Bagong Programa sa Pansirkitong Asamblea
1 Ihinula kan satong Kagurangnan na an saiyang mga disipulo magkakaigwa nin kahorasaan. (Mat. 24:9) Paano niato dapat na mansayon an mga pagbalo? Ano an magpapangyari sa sato na matagalan an kahorasaan? Sisimbagon an mga hapot na ini kan programa sa pansirkitong asamblea para sa 2004. An tema “Maggayagaya Kamo sa Paglaom. Magtagal Kamo sa Kasakitan.”—Roma 12:12.
2 Duwang Simposium: Totokaron kan enot na simposium, na may titulong “Magbunga na May Pakatagal,” an mga paagi na kita namumunga. Iinterbiohon an nagkapirang parahayag mapadapit sa kun paano sinda naghuhulit asin nagtotokdo na may pakamate nin pag-apura. Nangorognang bobooton kan mga magurang na magtaong atension sa kabtang na “Kun Dinidisiplina ni Jehova,” na matokar kun paano mangangatanosan an mga magurang sa saindang mga aki. Idodoon kan huring ispiker kan simposium kun ano an dapat niatong gibohon tangani na maolang an kinaban na makaimpluwensia sa sato asin magin dahelan na kita dai magbunga.—Mar. 4:19.
3 “Dumalagan sa Paorumbasan na May Pakatagal” an tema kan ikaduwang simposium. Ipaheheling kaiyan kun paano an satong pamumuhay kapareho nin sarong paorumbasan. Taano ta kaipuhan kitang dumalagan sono sa mga susundon? Paano niato mapangganang mahahale an gabos na kagabatan asin dai mapagal sa paorumbasan para sa buhay? An itataong napapanahon na hatol sa Kasuratan makakatabang sa sato gabos na magpadagos sa pagdalagan na may pakatagal.
4 An Pakatagal Nagbubunga nin Pag-oyon nin Dios: An saro sa mga pahayag kan paraataman sa distrito may titulong “An Pakatagal Nagbubunga nin Pagkainooyonan.” Sisimbagon kan pampublikong pahayag an hapot na: Kiisay na ngaran maninigong maglaom an mga nasyon, asin ano an kalabot dian? Totokaron kan pantapos na pahayag na, “Huli sa Pakatagal Makakamtan Nindo an Saindong Kalag,” kun paano natagalan ni Jesus an inhustisya na dai nagpait an boot.
5 Girumdomon na darahon an saindong librong Paadalan sa Pagmiministro asin an saindong Torrengbantayan para sa semanang iyan. Kumua nin mga nota tangani na tabangan kamong magkonsentrar asin para sa reperensia sa ngapit. An repaso kan programa gigibohon sa huri sa kongregasyon.