Naglilingkod Kita sa Diyos na ‘Abunda sa Pagkahirak’

1. Ano an naiisip ta manungod sa sarong tawong mahihirakon?

PAG naiisip ta an sarong tawong mahihirakon, tibaad naiisip ta an saro na mabuot, madinamayon, mapagmalasakit, asin bukas-palad. Tibaad maisip ta man an istorya ni Jesus manungod sa mapagmalasakit na Samaritano. An lalaking iyan na taga ibang nasyon “nagpahiling nin pagkahirak” sa sarong Judio na nabiktima nin mga parahabon. An Samaritano ‘nahirak na marhay’ sa iridong Judio asin mamumuton na naggibo nin paagi para maasikaso ini. (Luc. 10:29-37) Itinutukdo sato kan ilustrasyon na ini an sarong magayon na kuwalidad kan satuyang Diyos—an pagkahirak. An kuwalidad na iyan sarong aspekto kan pagkamuot nin Diyos asin ipinapahiling niya iyan sa paagi nin pagtratar niya sa sato aroaldaw.

2. Ano an saro pang paagi na maipapahiling an pagkahirak?

² May saro pang paagi na maipapahiling nin sarong tawo an pagkahirak. An saro na mahihirakon tibaad magdesisyon na dai padusahan an saro na dapat kutanang padusahan. Sa bagay na iyan, masasabi ta nanggad na nagin mahihirakon sa sato si Jehova. “Dai niya kita pinapadusahan sigun sa mga kasalan ta,” an sinabi kan salmista. (Sal. 103:10) Pero may mga pagkakataon na tibaad magtao si Jehova nin marigon na disiplina sa saro na nagkasala.

3. Anong mga hapot an sisimbagon ta?

³ Sa artikulong ini, sisimbagon ta an tulong hapot: Taano ta nagpapahiling si Jehova nin pagkahirak? Posible daw na magtao nin marigon na disiplina asin magin mahihirakon man giraray? Asin ano an makakatabang sa sato para makapahiling nin pagkahirak? Aramon ta kun paano sinisimbag kan Tataramon nin Diyos an mga hapot na iyan.

KUN TAANO TA NAGPAPAHILING SI JEHOVA NIN PAGKAHIRAK

4. Taano ta nagpapahiling si Jehova nin pagkahirak?

⁴ Gustong-gusto ni Jehova na magpahiling nin pagkahirak. Pinasabngan si apostol Pablo na isurat na an Diyos ‘abunda sa pagkahirak.’ An pinapanungdan ni Pablo sa kontekstong ini iyo an pagkahirak na ipinahiling nin Diyos paagi sa pagtao kan paglaom na mabuhay sa langit sa saiyang bakong perpektong linahidan na mga lingkod. (Efe. 2:4-7) Pero bako lang sainda nagpapahiling si Jehova nin pagkahirak. An salmistang si David nagsurat: “Si Jehova marahay sa gabos, asin an saiyang pagkahirak hiling-hiling sa gabos na ginigibo niya.” (Sal. 145:9) Huling namumutan ni Jehova an mga tawo, nagpapahiling siya nin pagkahirak nuarin man may mahiling siyang basehan para gibuhon iyan.

5. Taano ta aram na marhay ni Jesus an manungod sa pagkahirak ni Jehova?

⁵ Urog sa kiisay man, aram na marhay ni Jesus kun gurano kagusto ni Jehova na magpahiling nin pagkahirak. Siya saka an saiyang Ama haluyon nang magkaibanan sa langit bago pa siya magdigdi sa daga. (Tal. 8:30, 31) Sa dakul na pagkakataon, nahiling ni Jesus kun paano nagpahiling nin pagkahirak an saiyang Ama sa makasalan na mga tawo. (Sal. 78:37-42) Sa saiyang pagtutukdo, parati niyang sinasambit an magayon na kuwalidad na ini kan saiyang Ama.

