Puede daw Kamong Makapoon nin Pag-adal sa Biblia sa Setyembre?
1. Anong espesyal na paghihingoa an gigibohon niato sa Setyembre, asin ano an kalabot digdi?
1 Durante kan Setyembre magibo kita nin espesyal na paghihingoa na makapoon nin mga pag-adal sa Biblia sa enot na pagdalaw na ginagamit an librong Itinotokdo kan Biblia. Ano an kalabot digdi? Apuera sa pagpasakamot kan publikasyon na iyan, hihingoahon niatong ipakipag-olay sa kagharong an pirang parapo asin iareglo na ipagpadagos an pag-oolay sa masunod na mga pagdalaw.
2. Paano niato puedeng gamiton an pahina 4 asin 5 kan librong Itinotokdo kan Biblia tanganing makapoon nin pakikipag-olay sa Biblia?
2 Puede kitang magpoon paagi sa pagbukas sa mga ilustrasyon na nasa pahina 4 asin 5 kan libro asin pagsabing, “Bako daw na marahayon kun an mga pagbabago na ilinadawan digdi talagang mangyari na?” Maghinanyog nin maingat sa simbag. Kun an kagharong magpaheling nin interes sa saro kan mga tema, ipaheling sa saiya an itinotokdo kan Biblia manongod sa temang iyan paagi sa pag-oolay sa parapo o mga parapo sa libro na nagtotokar kan tekstong iyan. Halimbawa, kun sia interesadong maheling na mawara na an helang siring kan ihinula sa Isaias 33:24 o 35:5, 6, buksan an pahina 36 asin ipakipag-olay an parapo 22.
3. (a) Kun ginamit na nindo an pag-atubang na kapareho kan isinuherir sa parapo 3, paano naghimate an kagharong? (b) Ano an iba pang mga pag-atubang na ginamit nindo sa saindong paghihingoa na makapoon nin pag-adal sa Biblia sa enot na pagdalaw?
3 Puedeng magin epektibo an mga pag-atubang na minatogot tolos sa sato na makapoon nin pakikipag-olay sa Biblia na ginagamit an libro. Huling an kadaklan na tawo gustong magkaigwa nin maogmang buhay pampamilya, puede kamong magdesisyon na hapoton an kagharong, “Sa paghona daw nindo makakatabang sa mga tawo an pag-aplikar kan sadol na ini gikan sa Biblia tanganing magkaigwa nin maogmang buhay pampamilya?” Basahon an Efeso 5:33, dangan pasimbagon. Tibaad maakit an kagharong sa mga hapot na nasa irarom kan titulo kan kapitulo 14, na matogot sa saindo na ipakipag-olay an enot na duwang parapo. Mantang ipinapakipag-olay nindo an impormasyon, mapoon na kamo nin sarong pag-adal sa Biblia.
4. Kun kita makapoon nin pag-adal sa enot na pagdalaw, paano niato puedeng iareglo na ipagpadagos an pag-oolay?
4 Iareglo an Pagdalaw Liwat: Sa pagtatapos kan enot na pag-adal, puede nindong iareglo na ipagpadagos an pag-oolay paagi sa pagsabing, “Sa laog sana nin pirang minuto, nanodan niato an itinotokdo kan Biblia manongod sa sarong importanteng tema. Sa masunod, puede niatong pag-olayan an [magwalat nin sarong hapot na pag-oolayan]. Puede daw akong maghapit sa arog kaining oras sa masunod na semana?” Gumibo nin depinidong mga areglo sa pagdalaw liwat, asin seguradohon na otobon an napag-olayan. (Mat. 5:37) Oras na maestablisar an regular na pag-adal, sistematikong ipakipag-olay an libro poon sa kapinonan sagkod sa katapusan.
5. Ano an maninigo niatong gibohon kun an kagharong dai mag-ako nin pag-adal sa Biblia sa enot na pagdalaw?
5 Kun kamo makapasakamot nin sarong kopya kan librong Itinotokdo kan Biblia alagad an kagharong dai mag-ako nin pag-adal sa enot na pagdalaw, dumalaw liwat na an katuyohan makapoon nin pag-adal sa Biblia.