Nakakaogmang mga Pagbabago sa An Torrengbantayan!
1 Sa kapinonan kan taon na ini, an mga kongregasyon nakaresibi nin nakakapukaw sa boot na paisi: Poon sa Enero 2008, An Torrengbantayan magkakaigwa nin duwang magkalaen na edisyon, an saro para sa publiko asin an saro pa para sa satong Kristianong kasararoan nin magturugang! Tibaad nag-iisip kamo: ‘Sa anong paagi magkakalaen an duwang magasin? Ano an mga bentaha nin pagkaigwa nin magkasuway na edisyon? Igwa daw nin ano man na bagong kabtang na malalaoman?’
2 An mga Pagkakalaen: An isyu na petsa uno kan bulan aapodon na Pampublikong Edisyon. An gabos na artikulo sa isyung ini aandamon para sa kapakinabangan kan publiko. An isyu na petsa 15 kan bulan aapodon na Pag-aadalan na Edisyon asin dai iaalok sa paglilingkod sa langtad. Igwa iyan kan gabos na artikulong pag-aadalan na kaipuhan sa sarong bulan saka sekondaryong mga artikulo na partikularmenteng interesante sa nagdusay na mga Kristiano. An Pampublikong Edisyon kan An Torrengbantayan makakaakit bako sana sa mga Saksi kundi nangorognang makakaakit sa mga bakong Saksi na tibaad may paggalang sa Biblia. Sa ibong na lado, an Awake! para pa man giraray sa mas dakol na parabasa, pati an mga mapagduda asin mga naghihingakong kabtang nin bakong Kristianong relihion.
3 An mga Bentaha: Sa Pag-aadalan na Edisyon, dai na kaipuhan na ipaliwanag an mga termino na arog kan “payunir” sa paagi na masasabotan nin mga bakong Saksi. An edisyon na ini puede man na magkaigwa nin deretso sa puntong impormasyon na inandam nangorogna para sa Mga Saksi ni Jehova asin mga inaadalan sa Biblia na nag-ooswag sa espirituwal. Paano man an Pampublikong Edisyon? Huling an mga tema asin an estilo nin pagsurat dinisenyo para sa publiko, an sarong bakong Saksi siertong maoogma na basahon an bilog na magasin. Siempre, an lambang Saksi ni Jehova makikinabang sa pagbasa kan kada isyu. Huling saro sanang Torrengbantayan kaiba nin sarong Awake! an iaalok niato sa ministeryo sa langtad kada bulan, magkakaigwa kita nin sarong bilog na bulan tanganing gumibo nin epektibong mga presentasyon.
4 Bagong mga Kabtang: May mga plinanong nakakaogma asin bagong kabtang para sa Pampublikong Edisyon kan An Torrengbantayan. Totokaron nin sarong kabtang an pundamental na mga katokdoan sa Kasuratan sa simpleng marhay na estilo. Ipapaheling kan saro pa kun paano makakatabang an Biblia sa mga pamilya. Ipepresentar para sa mga hoben an mga pradyek para sa pag-adal sa Biblia. An kada isyu magkakaigwa nin sarong artikulo na nagtatampok nin espesipikong mga teksto sa Biblia na nagtotokdo sa sato manongod ki Jehova bilang sarong persona.
5 Ipinapamibi niato na logod bendisyonan ni Jehova an bagong areglong ini sa An Torrengbantayan. Logod na an magasin na iyan, kaiba an Awake!, ikapaabot an maogmang bareta sa dakol pang tawo na maninigo.—Mat. 10:11.