Sa mga Parabasa
NAOOGMA kaming ipaaram sa saindo na poon sa isyung ini, magkakaigwa nin nagkapirang pagbabago sa format kan An Torrengbantayan. Bago niamo ipaliwanag kun ano an magigin pagbabago, sasambiton niamo kun ano an dai mabago.
An ngaran kan magasin na ini, An Torrengbantayan Nagpapahayag kan Kahadean ni Jehova, dai nagbago. Huli kaini, An Torrengbantayan padagos na matao nin onra ki Jehova bilang an tunay na Dios asin nin karangahan sa mga parabasa kaiyan paagi sa maogmang bareta kan saiyang Kahadean. Totokaron kan mga artikulo sa pahina 5 sagkod 9 kan isyung ini kun ano an Kahadean na iyan asin kun noarin iyan madatong. Dugang pa, An Torrengbantayan padagos na mapakosog kan pagtubod ki Jesu-Cristo, masuportar sa katotoohan sa Biblia, asin mapaliwanag kan kahulogan nin mga pangyayari sa kinaban sa tabang kan mga hula sa Biblia, siring sa ginigibo na kaiyan sa laog nin dakol na dekada.
Kun siring, ano an magigin pagbabago? Ipapaliwanag niamo an nagkapira sa interesante asin bagong mga kabtang na maluwas sa edisyon na kada tolong bulan.a
Nagkapirang kabtang na nakakapukaw sa isip an maluwas sa edisyon na ini. An artikulong “Aram daw Nindo?” matao nin interesanteng impormasyon na naghahayag kan kahulogan nin piniling mga pagkasaysay sa Biblia. Idodoon kan artikulong “Rumani sa Dios” kun ano an manonodan niato manongod ki Jehova hale sa espesipikong mga teksto sa Biblia. An kabtang na “Naghahapot an mga Parabasa” matokar kan mga simbag sa ordinaryo nang mga hapot manongod sa Biblia. Halimbawa, dakol na tawo an nag-iisip-isip, “An Kahadean daw nin Dios nasa puso nindo?” Makukua nindo an simbag sa pahina 13.
Dakol na regular na kabtang an dinisenyo tanganing makinabang an mga pamilya. Magkakaigwa nin kabtang na “Mga Paagi Para sa Kaogmahan nin Pamilya.” Ipepresentar kaiyan an aktuwal na mga situwasyon manongod sa mga problema nin pamilya asin ipapaheling kaiyan kun paano makakatabang an mga prinsipyo sa Biblia tanganing maresolberan an mga problema. An artikulong “Tokdoan an Saindong mga Aki” maninigong basahon nin mga magurang kaiba kan saindang mga aki. An saro pang kabtang iyo an “Para sa mga Hoben,” na naglaladawan nin proyekto sa pag-adal sa Biblia para sa mga hoben.
Magkakaigwa nin pirang iba pang kabtang na ipupublikar sa edisyon na ini. An “Arogon an Saindang Pagtubod” madagka sa sato na sunodon an halimbawa nin sarong personahe sa Biblia. Halimbawa, sa pahina 18 sagkod 21 kan isyung ini, mababasa nindo an sarong nakakapahirong pagkasaysay manongod sa propetang si Elias asin manonodan nindo kun paano niato maaarog an saiyang pagtubod. Ipepresentar kan kabtang na “Surat Hale sa . . .” an report mismo nin mga misyonero asin iba pa sa laen-laen na parte kan kinaban. Itatampok kan “Kun Ano an Manonodan Niato ki Jesus” an pangenot na mga katokdoan sa Biblia sa simpleng format.
Naniniwala kami na An Torrengbantayan padagos na makakaakit sa mga parabasa na may paggalang sa Biblia asin gustong makaaram kun ano man nanggad an itinotokdo kan librong ini. Naglalaom kami na an magasin na ini makakatabang sa saindo na mapanigoan an saindong pagkapaha sa katotoohan sa Biblia.
AN KAGPUBLIKAR
[Nota sa Ibaba]
a An Torrengbantayan ipupublikar na ngonyan sa duwang edisyon. Sa Ingles asin sa nagkapirang iba pang lenguahe, an isyung petsa 1 kan bulan ipupublikar para sa publiko sa pangkagabsan. Sa Bicol, an isyung ini ipupublikar kada tolong bulan. An isyung petsa 15 kan bulan magigin pag-aadalan na edisyon na gagamiton kan Mga Saksi ni Jehova sa saindang mga pagtiripon kan kongregasyon, na bukas sa publiko.