“How Would You Answer?”

1. Sa ano nadedepisilan an dakol sa sato?

¹ Namomotan daw nindo an Tataramon nin Dios alagad nadedepisilan kamong girumdomon an mga detalye manongod sa mga estorya sa Biblia o kun saen nakarekord sa Kasuratan an espesipikong mga tataramon? Gusto daw nindong magkaigwa an mga aki nindo nin tamang pakasabot sa pundamental na mga katotoohan asin katokdoan sa Biblia? An tampok na pahina na “How Would You Answer?” na ipinupublikar kada bulan sa pahina 31 kan Awake! makakatabang sa mga hoben sagkod gurang na magin mas pamilyar sa Tataramon nin Dios.—Gibo 17:11.

2. Paano magagamit an manlaenlaen na kabtang kan “How Would You Answer?”

² Paano nindo magagamit na marhay an tampok na pahinang ini? An isyu kan Awake! na Enero 2006 igwa kan minasunod na mga suhestion: “Helinga nguna an pahina 31 . . . An nagkapirang kabtang kan pahinang iyan magugustohan nin hoben na mga parabasa; an ibang kabtang mapoprobaran an memorya nin mas haloy nang mga estudyante sa Biblia. An kabtang na ‘When in History?’ tatabangan kamong gumibo nin linya na nagtotokdo sa panahon kun noarin nabuhay an mga personahe sa Biblia asin kun kasuarin nangyari an mayor na mga aktibidad. Mantang an mga simbag sa kabtang na ‘From This Issue’ makukua sa bilog na magasin, an mga simbag sa kadaklan na iba pang hapot maheheling sa sarong designadong pahina sa iyo man sanang isyu, na dian suhi an pagkasurat kaiyan. Taano ta dai gumibo nin pagsiyasat bago nindo basahon an mga simbag dangan sabihon sa iba an nanonodan nindo? Puede pa ngani nindong gamiton an bago asin tampok na pahinang ini, ‘How Would You Answer?’ bilang basehan para sa pampamilyang pag-orolay o mga pag-orolay nin sarong grupo manongod sa Biblia.”

3. Paano nakinabang an nagkapirang pamilya sa tampok na pahinang ini, asin arin na mga kabtang an ikinakaogma nindong marhay?

³ Tunay nanggad na dakol na pamilya an gustong gamiton an tampok na pahinang ini bilang basehan para sa pampamilyang pag-adal. An sarong ina nagsurat: “Naisip ming mag-agom na marahay na iiba an ‘Children’s Picture Search’ sa samong pampamilyang pag-adal tangani na pirme iyan na magin nakakapukaw asin interesante para sa samong tres anyos na aking babae. Ikinakaogma niamong marhay an pagmasid sa saiya mantang dali-dali niang kinukua an saiyang personal na kopya kan Awake! asin binubuklat an kada saro sa mga pahina sagkod na makua nia an saiyang hinahanap.” An sarong ama sa Brazil nagsabi: “Gustohon ko asin kan sakong siete anyos na aking lalaki an tampok na pahinang ini kan Awake! Nakatabang iyan ki Moises na magtao nin atension, hanapon an mga teksto sa Kasuratan, mag-apresyar kan mga retrato, asin masabotan an mga petsa.” Si Ashley, na otso anyos, nagsurat: “Salamat po sa ‘How Would You Answer?’ na nasa poro kan Awake! Dakol po akong nanonodan dian manongod sa Biblia.”

4. Paano magagamit nin sarong pamilya an tampok na pahinang ini bilang kabtang kan saindang pampamilyang pag-adal sa Biblia?

⁴ Taano ta dai gamiton paminsanminsan an “How Would You Answer?” bilang kabtang kan saindong pampamilyang pag-adal? Puede nindong gamiton an Index o Watchtower Library na nasa CD-ROM tangani na hanapon an mga simbag sa nagkapira kan mas depisil na mga hapot. Sa paggibo kaiyan, totokdoan nindo an saindong mga aki kun paano magibo nin pagsiyasat. Kun igwa kamo nin mga aki na mas dakula na, taano ta dai sinda asignaran na siyasaton an mas komplikadong mga simbag sa “Who Am I?” o “When in History?” bago kan pampamilyang pag-adal? Dangan, durante kan pag-adal puede na nindang sabihon an mga resulta kan pagsiyasat ninda. An epektibong paggamit kan pahinang ini sarong paagi na ikakatadom kan mga magurang sa saindang mga aki an Tataramon nin Dios, na tinatabangan sindang maaraman “an banal na mga kasuratan” poon sa pagkaomboy.—2 Tim. 3:15; Deut. 6:7.