6. Paano kita tinabangan ni Jesus na masabutan an pagigin mahihirakon kan saiyang Ama?

⁶ Arog kan sinambit sa sinundan na artikulo, ginamit ni Jesus an parabula manungod sa sarong nalagalag na aking lalaki tanganing tabangan kitang masabutan kun gurano kagusto ni Jehova na magpahiling nin pagkahirak. Huminali sa saindang harong an aki asin “inubos niya . . . sa marauton na pamumuhay an saiyang mga pagsadiri.” (Luc. 15:13) Kan huri, pinagsulsulan niya an saiyang imoral na pamumuhay, nagpakumbaba, asin nagbalik sa saindang harong. Ano an reaksiyon kan saiyang ama? Dai na kaipuhan kan aki na maghalat nin haloy para maaraman iyan. Sinabi ni Jesus: “Mantang harayo pa [an aki], natanaw siya kan saiyang ama asin nahirak ining marhay sa saiya, asin duminalagan ini saka kinugos siya asin mapagpadaba siyang hinadukan.” Dai sinupog kan ama an saiyang aki. Imbes, may pagkahirak niyang pinatawad an saiyang aki asin inako giraray sa saiyang pamilya. Magabat an nagin pagkakasala kan nalagalag na aki, pero huli sa saiyang pagsulsol, pinatawad siya kan saiyang ama. An mahihirakon na ama sa ilustrasyon nagrerepresentar ki Jehova. Sa nakakapahirong paaging ini, iinilustrar ni Jesus an pagigin andam kan saiyang Ama na patawadon an mga parakasala na tunay na nagsusulsol.—Luc. 15:17-24.

7. Paanong an pagpahiling ni Jehova nin pagkahirak patunay kan saiyang kadunungan?

⁷ Nagpapahiling si Jehova nin pagkahirak huli sa saiyang daing kapantay na kadunungan. An mga desisyon ni Jehova pirming para sa ikakarahay kan saiyang mga linalang. Sinasabi kan Bibliya na “an kadunungan na gikan sa itaas . . . pano nin pagkahirak asin marahay na mga bunga.” (Sant. 3:17) Arog nin sarong mamumuton na magurang, aram ni Jehova na para sa ikakarahay kan saiyang mga aki an pagpahiling niya nin pagkahirak. (Sal. 103:13; Isa. 49:15) An pagkahirak nin Diyos nagtatao sa sainda nin paglaom sa ibong kan saindang pagkabakong perpekto. Kaya huli sa dai masukol na kadunungan ni Jehova, napapahiro siya na magpahiling nin pagkahirak nuarin man may mahiling siyang ano man na basehan para gibuhon iyan. Pero aram man ni Jehova kun nuarin dai mapahiling nin pagkahirak. Huling madunong siya, nungka siyang mapahiling nin pagkahirak kun sa paggibo kaiyan makukunsinti an salang gibo.

8. Anong aksiyon an kaipuhan gibuhon kun minsan, asin taano?

⁸ Paano kun pinili nin sarong lingkod nin Diyos na mamuhay nin imoral? Ano an dapat tang gibuhon? Sa ipinasabong na surat ki Pablo, sinabi niya: “Ipundo nindo an pakikiiba-iba” sa saiya. (1 Cor. 5:11) An mga nagkasala na dai nagsusulsol itinitiwalag sa kongregasyon. Kaipuhan gibuhon an aksiyon na iyan tanganing maprotektaran an satong maimbod na mga tugang asin maipahiling an kabanalan ni Jehova. Minsan siring, tibaad iniisip kan iba na an pagtitiwalag bakong kapahayagan kan pagkahirak nin Diyos. Totoo daw iyan? Aramon ta.

MARIGON NA DISIPLINA—PAGPAHILING DAW NIN PAGKAHIRAK?

9-10. Base sa Hebreo 12:5, 6, taano ta masasabi ta na an pagtitiwalag kapahayagan nin pagkahirak? Iilustrar.

