“Apudon . . . an Kamagurangan”

1. Paano ipinahiling ni Jehova na mahalagang marhay sa saiya an saiyang mga karnero?

MAHALAGANG marhay ki Jehova an saiyang mga karnero. Binakal niya sinda paagi kan dugo ni Jesus asin inasignaran an mga elder sa kongregasyon na atamanon an Saiyang aripumpon. (Gibo 20:28) Gusto nin Diyos na trataron kan mga elder nin may kabuutan an saiyang mga karnero. Asin sa panginginot ni Cristo, hinihinguwa kan mga elder na paginhawahon an mga karnero asin protektaran sinda sa espirituwal na peligro.—Isa. 32:1, 2.

2. Sairisay an tinatawan ni Jehova nin espesyal na atensiyon? (Ezekiel 34:15, 16)

² Nagmamalasakit na marhay si Jehova sa gabos niyang karnero, alagad tinatawan niya nin espesyal na atensiyon an mga nagsasakit. Paagi sa mga elder, tinatabangan niya an mga nagsasakit sa espirituwal. (Basahon an Ezekiel 34:15, 16.) Pero gusto niyang maghagad kita nin tabang pag kaipuhan ta iyan. Sa arog kaiyan na mga pagkakataon, apuwera sa paghagad nin tabang sa Diyos paagi sa udok na mga pamibi, naghahagad man kita nin tabang sa “mga pastor asin paratukdo” sa kongregasyon.—Efe. 4:11, 12.

3. Ano an magigin pakinabang sa sato gabos kun pag-uulayan ta an manungod sa papel kan mga elder?

³ Sa artikulong ini, pag-uulayan ta an manungod sa areglo nin Diyos na pagtao sa sato nin espirituwal na tabang paagi sa mga elder. Sisimbagon ta an mga hapot na: Nuarin kita dapat maghagad nin tabang sa mga elder? Taano ta dapat niyatong gibuhon iyan? Asin paano ninda kita tinatabangan? Dawa kun dai kita ngunyan nakakaeksperyensiya nin kadipisilan, makakatabang sa sato an simbag sa mga hapot na iyan na mas maapresyar an areglo nin Diyos asin tibaad makapagligtas iyan sa satong buhay pag-abot nin panahon.

NUARIN NIYATO DAPAT “APUDON . . . AN KAMAGURANGAN”?

4. Taano ta nasabi niyato na hilang sa espirituwal an pinapanungdan kan Santiago 5:14-16, 19, 20? (Hilingon man an mga ritrato.)

⁴ Pinunan ni disipulo Santiago an pagpaliwanag manungod sa areglo nin Diyos na pagtao nin espirituwal na tabang paagi sa paghapot: “Igwa diyan sa saindo nin may hilang? Apudon niya an kamagurangan kan kongregasyon.” (Basahon an Santiago 5:14-16, 19, 20.) Ipinapahiling kan konteksto na hilang sa espirituwal an pinapanungdan digdi ni Santiago. Halimbawa, sinabi niya sa may hilang na apudon, bako an sarong doktor, kundi an kamagurangan. Saka ipinaliwanag man ni Santiago na tanganing maumayan an may hilang kaipuhan na mapatawad an saiyang mga kasalan, na nagpaparisa na hilang sa espirituwal an pinapanungdan niya. May mga pagkakaagid an mga lakdang na kaipuhan gibuhon para maumayan an hilang sa espirituwal asin an mga kaipuhan gibuhon para mabulong an hilang sa pisikal. Pag may hilang kita sa pisikal, nagduduman kita sa doktor, sinasabi an mga sintomas, asin sinusunod ta an mga rekomendasyon niya. Sa kaagid na paagi, pag may hilang kita sa espirituwal, dapat kitang magdulok sa mga elder, ipaliwanag an satong sitwasyon, asin humiro kauyon kan itinao sa satong sadol na basado sa Kasuratan.

