May Kabiadian—Pero Mabunga
1 Kun kamo kabilang sa dakol na Saksi ni Jehova na may kabiadian, puede pa man giraray kamong magkaigwa nin sarong mabungang ministeryo. Sa katunayan, an saindong mga kamugtakan tibaad magtao sa saindo nin espesyal na mga oportunidad na makapagpatotoo asin parigonon an boot nin iba.
2 Pagpapatotoo: An dakol na kaipuhan na pangganahan an kabiadian nakapakikikabtang nin lubos sa ministeryo. Halimbawa, nanompongan nin sarong tugang na babae na naapektaran nin grabe an saiyang paghirohiro asin pagtaram huli sa operasyon na puede siang makikabtang sa gibohon na pagmamagasin kun ipinaparada kan saiyang agom an saindang kotse na harani sa matawong gilid nin dalan. Sa sarong okasyon, nakapasakamot sia nin 80 magasin sa laog sana nin duwang oras! An saindong espesyal na mga kamugtakan tibaad magpangyari man sa saindo na masumpongan an mga tawo na masakit kutana na makaolay. Kun siring, mansayon iyan bilang saindong espesyal na teritoryo.
3 An saindong paghuhulit puedeng magin epektibong marhay! Mantang naoobserbaran nin iba an saindong determinasyon asin an marahay na epekto sa saindong buhay kan katotoohan sa Biblia, tibaad maakit sinda sa mensahe kan Kahadean. Dugang pa, kun nakanunupar kamo nin mga tawo na nag-aagi nin kasakitan, an saindong eksperyensia sa buhay tibaad magamit nindo sa pagtao sa sainda nin karangahan hale sa Tataramon nin Dios.—2 Cor. 1:4.
4 Pakosogon an Iba: Dai daw naparigon an saindong boot sa estorya nin buhay ni Laurel Nisbet na nasa laog nin aparato sa paghangos sa laog nin 37 taon pero natabangan an 17 indibiduwal na magkaigwa nin tamang kaaraman kan katotoohan sa Biblia? Sa siring man na paagi, an saindong halimbawa makaiinspirar sa mga kapagtubod na maghingoa sa paglilingkod ki Jehova.—g93-E 1/22 p. 18-21.
5 Dawa kun an saindong mga kamugtakan nakaoolang sa saindo na magibo an dakol na boot nindong gibohon sa ministeryo, makakapakosog pa man giraray kamo sa iba. An sarong tugang na lalaki nagsabi: “Nanodan ko na dawa an saro na grabe an kabiadian puedeng magin dakulang tabang sa iba. Kami kan agom ko nagin garo sarong angkla sa manlaenlaen na miembro kan kongregasyon. Huli kan samong mga kamugtakan pirme kaming yaon digdi, pirmeng libreng kaolayon.” Minsan siring, huli sa saimong kabiadian, masasabotan na tibaad dai mo pirmeng magigibo an siring kan saimong pinagmamaigotan. Pero, paagi sa tabang tibaad mahimo mo na aktibong makikabtang sa ministeryo. Kun siring, kun nangangaipo ka nin tabang, dai mag-alangan na ipakipag-olay ini sa kamagurangan o iba pa sa kongregasyon na makatatabang sa saimo.
6 Naheheling ni Jehova an gabos nindong ginigibo tanganing paglingkodan sia, asin naoogma siang marhay sa saindong bilog na kalag na paglilingkod. (Sal. 139:1-4) Mantang nananarig kamo sa saiya, puede nia kamong tawan nin puersa na magkaigwa nin mabunga asin makahulogan na ministeryo.—2 Cor. 12:7-10.