⁹ Namumundo kitang marhay pag nakakadangog kita nin paisi sa Kristiyanong pagtiripon na an saro na namumutan ta bako nang Saksi ni Jehova. Tibaad maisip ta kun baga talagang kaipuhan na itiwalag siya. Talaga daw na an pagtitiwalag kapahayagan nin pagkahirak? Iyo nanggad! An dai pagtao nin disiplina sa saro na kaipuhan disiplinahon bakong pagpahiling nin kadunungan, pagkahirak, o pagkamuot. (Tal. 13:24) An pagtitiwalag daw makakatabang sa sarong dai nagsusulsol na nagkasala na magbago? Iyo. Napatunayan kan dakul na nakagibo nin magabat na pagkakasala na an marigon na disiplina na itinao sa sainda kan mga elder iyo an talagang kinakaipuhan ninda para makapag-isip-isip, baguhon an saindang paggawi, asin bumalik ki Jehova.—Basahon an Hebreo 12:5, 6.

¹⁰ Pag-isipan an ilustrasyon na ini. Nariparo kan sarong pastor na may hilang an saro sa saiyang mga karnero. Aram niya na tanganing mabulong an partikular na hilang kan karnero, kaipuhan niya ining isuway sa aripumpon. Kaso, gusto kan mga karnero na pirming nasa kaibanan kan aripumpon saka dai sinda mapamugtak kun mapasuway diyan. Buot sabihon daw kaiyan daing hirak o maringis an pastor dahil isinuway niya an karnero? Siyempre dai. Aram niya na kun tutugutan niyang makiiba-iba sa aripumpon an may hilang na karnero, malakop an hilang. Paagi sa pagsuway sa may hilang, napoprotektaran niya an bilog na aripumpon.—Ikumparar an Levitico 13:3, 4.

11. (a) Ano an mga pagkakapareho kan saro na natiwalag saka kan sarong karnero na may hilang? (b) Anong mga probisyon asin tabang an makukua kan saro na natiwalag?

¹¹ Pag natiwalag an sarong Kristiyano, puwede tang isipon na arog siya kan may hilang na karnerong idto. May hilang siya sa espirituwal. (Sant. 5:14) An hilang sa espirituwal, arog kan ibang kamatian sa hawak, puwede nanggad makaulakit. Kaya sa nagkapirang kaso, kaipuhan na isuway sa kongregasyon an saro na may hilang sa espirituwal. An disiplinang ini kapahayagan nin pagkamuot ni Jehova sa maimbod na mga miyembro kan Saiyang aripumpon asin puwede kaiyan na maabot an puso kan nagkasala asin mapahiro siya na magsulsol. Mantang tiwalag an saro, puwede pa man giraray siyang mag-atender sa mga pagtiripon kun sain mapapakakan siya sa espirituwal asin mapapakusog an saiyang pagtubod. Puwede man siyang magkua nin literatura para magamit niya saka maghiling nin JW Broadcasting^®. Asin mantang nahihiling kan mga elder an saiyang pag-uswag, sa pana-panahon puwede sindang magtao saiya nin konseho saka instruksiyon para matabangan siyang magkusog giraray sa espirituwal asin maibalik siya bilang Saksi ni Jehova.b

12. Ano an mamumuton asin mahihirakon na magigibo kan mga elder para sa dai nagsusulsol na nagkasala?

¹² Mahalagang tandaan na idto sanang mga nagkasala na dai nagsusulsol an itinitiwalag. Aram kan mga elder na seryosong bagay iyan na dapat pag-isipan na marhay. Aram ninda na pag nagtatao si Jehova nin disiplina, su “tama sana.” (Jer. 30:11) Namumutan ninda an saindang mga tugang asin habo nindang makagibo nin ano man na makakaraot sa espirituwalidad kan mga tugang. Pero kun minsan, mamumuton asin mahihirakon nanggad kun hahalion sa kongregasyon an nagkasala.

13. Taano ta kaipuhan itiwalag an sarong Kristiyano kaidto sa Corinto?

¹³ Pag-isipan kun ano an ginibo kaidto ni apostol Pablo manungod sa sarong dai nagsusulsol na nagkasala. May sarong Kristiyano sa Corinto kaidto na nagin kasaruan an agom kan saiyang ama. Marauton nanggad! Manungod sa bagay na ini, pinagbutan kaidto ni Jehova an suanoy na mga Israelita: “An lalaking nakidurog sa agom kan saiyang ama nagdara nin kasusupgan sa saiyang ama. Sindang duwa dapat nanggad na gadanon.” (Lev. 20:11) Siyempre, dai puwedeng ipagbuot ni Pablo na gadanon su lalaki. Pero sinabihan niya an mga taga Corinto na itiwalag ini. An imoral na paggawi kan lalaking idto nakakaapektar na sa iba sa kongregasyon. An nagkapira ngani sa sainda dai ikinasupog an marauton na paggawi niya!—1 Cor. 5:1, 2, 13.

