Pagpasalamat sa Pagkaherak nin Dios
1 Bago nagin Kristiano, madahas na kinontra ni apostol Pablo an pagpalakop nin Kristianismo. Minsan siring, huling sia naghiro na mayong aram, pinahelingan sia nin pagkaherak. Ipinaheling ni Jehova an dai na kutana maninigong kabootan, asin tinawan si Pablo nin asignasyon na maghulit. Pinakamahal nia an asignasyon na iyan. (Gibo 26:9-18; 1 Tim. 1:12-14) An pagpasalamat sa pagkaherak ni Jehova an nagpahiro ki Pablo na iubos an makakaya nia sa pag-otob kan saiyang ministeryo.—2 Cor. 12:15.
2 Oyon sa pagkaherak nin Dios, tinawan man kita nin sarong ministeryo. (2 Cor. 4:1) Siring ki Pablo, ikapaheheling niato an satong pag-apresyar sa pagkaherak na ipinaheling sa sato paagi sa paghihingoa niatong tabangan an iba na umoswag sa espirituwal. An sarong paagi na magigibo niato ini iyo an pagpoon asin pamamayo nin mga pag-adal sa Biblia.
3 Pagpoon nin mga Pag-adal sa Biblia: An sarong paagi na makapoon nin mga pag-adal sa Biblia iyo an pag-establisar nin ruta sa magasin. Mantang regular niatong dinadalaw an mga nasa ruta niato, orog kitang nagigin pamilyar sa saindang mga kapurisawan. Pag-abot nin panahon, an sarong artikulo sa saro sa mga magasin tibaad magserbing kapinonan sa pag-introdusir nin pag-adal sa Biblia sa brosyur na Kahagadan. Sa masunod na mga pagdalaw, tibaad posible na ipadagos an mga pag-orolay sa brosyur na Kahagadan kun nagpapasakamot nin mga magasin sa kagharong.
4 Kaipuhan an Mapagngayongayong Paghihingoa: An pamibi kaiba an maigot na paghihingoa makapaooswag sa satong paghuhulit. An sarong payunir na tugang na babae na may sarong inaadalan sa Biblia namibi ki Jehova na logod bendisyonan sia nin dakol pang pag-adal. Sia naghiro man kaoyon kan saiyang mga pamibi. Siniyasat nia an saiyang ministeryo asin nariparo nia na haloy na siang dai nag-aalok nin mga pag-adal sa Biblia kun nagdadalaw liwat. Pinonan niang gibohon iyan asin dai nahaloy nagkaigwa nin duwa pang pag-adal.
5 Pribilehiado nanggad kitang makikabtang sa pagpaaram kan “maogmang bareta manongod sa dai na kutana maninigong kabootan nin Dios”! (Gibo 20:24) Logod na an pagpasalamat sa pagkaherak nin Dios magpahiro sa sato na magin mahigos sa pagtabang sa iba na makinabang sa dai na kutana maninigong kabootan ni Jehova.