoon na mag-adal sa Biblia.
7 Tabangan an Iba na Magkamit nin Katalingkasan: An mga bihag nin falsong mga katokdoan sa bilog nindang buhay tibaad madepisilan sa pagsabot kan katalingkasan na itinatao kan Tataramon nin Dios. An pagtaros sa puso ninda tibaad nagkakaipo nin espesyal na kahigosan asin marahay na pag-andam kan nagtotokdo. (2 Tim. 4:2, 5) Bako ining panahon na manluya sa satong gibohon na “pagbalangibog nin katalingkasan sa mga nabihag.” (Isa. 61:1) Mahalagang marhay an Kristianong katalingkasan. An pagkamit kaiyan nangangahulogan nin buhay na daing katapusan.—1 Tim. 4:16.