Hapot

◼ Paano binabayadan an mga gastos kan paraataman sa sirkito kun nagsosongko sa sarong kongregasyon?

Sa parate, an dagosan asin pagkakan boluntaryong itinatao kan mga tugang sa kongregasyon na pinaglilingkodan asin inaapresyar ini kan sangang opisina. Kumusta man an manongod sa transportasyon o iba pang gastos nia durante kan semana? Minsan ngani andam an sangang opisina na bayadan ini, dakol na kongregasyon an gikan sa boot na tumabang na bayadan nin parsial o bilog an mga gastos na ini, asin kun siring, bago matapos an pagsongko puedeng hapoton kan kamagurangan an paraataman sa sirkito kun may isusumitir siang ano man na gastos. Dangan puede siang magtao nin lista nin mga gastos kaiba an mga resibo. Paano iaareglo kan kongregasyon na mabayadan ini? Ini maninigong gibohon paagi sa resolusyon, na iaatubang sa kongregasyon sa enot na Pagtiripon sa Paglilingkod pakatapos kan pagsongko. An siring na resolusyon maninigo sanang gibohon kun igwa nin pondo an kongregasyon.—⁠Para sa impormasyon manongod sa mga resolusyon, helingon an “Hapot” sa An Satong Ministeryo sa Kahadean na Pebrero 1994, pahina 2.

Kun an kongregasyon mayo nin pondo, bakong tama na mangolekta nin pondo an kamagurangan hale sa mga indibiduwal para sa katuyohan na ini. Sa situwasyon na iyan, isusumitir na sana kan paraataman sa sirkito an saiyang mga gastos sa sangang opisina sa katapusan kan bulan. Minsan siring, kun may mga parahayag na gustong magtao nin personal na regalo sa paraataman sa sirkito, puede nindang gibohon iyan. Kun espesipiko nindang sabihon na itinatao an regalo tanganing mabayadan an nagkapira sa saiyang mga gastos, kun siring ibabawas nia an kantidad kan regalong ini sa mga gastos na hinahagad sa sangang opisina. Bakong maninigo an pagtao nin regalong kuarta hale sa pondo kan kongregasyon, kundi pagbalik sana kan mga nagastos.

Kun an kamagurangan dai magdolok sa paraataman sa sirkito tanganing hapoton an mga gastos nia, kun siring hahagadon nia sa sangang opisina na ibalik an ano man na gastos na dai binayadan kan kongregasyon. (od, p. 49) Dai noarin man dodolokon kan paraataman sa sirkito an kongregasyon tanganing hagadon sa sainda na bayadan an saiyang mga gastos, kundi isusumitir nia sana an saiyang mga gastos solamente kun hagadon kan kamagurangan na gibohon nia iyan asin kun kaya asin gikan sa boot na tumabang an kongregasyon.

Inaapresyar kan sangang opisina an suportang itinatao kan mga kongregasyon sa paraataman sa sirkito durante kan saiyang pagsongko, na nakakakontribwir na marhay sa pambilog na kinaban na gibohon.—⁠Heb. 13:16.