5. Paano ta maaaraman kun namemeligro na kitang magkahilang sa espirituwal?

⁵ Dinadagka kita kan areglong ilinadawan sa Santiago kapitulo 5 na magdulok sa mga elder pag namamatian tang may problema an satong espirituwal na salud. Pero madunong nanggad na maghagad kita nin tabang bago pa iyan magkawsa nin dakulang danyos sa satong pakikiamigo sa Diyos! Dapat kitang magin onesto sa satong sadiri huling pinapatanidan kita kan Kasuratan na puwede tang madaya an satong sadiri manungod sa kamugtakan kan satong espirituwalidad. (Sant. 1:22) Nangyari ini sa nagkapirang Kristiyano kaidto sa Sardis kaya pinatanidan sinda ni Jesus manungod sa saindang espirituwalidad. (Kap. 3:1, 2) An sarong paagi na maaaraman ta kun kumusta an satong espirituwal na salud iyo an pagkumparar kan entusiyasmo niyato kaidto sa satong pagsamba asin kan entusiyasmo niyato ngunyan. (Kap. 2:4, 5) Puwede tang haputon an satong sadiri: ‘Nabawasan na daw an kaugmahan ko sa pagbasa kan Bibliya asin paghurop-hurop? Dai na daw ako haros nag-aandam para sa mga pagtiripon asin parati na lang nagpapalta? Bako na daw ako gayong maigot sa ministeryo? An mas pigpaparaisip ko na daw iyo an pagpasiram-siram sa buhay saka materyal na mga bagay asin diyan na lang haros nauubos an oras ko?’ Kun iyo an simbag ta sa arin man sa mga hapot na iyan, posibleng indikasyon iyan na may kaluyahan kita na posibleng marhay na maglala kun dai tatawan nin atensiyon. Kun dai ta iyan kayang mapangganahan sa sadiri ta sana o kun nabalga ta na an mga pamantayan nin Diyos huli kaiyan, dapat kitang maghagad nin tabang sa mga elder.

6. Ano an dapat na gibuhon nin saro na nakagibo nin magabat na kasalan?

⁶ Siyempre, kun an saro nakagibo nin magabat na kasalan na puwedeng magin dahilan na halion siya sa kongregasyon, dapat siyang magdulok sa mga elder. (1 Cor. 5:11-13) An siisay man na nakagibo nin magabat na kasalan nangangaipo nin tabang tanganing maibalik an marahay na relasyon niya ki Jehova. Para makamtan an pagpapatawad ni Jehova paagi sa pantubos, dapat kitang magpahiling nin “mga gibong angay sa pagsulsol.” (Gibo 26:20) Kaiba sa mga gibong iyan an pagdulok sa mga elder kun nakagibo kita nin magabat na kasalan.

7. Sairisay pa an nangangaipo nin tabang kan mga elder?

⁷ Tinatabangan kan mga elder bako lang an mga nakagibo nin magabat na kasalan kundi pati man an mga nangluluya sa espirituwal. (Gibo 20:35) Halimbawa, tibaad nahahadit ka huling pagmati mo nadadaog ka na sa pakikipaglaban mo sa salang mga pagmawot. Tibaad lalo nang masakit iyan sa saimo kun bago ka nagin Kristiyano adikto ka sa droga, nabantad sa pornograpiya, o imoral an pamumuhay. Dai pag-isipon na nagsosolo ka sa laban. Puwede kang makipag-ulay sa sarong elder na madangog sa mga ikinakahadit mo, matao nin praktikal na sadol, asin maasigurar sa saimo na mapapaugma mo si Jehova kun padagos mong lalabanan an salang mga pagmawot. (Ecl. 4:12) Kun makamati ka nin pangluluya nin buot sa pakikipaglaban mo, puwede kang pagirumdumon kan mga elder na posibleng marhay na indikasyon iyan na pinapahalagahan mong marhay an relasyon mo ki Jehova asin na habo mong magin sobra an tiwala sa sadiri.—1 Cor. 10:12.

