Kun Paano Papakusugon Giraray an Pagigin Mag-amigo Nindo ni Jehova

KADA taon, dakul na namumutan na karnero an nakakabalik sa Kristiyanong kongregasyon. Isipa na sana an dakulang “kaugmahan sa langit” pag minabalik an kada saro sainda! (Luc. 15:7, 10) Kun nakabalik ka na sa kongregasyon, makakasigurado ka na nauugmang marhay si Jesus, an mga anghel, asin si Jehova mismo na mahiling kang naninindugan giraray sa katotoohan. Pero, mantang pinapakusog mo giraray an pagigin mag-amigo nindo ni Jehova, tibaad mapaatubang ka sa mga kadipisilan. Ano an nagkapira sa mga iyan, asin ano an makakatabang saimo?

ANO AN MGA KADIPISILAN?

Dakul an pinangluluyahan pa man giraray nin buot dawa nakabalik na sa kongregasyon. Tibaad namamatian mo an namatian ni Hading David. Maski kan pinatawad na an saiyang mga kasalan, sinabi niya: ‘An mga pagkakasala ko nakatahob sa sako.’ (Sal. 40:12; 65:3) Pagkatapos na makabalik an saro ki Jehova, tibaad makamati pa man giraray siya nin pagkakonsiyensiya o pagkasupog sa laog nin dakul na taon. Si Isabelle labing 20 taon na tiwalag.a Sinabi niya, “Nasakitan akong marhay na maniwala na mapapatawad ako ni Jehova.” Kun pangluyahan ka nin buot, puwedeng lumuya giraray an espirituwalidad mo. (Tal. 24:10) Pagmaigutan na dai iyan mangyari saimo.

Namamatian kan iba na dai ninda kaya an mga kaipuhan na gibuhon para maibalik an saindang haraning relasyon ki Jehova. Pagkatapos makabalik, sinabi ni Antoine, “Pagmati ko nagkarilingawan ko na an gabos manungod sa buhay ko kaidto bilang Kristiyano.” Dahil sa arog kaiyan na mga pagmati, tibaad mag-alangan an iba na lubos na magpartisipar sa espirituwal na mga aktibidad.

Para iilustrar, ipamugtak na an iniingat-ingatan mong harong nadestrosong marhay nin bagyo. Huli kaiyan, tibaad pangluyahan kang marhay pag iniisip-isip an panahon asin trabahong kakaipuhanon sa paghirahay kaiyan. Kaagid kaiyan, kun naraot an relasyon mo ki Jehova huli sa magabat na pagkakasala, tibaad mamatian mo na dakulaon na paghihinguwa an kaipuhan para maibalik an saimong espirituwalidad. Pero may makakatabang saimo.

Inaagda kita ni Jehova: “Madya kamo ngunyan asin husayon niyato an mga bagay-bagay sa pag-ultanan ta.” (Isa. 1:18) Dakul ka nang ginibong paghihinguwa para “husayon . . . an mga bagay-bagay.” Nauugmang marhay saimo si Jehova sa paggibo mo kaiyan. Isipa na sana: Dahil sa ginibo mo, makakatao si Jehova nin mapuwersang simbag sa mga akusasyon ni Satanas!—Tal. 27:11.

Paagi sa paggibo kaiyan, nagin mas harani ka na ki Jehova, asin nanunuga siya na marani man siya saimo. (Sant. 4:8) Pero bako lang an mahiling kan iba na parte ka na giraray kan kongregasyon an kaipuhan. Kaipuhan mong padagos na pakusugon an pagkamuot mo sa saimong Ama asin Amigo, si Jehova. Paano mo magigibo iyan?

