Pagdagdag sa Satong Ikinakapasakamot na mga Magasin
1 Sa laog nin 124 taon An Torrengbantayan nagserbing parasurog sa katotoohan kan Kahadean asin ngonyan labing 25 milyones kan kada isyu an ipinupublikar sa 147 lenguahe. An Awake! man haloy nang nagsusuportar sa Tataramon nin Dios asin labing 22 milyones kan kada isyu an ipinupublikar sa 85 lenguahe.—Ikomparar an Colosas 1:23.
2 Napaninigoan kan mga Magasin an Espirituwal na Pangangaipo: An mga magasin niato pinagdadanay kita na listo sa espirituwal asin aktibo sa paglilingkod ki Jehova. Igwa man iyan nin praktikal na mga artikulo manongod sa diosnon na paggawe asin Kristianong moral na gawe-gawe. Bilang resulta, kita nagkakamit nin nakalalabing kualidad nin buhay ngonyan mientras na hinahalat niato an mas marahay pa nganing mga bagay na ipinanuga ni Jehova.—Isa. 48:17; 1 Tim. 6:19.
3 Alagad an mga magasin niato dai ipinupublikar para sa Mga Saksi ni Jehova sana. Siring kan ipinaririsa kan kabilangan sa parapo 1, minilyon katawo na bakong mga Saksi an maogmang nagbabasa kan mga publikasyon niato asin dakol an nakanood kan katotoohan sa paaging ini.
4 Magin Matinao sa Pag-alok nin mga Magasin: Sa 1 Timoteo 6:18, ineenkaminar kita na “magin matinao, andam na manhiras,” asin kaiba digdi an satong pagdistribwir nin magasin. An mga parahayag parateng nag-aalangan na magwalat nin mga magasin kun an kagharong dai nagdodonar para sa pambilog na kinaban na gibohon. Minsan siring, bako daw na mas marahay na magin “matinao” tanganing an gabos na boot na magbasa kan mga magasin magkaigwa nin oportunidad na gibohon iyan? Siempre, habo niatong magwalat nin mga magasin sa mga tawo na dai nagpapaheling nin interes asin dai mabasa kaiyan, alagad sa ibong na lado, dai niato pagtogotan an kawaran nin donasyon na pogolan kita kun may ipinaheheling na tunay na interes.
5 Minsan siring, tanganing makapasakamot nin dakol na magasin, kaipuhan niatong magkaigwa nin supisyenteng suplay. Isinusuherir na an lambang parahayag asin payunir magkaigwa nin regular na pedido sa lingkod sa magasin tanganing magkaigwa sinda nin supisyenteng ikakapasakamot. Igwa daw kamo nin personal na pedido? Maninigong iareglo kan mga lingkod sa magasin na mag-ako nin personal na mga pedido pakabasa kan artikulong ini dangan, kun kulang an suplay kan kongregasyon, puedeng magpadara nin pedido sa sangang opisina tangani na madagdagan an suplay kan magasin.
6 An Eclesiastes 11:6 nagsasabi: “Pagkaaga isabwag mo an saimong banhi asin sagkod sa banggi dai mo pagpahingaloan an saimong kamot; huli ta dai mo aram kun saen ini magigin mapanggana.” An pagmamagasin siring sa pagsabwag nin banhi. Kaya biyong isabwag iyan asin magtiwala ki Jehova na matao nin kapangganahan sa itinalaan na panahon.—1 Cor. 3:6.