8. Anong mga klase nin pagkakasala an dai na kaipuhan idulok sa mga elder?

⁸ Dai ta man kaipuhan na magdulok sa mga elder para sa lambang problema ta sa satong espirituwalidad. Halimbawa, ipamugtak na may nasabi kang nakakakulog sa sarong tugang, asin tibaad ngani dai mo nakontrol an saimong kaanggutan. Imbes na magdulok sa elder, puwede mong iaplikar an sadol ni Jesus asin makipagkatuninungan sa tugang. (Mat. 5:23, 24) Puwede mong i-research an manungod sa kahuyuan, pakatios, asin pagpupugol sa sadiri tanganing mas lubos mong maipahiling sa sunod an marahayon na mga kuwalidad na iyan. Siyempre, kun dai mo pa man giraray maresolberan an problema, puwede kang maghagad nin tabang sa sarong elder. Sa surat ni apostol Pablo sa mga taga Filipos, pinakiulayan niya an sarong dai pinangaranan na Kristiyano para tabangan si Eudias asin Sintique na maresolberan an saindang dai pagkauruyon. Puwede ka man na matabangan nin sarong elder sa saindong kongregasyon.—Fil. 4:2, 3.

TAANO TA DAPAT KITANG MAGDULOK SA MGA ELDER?

9. Taano ta dai niyato dapat pagtugutan an pagkasupog na makapugol sa sato na magdulok sa mga elder? (Talinhaga 28:13)

⁹ Nangangaipo nin pagtubod asin kusog nin buot an paghagad nin tabang pag nakagibo kita nin magabat na kasalan o pag namamatian tang nadadaog na kita sa pakikipaglaban ta sa sarong kaluyahan. Dai ta dapat pagtugutan an pagkasupog na makapugol sa sato na magdulok sa mga elder. Taano? Huling kun sinusunod ta an areglo ni Jehova, ipinapahiling niyato na nagtitiwala kita sa saiya asin sa mga instruksiyon niya para magdanay na makusog an satong pagtubod. Inaako niyato na kaipuhan ta an saiyang tabang kun namemeligro na kitang matumba sa espirituwal. (Sal. 94:18) Asin kun makagibo kita nin kasalan, papatawadon kita nin Diyos kun itutuga niyato an satong mga kasalan asin dai na uutruhon iyan.—Basahon an Talinhaga 28:13.

10. Ano an puwedeng mangyari kun pupurbaran tang itago an satong kasalan?

¹⁰ Kun makikipag-ulay kita sa sarong elder pag kaipuhan ta nin tabang, maresulta iyan sa mga bendisyon. Alagad kun pupurbaran tang itago an satong kasalan, puwede tang mapalala an satong sitwasyon. Kan purbaran ni Hading David na itago an saiyang mga kasalan, naapektaran siya sa espirituwal, emosyonal, asin sa pisikal pa ngani. (Sal. 32:3-5) Arog sa hilang sa pisikal, an problema sa espirituwal sa parati naglalala kun dai ta iyan aasikasuhon. Nasasabutan ini ni Jehova kaya dinadagka niya kita na “husayon . . . an mga bagay-bagay sa pag-ultanan ta” asin ni Jehova paagi sa areglong itinao niya para tabangan kitang maumayan sa espirituwal.—Isa. 1:5, 6, 18.

11. Paano puwedeng maapektaran an iba kun itatago ta an magabat na kasalan?

¹¹ Kun itatago ta an satong magabat na kasalan, puwede tang maapektaran an iba. Puwede tang maulang an pagbulos kan espiritu nin Diyos sa bilog na kongregasyon asin maapektaran an katuninungan kan satong mga tugang. (Efe. 4:30) Siring man, kun maaraman niyato na may sarong indibidwal sa kongregasyon na nakagibo nin magabat na kasalan, dapat ta siyang dagkahon na ipakipag-ulay iyan sa mga elder.a Kun itatago ta an magabat na kasalan kan iba, magkakasala man kita. (Lev. 5:1) Papahiruon kita kan pagkamuot niyato ki Jehova na magdulok sa mga elder asin sabihon an katotoohan. Paagi kaiyan, nakakatabang kitang mapagdanay na malinig an kongregasyon asin magkaigwa giraray nin marahay na relasyon ki Jehova an siring na mga nagkasala.