14. Paano nagpahiling si Pablo nin pagkahirak sa natiwalag na lalaki sa Corinto, asin taano? (2 Corinto 2:5-8, 11)

¹⁴ Kan huri, naaraman ni Pablo na naggibo nin dakulang mga pagbabago an lalaki. An nagkasala tunay na nagsulsol! Dawa ngani an lalaki nagdara nin kasusupgan sa kongregasyon, sinabi ni Pablo sa kamagurangan na habo niyang magin “sobra karingis.” Sinabihan niya sinda: “Patawadon nindo siya nin may kabuutan asin rangahon.” Mangnuhon kun ano an dahilan ni Pablo: “Tanganing dai siya madaog kan sobrang kamunduan.” Nahirak na marhay si Pablo sa nagsulsol na lalaki. Habo ni Pablo na madaog nin sobrang kamunduan an lalaki, na biyong pangluyahan huli sa ginibo niya kaidto asin magpundo na lugod sa paghagad nin kapatawadan.—Basahon an 2 Corinto 2:5-8, 11.

15. Paano an mga elder magigin marigon asin mahihirakon pa man giraray sa pagtao nin disiplina?

¹⁵ Arog ni Jehova, gustong-gusto kan mga elder na magpahiling nin pagkahirak. Marigon nindang dinidisiplina an nagkasala kun kinakaipuhan pero nagpapahiling nin pagkahirak kun posible pag talagang may basehan para gibuhon iyan. Ta kun dai, bako iyan pagkahirak kundi pagkunsinti. Pero, an mga elder lang daw an kaipuhan na magpahiling nin pagkahirak?

ANO AN MAKAKATABANG SA SATO GABOS NA MAGPAHILING NIN PAGKAHIRAK?

16. Uyon sa Talinhaga 21:13, ano an gigibuhon ni Jehova sa mga dai nagpapahiling nin pagkahirak?

¹⁶ Hinihinguwa kan gabos na Kristiyano na arugon an pagkahirak ni Jehova. Taano? An sarong dahilan iyo na dai dadangugon ni Jehova an pamibi kan mga dai nagpapahiling nin pagkahirak. (Basahon an Talinhaga 21:13.) Mayo sa sato an magusto na dai dangugon ni Jehova an satong mga pamibi, kaya linilikayan ta nanggad na magin bakong mahihirakon. Imbes na magin daing pakiaram sa pagsakit nin sarong kapwa Kristiyano, dapat na pirmi kitang magin andam na dangugon an “agrangay kan dukha.” Isinasapuso ta man an ipinasabong na konsehong ini: “An saro na dai nagpapahiling nin pagkahirak huhusgaran na mayong pagkahirak.” (Sant. 2:13) Kun mapakumbaba tang gigirumdumon na kaipuhan tang marhay an pagkahirak, posibleng marhay na mas magpahiling kita nin pagkahirak. Lalo nang gugustuhon tang magpahiling nin pagkahirak kun an sarong nagsulsol na nagkasala nagbabalik na sa kongregasyon.

17. Paano nagpahiling si Hading David nin udok sa pusong pagkahirak?

¹⁷ An mga halimbawa sa Bibliya makakatabang sa sato na magpahiling nin pagkahirak asin dai magin maringis. Halimbawa, pag-isipan an manungod ki Hading David. Parati siyang nagpahiling nin udok sa pusong pagkahirak. Dawa ngani gusto siyang gadanon ni Saul, nagin mahihirakon si David sa hadi na linahidan nin Diyos asin dai niya nuarin man naisip na magbalos o kulgan ini.—1 Sam. 24:9-12, 18, 19.

18-19. Sa anong duwang pagkakataon dai nagin mahihirakon si David?

