Sarong Gibohon na Nagkakaipo nin Kapakumbabaan
1 Sinasadol kita kan Tataramon nin Dios na magin “mapakumbaba sa isip, na dai nagbabalos nin maraot sa maraot . . . kundi, al kontraryo, nagbebendisyon.” (1 Ped. 3:8, 9) An hatol na iyan aplikado nanggad sa paghuhulit. Tunay nanggad na an Kristianong ministeryo puedeng baloon an satong kapakumbabaan.
2 An kapakumbabaan sarong kualidad na nakakatabang sa sato na tagalan an dai nakaoogmang mga situwasyon. Kun naghuhulit, dinodolok niato an mga estranghero na dai man kita imbitado, na nakakaaram na an nagkapira masimbag nin makolog. Nagkakaipo nin kapakumbabaan tangani na magdanay sa paghuhulit sa ibong nin siring na tratamiento. Sa sarong masakiton na teritoryo, duwang payunir na tugang na babae an nagharongharong aroaldaw sa laog nin duwang taon na mayo ni sarong nakipag-olay! Minsan siring, nagmaigot sinda, asin ngonyan may duwa nang kongregasyon sa lugar na idto.
3 Pag-atubang sa Pagkadaing Modo: An kapakumbabaan makakatabang sa sato na arogon si Jesus kun an iba maisog o bakong magalang. (1 Ped. 2:21-23) Sa sarong harong ininsulto an sarong tugang na babae, enot kan agom na babae dangan kan agom na lalaki, na pinagbotan siang humale sa solar. An tugang na babae naghuyom sana asin nagsabi na naglalaom siang makaolay sinda sa ibang panahon. Huli kaini, naghangang marhay an mag-agom kaya nagdangog sinda sa sunod na Saksi na nagsongko asin inako ninda an imbitasyon na umatender sa sarong pagtiripon sa Kingdom Hall. An tugang na babae na hinaboan kan enot yaon duman tangani na taratarahon sinda asin tawan sinda nin dugang pang patotoo. Puede man niatong mapalumoy an mga dai naghihimate paagi sa pagpaheling nin “mahoyong boot asin hararom na paggalang.”—1 Ped. 3:15; Tal. 25:15.
4 Likayan an Pagpaabaw-abaw: An kaaraman niato sa Biblia dai nagtatao nin dahelan na menoson an iba o magtaram manongod sa sainda sa mapagtatsar na mga tataramon. (Juan 7:49) Imbes, hinahatolan kita kan Tataramon nin Dios “na dai magtaram nin nakararaot manongod sa kiisay man.” (Tito 3:2) Kun may kababaan an puso niato, siring kan ki Jesus, narerepreskohan niato an iba. (Mat. 11:28, 29) An mapakumbabang pagdolok nakadadagdag nin atraksion sa satong mensahe.
5 Iyo, an kapakumbabaan nakakatabang sa sato na magmaigot sa masakit na teritoryo. Puede kaiyan na mapalumoy an mga dai naghihimate, asin naaakit kaiyan an iba sa mensahe kan Kahadean. Orog sa gabos, napaoogma kaiyan si Jehova, na ‘nagtatao nin dai na kutana maninigong kabootan sa mga mapakumbaba.’—1 Ped. 5:5.