PAANO KITA TINATABANGAN KAN MGA ELDER?

12. Paano tinatabangan kan mga elder an mga nangluluya sa espirituwal?

¹² Ininstruksiyunan an mga elder na tabangan an mga nangluluya sa espirituwal. (1 Tes. 5:14) Kun nakagibo ka nin sala, tibaad may mga ihapot sinda sa saimo sa katuyuhan na ‘masarok’ o maaraman an kauruirarumi mong mga iniisip asin namamatian. (Tal. 20:5) Matatabangan mo sinda kun dai ka mag-aalangan na ipahayag an gabos mong sabuot, dawa kun masakit iyan huli sa saimong kultura, personalidad, o sa pagkasupog na namamatian mo sa kadipisilan na napapaatubang sa saimo. Dai mahadit na an mga sinasabi mo magin garo baga ‘dai napag-isipan.’ (Job 6:3) Imbes na magkongklusyon tulos an mga elder, hihinguwahon ninda na magdangog na marhay sa saimo asin na aramon an bilog na sitwasyon bago ka tawan nin sadol. (Tal. 18:13) Aram ninda na nangangaipo nin panahon an pagpastor sa aripumpon, kaya dai man ninda inaasahan na mareresolberan tulos sa saro sanang pag-uulay an dipisil na mga problema.

13. Paano kita natatabangan kan mga elder paagi kan saindang mga pamibi asin paggiyang basado sa Kasuratan? (Hilingon man an mga ritrato.)

¹³ Pag nagdulok ka sa mga elder, dai ninda dadagdagan pa an namamatian mong pagkakonsiyensiya. Imbes, mamimibi sinda para sa saimo. Tibaad mapangalas ka sa “mapuwersang marhay [na] epekto” na puwedeng magibo kan saindang mga pamibi. Kaiba man sa pagtabang ninda an ‘paglahid sa saimo nin lana sa ngaran ni Jehova.’ (Sant. 5:14-16, nota sa ibaba) An ‘lanang’ ini nanunungod sa katotoohan na nasa Tataramon nin Diyos. Paagi sa mahusay nindang paggamit kan Bibliya, mapapaginhawa asin mararanga ka kan mga elder, na tinatabangan kang maibalik an marahay na relasyon mo ki Jehova. (Isa. 57:18) Mapapakusog kan saindang paggiyang basado sa Kasuratan an determinasyon mong padagos na gibuhon an tama. Paagi sa sainda, garo mo man sana nadadangog na sinasabi sa saimo ni Jehova: “Ini an dalan. Digdi kamo maglakaw.”—Isa. 30:21.

14. Uyon sa Galacia 6:1, paano tinatabangan kan mga elder an siisay man na ‘napasala nin lakad’? (Hilingon man an mga ritrato.)

¹⁴ Basahon an Galacia 6:1. An sarong Kristiyanong ‘napasala nin lakad’ dai naglalakaw kauyon kan matanos na mga pamantayan nin Diyos. An salang lakad puwedeng magpanungod sa napasalang paghusgar o sa sarong seryosong paglapas sa katugunan nin Diyos. Huli sa pagkamuot, ‘hinihinguwa [kan mga elder] na itanos an siring na tawo sa espiritu nin kahuyuan.’ An Griegong terminong itrinadusir na “itanos” puwede man na magladawan sa ginigibong pagtanos o pagbalik sa tamang posisyon kan nabaring tulang. Hinihinguwa nin sarong mahusay na doktor na itanos an nabaring tulang sa paaging dai gayong makakamati nin kulog an pasyente sagkod na posible. Kaagid kaiyan, hinihinguwa man kan mga elder na paumayan kita sa satong hilang sa espirituwal sa paaging dai dinadagdagan an kulog na namamatian ta. Ininstruksiyunan man sinda na “bantayan [an saindang] sadiri.” Mantang tinatabangan ninda kita na itanos an satong dalan, isinasaisip kan mga elder na bako man sindang perpekto asin nakakagibo man nin mga sala. Kaya dai nanggad ninda ipinapamati na nakakalabi sinda, dai sinda nagpapakangmatanos, saka bako sindang mapanghusgar. Imbes, hinihinguwa nindang magpahiling nin empatiya.—1 Ped. 3:8.

