Makikinabang daw Kamo sa Pinasimpleng Edisyon?

An pinag-aadalan na edisyon kan An Torrengbantayan igwa na ngonyan nin pinasimpleng Ingles na edisyon. Para ini sa (1) mga parahayag na nakakapagtaram nin Ingles na​—tibaad dahel sa limitadong edukasyon​—mas makikinabang huli sa pinasimpleng mga tataramon; (2) mga parahayag na an nagimatan na lenguahe bakong Ingles; (3) mga hoben, kaiba na an mga nasa elementarya asin hayskul; saka (4) mga tinotokdoan sa Biblia na nangangaipo nin mas simple asin mas direkta sa puntong mga tataramon tanganing masabotan an espirituwal na mga bagay.

An numero kan mga parapo, mga hapot, asin mga subtema katumbas kan nasa standard na edisyon. An laog kan mga artikulo magkapareho nanggad, alagad mas simple an mga tataramon. Minsan ngani standard na edisyon an gagamiton kan namamayo sa Pag-adal sa Torrengbantayan asin kan parabasa nin parapo, apuera sana kun an kadaklan naggagamit kan pinasimpleng edisyon, parareho an sitadong mga teksto saka ilustrasyon na maheheling kan mga naggagamit kan pinasimpleng edisyon asin makakasubaybay sinda sa pagbasa kan parapo patin makakapagkomento.

An siisay man na gustong makinabang sa edisyon na ini maninigong itao an saiyang regular na order sa lingkod na nag-aasikaso kan magasin.