¹⁸ Minsan siring, bako sa gabos na pagkakataon nakapahiling nin pagkahirak si David. Halimbawa, kan si Nabal, na sarong maisog na lalaki, magtaram nin daing galang asin magsayumang tawan nin kakanon si David saka an saiyang mga tawuhan, angguton na marhay si David asin gusto kaining gadanon si Nabal saka an gabos na lalaking tawuhan na kairiba kaini sa harong. Marahay na sana ta naghiro tulos an matinios na agom ni Nabal na si Abigail kaya nalikayan ni David na magkasala sa dugo.—1 Sam. 25:9-22, 32-35.

¹⁹ Sa saro pang pagkakataon, an propetang si Natan nag-istorya ki David manungod sa sarong mayaman na lalaki na kinua an kasaro-saruing karnero kan sarong pobreng lalaki. Anggot na suminimbag si David: “Isinusumpa ko sa ngaran kan buhay na Diyos na si Jehova, dapat magadan an lalaking idto na naggibo kaini!” (2 Sam. 12:1-6) Aram ni David an Katugunan ni Moises. An sarong tawo na naghabon nin sarong karnero kaipuhan na magbayad nin apat na doble kaiyan. (Exo. 22:1) Pero an sentensiyang kagadanan? Sobra karingis kaiyan. Idto palan, ginamit man sana ni Natan an ilustrasyon na idto para tabangan si David na masabutan na mas grabe pa an mga krimen na nagibo niya! Pero an ipinahiling na pagkahirak ni Jehova ki David ibang-iba nanggad sa nagin paghatol kaini sa nangua nin karnero sa ilustrasyon ni Natan!—2 Sam. 12:7-13.

20. Ano an manunudan ta sa halimbawa ni David?

²⁰ Mangnuhon na kan si David magpadara sa saiyang kaanggutan, hinusgaran niya si Nabal asin an gabos na lalaking tawuhan kaini na magadan. Asin sa saro pang pagkakataon, hinusgaran tulos ni David an lalaki sa ilustrasyon ni Natan na dapat ining magadan. Sa ikaduwang pagkakataon na iyan, tibaad maisip ta kun taano ta nagibo nin sarong madinamayon na tawo an arog kaiyan karingis na paghusgar. Pag-isipan an nangyari ki David kan panahon na iyan. Nakokonsiyensiya siya. An pagigin bakong mabuot saka mapanghusgar senyales nin hilang sa espirituwal. Pinatanidan na marhay ni Jesus an saiyang mga parasunod: “Magpundo na kamo sa paghusgar tanganing dai kamo paghusgaran; huli ta an paghusgar na ihinuhusgar nindo iyo an ihuhusgar sa saindo.” (Mat. 7:1, 2) Kaya pagmaigutan ta na dai magin maringis kundi magin ‘abunda sa pagkahirak,’ arog kan satong Diyos.

21-22. Ano an nagkapirang praktikal na paagi na makakapahiling kita nin pagkahirak?

²¹ An pagkahirak bako sanang pagmati. Sa katunayan, an pagkahirak tinawan nin kahulugan na “pagmalasakit na may gibo.” Kaya puwedeng pag-isipan kan kada saro sa sato kun siisay sa satong kapamilya, kakongregasyon, asin sa satong komunidad an nangangaipo nin tabang. Siguradong dakul kang mahihiling na oportunidad na makakapahiling ka nin pagkahirak. May naiisip ka daw na nangangaipo nin pagranga? Puwede daw kitang magtao nin praktikal na tabang, arog nin kakanon o paggibo nin nagkapirang bagay na makakatabang? Igwa daw nin nakabalik na sa kongregasyon na nangangaipo nin amigo na makakapakusog sa saiya? Puwede ta daw ipakipag-ulay sa iba an nakakarangang mensahe kan maugmang bareta? Saro ini sa pinakamarahay na paagi na makakapahiling kita nin pagkahirak sa siisay man na makakaulay ta.—Job 29:12, 13; Roma 10:14, 15; Sant. 1:27.

²² Kun alerto kita sa mga bagay na iyan, makakahanap kita nin mga oportunidad na makapahiling nin pagkahirak. Pag nagpapahiling kita nin pagkahirak, siguradong napapaugma ta an satong Diyos sa langit, an Diyos na ‘abunda sa pagkahirak’!