15. Ano an puwede tang gibuhon kun may problema kita?

¹⁵ Makakapagtiwala kita sa mga elder sa satong kongregasyon. Sinanay sinda na pagdanayon na kumpidensiyal an mga bagay na kumpidensiyal, na ibasar sa Bibliya an saindang sadol imbes na sa sadiri nindang mga opinyon, asin na padagos kitang tabangan sa satong problema. (Tal. 11:13; Gal. 6:2) Magkakalain sinda nin personalidad asin eksperyensiya, pero puwede kitang magdulok nin daing pag-alangan sa siisay man na elder para ipakipag-ulay an satong problema. Siyempre, sa paghagad ta nin sadol, dai kita mapalipat-lipat nin dudulukan na elder sa katuyuhan na makahanap nin saro na masabi sa sato kan gusto tang madangog. Kun gigibuhon ta iyan, magigin arog kita kan mga tawong mas gustong “makitik [an] saindang mga talinga” kisa sa manudan an “marahay na katukduan” na nasa Tataramon nin Diyos. (2 Tim. 4:3) Pag magdulok kita sa sarong elder manungod sa satong problema, tibaad haputon niya kita kun nakipag-ulay na kita sa ibang mga elder manungod diyan asin kun anong sadol an itinao ninda. Papahiruon man siya kan saiyang kababaan nin buot na maghagad nin sadol sa ibang mga elder.—Tal. 13:10.

AN SATONG PERSONAL NA PANINIMBAGAN

16. Anong personal na paninimbagan an igwa kita?

¹⁶ Bilang mga karnero nin Diyos padagos kitang binabantayan kan mga elder, alagad dai ninda kita dinidiktahan kan dapat tang gibuhon. Personal na paninimbagan niyato na mamuhay na may diyosnon na debosyon. Maninimbag kita sa Diyos sa kun ano an mga sinasabi asin ginigibo ta. Sa tabang niya, makakaya tang mapagdanay an satong integridad. (Roma 14:12) Kaya imbes na diktahan kita kan dapat tang gibuhon, tinatabangan kita kan mga elder na masabutan an kaisipan nin Diyos na yaon sa saiyang Tataramon. Kun susunudon ta an saindang basado sa Bibliyang sadol, masasanay ta an satong “kakayahan na makasabot” na makakatabang sa sato na makagibo nin madunong na mga desisyon.—Heb. 5:14.

17. Ano an dapat na magin determinasyon ta?

¹⁷ Sarong dakulang pribilehiyo nanggad para sa sato na magin mga karnero ni Jehova! Isinugo niya an “marahay na pastor” na si Jesus para magin pantubos tanganing magkaigwa kita kan oportunidad na mabuhay nin daing katapusan. (Juan 10:11) Asin paagi sa mga elder sa satong kongregasyon, inutob ni Jehova an saiyang panuga: “Tatawan ko kamo nin mga pastor na mahiro kauyon kan sakong kabutan, asin papakakanon ninda kamo nin kaaraman asin pakasabot.” (Jer. 3:15) Pag kita nangluluya o may hilang sa espirituwal, dai mag-alangan na apudon an mga elder para maghagad nin tabang. Lugod na magin determinado kita na lubos na makinabang sa probisyon ni Jehova na mga elder sa kongregasyon.