Iskedyul sa Pagtiripon sa Paglilingkod

Semana nin Disyembre 11

Kanta 174

15 min: Lokal na mga paisi. Tokaron an “Bagong Programa sa Aldaw nin Espesyal na Asamblea.” Ginagamit an mga suhestion na nasa pahina 8 o iba pang pag-atubang na angay sa saindong teritoryo, idemonstrar kun paano iaalok an Torrengbantayan na Disyembre 15 asin an Awake! na Disyembre. Sa saro sa mga demonstrasyon, ipaheling kun paano aatubangon an posibleng habong makipag-olay na nagsasabing “Dai ako interesado.”—Helingon an librong Reasoning, p. 16.

15 min: An Teokratikong Paadalan sa Pagmiministro Para sa 2007. Pahayag asin mga interbio na pangengenotan kan paraataman sa paadalan. Tokaron an mga punto na aplikable sa lokal na kongregasyon sa suplemento kan An Satong Ministeryo sa Kahadean na Nobyembre 2006. Ipaliwanag na dai ipapaisi antes pa kan paraataman sa paadalan an kualidad sa pagtaram na hinihingoang paoswagon nin sarong estudyante. Mantang matatapos niato durante kan 2007 an pagbasa kan Hebreong Kasuratan poon sa Isaias 24 sagkod sa katapusan kan Malaquias, ngonyan na taon an tamang-tamang panahon para sa mga tugang na lalaki na naasignaran na mag-andam kan tampok na mga kabtang kan Biblia asin para sa iba na magkokomento na gamiton an mga publikasyon niato na nagtataong liwanag sa propetikong mga librong ini. Interbiohon an duwa o tolong parahayag na kabilang sa minasunod: sarong bagohan na estudyante, sarong aking estudyante na marahay an pag-oswag, asin sarong eksperyensiadong estudyante. Ipasaysay sa sainda an mga epekto kan paadalan sa saindang ministeryo asin sa saindang espirituwalidad. Enkaminaron an gabos na magin mahigos sa pag-otob kan mga asignasyon sa sainda, sa pagpartisipar sa tampok na mga kabtang kan Biblia, asin sa pag-aplikar kan mga suhestion na semanal na itinatao hale sa Makinabang sa Edukasyon sa Teokratikong Paadalan sa Pagmiministro.

15 min: “Dai Nindo Waraon an Saindong Pagkamoot kan Enot.”a Sagkod na may oras, imbitaran an mga nagdadangog na magkomento sa sitadong mga teksto.

Kanta 193 asin pantapos na pamibi.

Semana nin Disyembre 18

Kanta 150

10 min: Lokal na mga paisi. Piniling mga Paisi sa An Satong Ministeryo sa Kahadean. Repasohon an mga punto sa “Hapot.” Sabihon an espesyal na mga areglo nin paglilingkod sa langtad para sa Disyembre 25 asin Enero 1.

15 min: “Dalawon Liwat an Gabos na Nagpapaheling nin Dawa Kadikit na Interes.”b Imbitaran an mga nagdadangog na magkomento kun paano sinda nakakua nin impormasyon na makontak an mga interesado na nakaolay ninda kan impormal na nagpapatotoo o kan naghuhulit sa tinampo patin iestorya an ano man na pambihirang mga eksperyensia sa pagdalaw liwat sa mga siring. Puedeng iareglo antes pa an saro o duwang komento.

20 min: “An Espiritu nin Pagboboluntaryo Nagbubunga nin mga Bendisyon.”c Interbiohon an saro o duwang parahayag na midbid huli sa saindang espiritu nin pagboboluntaryo. Paano ninda ipinaheling an espiritu nin pagboboluntaryo? Anong mga pagliliwat an kinaipuhan, asin paano ninda nagibo an mga ini? Anong mga bendisyon an nakamtan ninda bilang resulta?

Kanta 108 asin pantapos na pamibi.

Semana nin Disyembre 25

Kanta 210

15 min: Lokal na mga paisi. Basahon an report sa kuenta asin mga pasasalamat sa donasyon. Tokaron an “Bagong Programa sa Pansirkitong Asamblea.” Ginagamit an mga suhestion na nasa pahina 8 o iba pang pag-atubang na angay sa saindong teritoryo, idemonstrar kun paano iaalok an Torrengbantayan na Enero 1 asin an Awake! na Enero. Sa pagtatapos kan kada pag-atubang, magpalataw nin nakakapukaw nin isip na hapot na puedeng simbagon sa masunod na pagdalaw na ginagamit an librong Itinotokdo kan Biblia.

15 min: Lokal na mga pangangaipo.

15 min: “Igwa daw Kamo nin Personal na Teritoryo?”d Iiba an haralipot na komento hale sa paraataman sa paglilingkod manongod sa mga sagkodan kan asignadong teritoryo kan kongregasyon, kun gurano kaparate na nahuhulitan an teritoryo, asin kun igwang ikakaasignar na personal na mga teritoryo.

Kanta 219 asin pantapos na pamibi.

Semana nin Enero 1

Kanta 158

5 min: Lokal na mga paisi. Pagirumdomon an mga parahayag na itao an report sa paglilingkod sa langtad para sa Disyembre.

15 min: Pagreport kan Progreso sa Ministeryo. Pahayag asin pakikipag-olay sa mga nagdadangog basado sa Organisado sa Paggibo kan Kabotan ni Jehova, poon sa subtema sa pahina 83 sagkod sa katapusan kan kapitulo.

25 min: “Magplano Na Ngonyan na Mag-auxiliary Payunir!”e Kun pinag-oolayan an parapo 8, sambiton an petsa kan masunod na pagsongko kan paraataman sa sirkito, kun aram na. Interbiohon an duwa o tolong naglingkod kasuarin pa sana bilang auxiliary payunir. Anong mga pagliliwat an ginibo ninda sa saindang iskedyul? Paano sinda nakinabang? Kun igwa, an saro sa mga iinterbiohon puede na saro na nakapag-auxiliary payunir huli sa tabang asin suporta nin iba sa laog nin pamilya.

Kanta 65 asin pantapos na pamibi.

[Mga Nota sa Ibaba]