MAGKAIGWA NIN RASONABLENG MGA PASUHAN

Magkaigwa nin rasonableng mga pasuhan mantang pinapakusog mo giraray an espirituwalidad mo. Tandaan na an saimong espirituwal na pundasyon—an kaaraman mo manungod ki Jehova saka sa mga panuga niya para sa maabot—posibleng marhay na yaon pa man giraray. Pero kaipuhan mong magkaigwa giraray nin marahay na rutina bilang Kristiyano, asin kaiba digdi an paghuhulit kan maugmang bareta saka parating pakikiiba sa mga tugang. Pag-isipan an minasunod na pasuhan.

Parating makipag-ulay ki Jehova. Nasasabutan kan saimong Ama na, dahil sa padagos na pagkakonsiyensiya, puwedeng magin dipisil saimo na mamibi saiya. (Roma 8:26) Dawa arog kaiyan, “magin matiyaga sa pagpamibi,” na sinasabi ki Jehova kun gurano mo kagustong magin amigo siya. (Roma 12:12) Nagigirumduman ni Andrej: “Grabe an pagkakonsiyensiya saka pagkasupog ko. Pero sa kada pagpamibi ko, nababawasan iyan. Nagigin mas matuninong an isip ko.” Kun dai mo aram an sasabihon sa pamibi, pag-isipan an mga pamibi kan nagsusulsol na si Hading David na mababasa sa Salmo 51 asin 65.

Regular na pag-adalan an Bibliya. Makakatabang ini na kumusog an espirituwalidad mo saka an pagkamuot mo ki Jehova. (Sal. 19:7-11) “An pinakadahilan man talaga kaya nagluya ako saka nakulgan ko si Jehova iyo na mayo ako nin espirituwal na rutina,” an sabi ni Felipe. “Habo kong mautro an nagibo kong salang iyan, kaya nagdesisyon akong gibuhon na proteksiyon an personal na pag-adal.” Puwede mo man gibuhon iyan. Para makahanap nin angay na mga tema para sa personal na pag-adal, puwede kang magpatabang sa sarong maygurang na amigo.

Pakusugon giraray an relasyon mo sa mga tugang. May mga nakabalik na sa kongregasyon na nahahadit na magigin negatibo an paghiling sainda kan iba. Sinabi ni Larissa: “Supugon talaga ako. Pagmati ko trinaydor ko an kongregasyon. Iyan an namatian ko sa halawig na panahon.” Makakasiyerto ka na an mga elder saka an iba pang maygurang na mga tugang gustong-gusto kang tabangan mantang pinapakusog mo giraray an espirituwalidad mo. (Hilingon an kahon na “Ano an Puwedeng Gibuhon kan mga Elder?”) Nauugma sindang marhay na nakabalik ka na, asin gusto nanggad nindang maparahay ka!—Tal. 17:17.

Ano an makakatabang saimo na magin mas harani sa kongregasyon? Lubos na magpartisipar sa mga ginigibo kan mga tugang—pag-atender sa mga pagtiripon saka regular na pakikikabtang sa paglilingkod sa langtad. Paano ini makakatabang? Sinabi ni Felix: “Hinahalat-halat kaidto kan kongregasyon an pagbalik ko kaya namatian kong mahalaga ako sainda. Tinabangan ninda ako gabos na magin parte giraray kan pamilya, na mamatian na napatawad na ako, saka magpadagos sa paglilingkod ki Jehova.”—Hilingon an kahon na “Ano an Puwede Mong Gibuhon?”

DAI SUMUKO!

Padagos na mapaabot si Satanas nin mga “bagyo” para paluyahon ka mantang pinapakusog mo giraray an pagigin mag-amigo nindo ni Jehova. (Luc. 4:13) Magin andam. Pasarigon na ngunyan an saimong espirituwal na harong.

Manungod sa saiyang mga karnero, nanunuga si Jehova: “An nawawara hahanapon ko, an nalalagalag ibabalik ko, an nabarian bebendahan ko, asin an maluya papakusugon ko.” (Ezek. 34:16) Dakul na iba pa an tinabangan ni Jehova na maibalik an relasyon ninda sa saiya. Makakasiyerto ka na gusto niyang tabangan ka na padagos pang pakusugon an relasyon mo saiya.