Orog Pang Pagdodoon sa Biblia!
1. Sa kapoonpooni, para kiisay sa pangenot ipinublikar An Torrengbantayan, asin para kiisay an The Golden Age?
1 Kan Oktubre 1, 1919, ipinublikar an kaenot-enoteng isyu kan magasin na The Golden Age. Iyan nagin mahalagang marhay na kasangkapan sa paghuhulit. Taano? Huli ta espesyalmenteng ginibo iyan para sa publiko. Bakong arog kaiyan An Torrengbantayan, na minansay sa laog nin dakol na taon bilang sarong magasin na sa pangenot para sa “sadangoton na aripompon.” (Luc. 12:32) An mga parabalangibog kan Kahadean nagpaheling nin dakula nanggad na entusiasmo sa bagong publikasyon kaya sa laog nin dakol na taon an sirkulasyon kan The Golden Age nakakalabi nanggad kan sa An Torrengbantayan.
2. Ano an ngaran ngonyan kan The Golden Age, asin ano an katuyohan kaiyan poon pa sa kapinonan?
2 Ipinublikar an magasin na The Golden Age tanganing ipaheling sa mga tawo na an tunay na solusyon sa mga problema nin katawohan iyo an Milenyal na Paghade ni Cristo, na iyo talaga an magdadara nin panahon nin dakulang kaogmahan asin prosperidad para sa katawohan. Kan suminunod na mga dekada, dakol an ginibong mga pagliliwat sa The Golden Age tanganing mapanigoan an nagbabagong mga pangangaipo kan mga panahon. Kan 1937 an ngaran kaiyan sinalidahan nin Consolation. Kan 1946 iyan nagin Awake!, an ngaran na midbid niato ngonyan.
3. An Awake! nagin mapuersang kasangkapan sa pag-otob kan anong hula?
3 Poon pa sa kapinonan kaiyan, mapuersang nakakontribwir an magasin na ini sa dakulang patotoo na itinatao poon pa kan 1919. (Mat. 24:14) Minsan siring, huli sa pagkaapurado kan satong mga panahon, garo baga madonong na gumibo nin dugang pang pagliliwat sa Awake!
4. (a) Ano an kaipuhan na gibohon nin saro tangani na sia matago sa “aldaw kan kaanggotan ni Jehova”? (b) Segun sa Kapahayagan 14:6, 7, ano an ipinapangapodan kan “anghel na naglalayog sa tahaw kan langit” na dapat na gibohon kan gabos?
4 Minilyon na tawo an naoogmang magbasa kan Awake! huli ta tinatratar kaiyan sa nakakaakit na paagi an laen-laen na sekular na topiko. Daing duwa-duwa na an mayoriya kan mga nag-aatender sa Memorial kada taon regular na mga parabasa kan Awake! Sa ibong kaiyan, kun an siisay man naglalaom na matago sa “aldaw kan kaanggotan ni Jehova,” mangangaipo sia nin tabang na gumibo nin orog pa kisa regular na pagbasa sana kan satong mga publikasyon.—Sof. 2:3; Kap. 14:6, 7.
5. (a) Poon sa Awake! na Enero 2006, ano an itatampok sa risang-risa nanggad na paagi? (b) Tibaad mapahiro an dakol na gibohon an ano, asin bilang kaotoban kan anong hula?
5 Huli kaini, poon Enero 2006, orog na pagdodoon an itatao kan Awake! sa Kahadean nin Dios. Eenkaminaron kaiyan sa mas prangkang paagi an mga parabasa na umasa sa Biblia para sa solusyon sa saindang mga problema asin itatampok kaiyan sa risang-risa nanggad na paagi an paliwanag kan Biblia sa presenteng mga pangyayari. Paagi kaini, orog na masasabotan kan mga parabasa an presenteng mga pangyayari asin tibaad mapahiro sinda kan nababasa ninda na orog pang makanood manongod ki Jehova.—Zac. 8:23.
6, 7. (a) Paano hihingoahon kan Awake! na tabangan an dakol na iaplikar an 1 Tesalonica 2:13? (b) Gurano kaparate na ipupublikar an Awake!, asin pirang lenguahe an maaapektaran kan pagbabago?
6 Padagos na itatampok kan Awake! an mga topiko na interesado an kadaklan. Minsan siring, orog na pagdodoon an itatao sa Biblia. (1 Tes. 2:13) Mantang An Torrengbantayan igwa nin hararom na impormasyon kan Biblia asin an Awake! itatampok an dakol pang artikulo na sono sa Kasuratan, garo dai na kaipuhan na ipadagos an pagpublikar kan Awake! nin duwang beses kada bulan. Kun siring, poon sa isyu kaiyan na Enero 2006, ipupublikar na an Awake! bilang bulanan na magasin. Ini magbubunga nin darudakulang simplipikasyon sa pag-andam, pagtradusir, asin pagpadara kan satong literatura.
7 An pagbabagong ini makakaapektar sa mga 40 porsiento kan mga lenguahe na ipinupublikar an Awake! Sa kadaklan na lenguahe, an Awake! ipinupublikar na nin bulanan o kada tolong bulan. Mayo nin pagbabago sa pagpublikar kan An Torrengbantayan.
8. Paano puedeng gamiton kan mga parahayag an Awake! kaiba kan An Torrengbantayan?
8 Puedeng ialok kan mga parahayag an bulanan na Awake! kaiba an arin man sa isyu kan An Torrengbantayan para sa bulan na iyan. Magagamit kan mga nag-aalok kan Awake! an iyo man sanang isyu sa bilog na bulan na dai na kaipuhan pang bagohon an saindang pag-atubang sa kabangaan kan bulan, arog kan sa presente.
9. Ano an padagos na magigin kabtang kan Awake!?
9 Poon sa kaenot-enoteng isyu kaiyan kan 1919, an magasin na inapod nin sunod-sunod bilang The Golden Age, Consolation, asin ngonyan Awake! nagkaigwa nin dakulang kabtang sa paghuhulit. Ipinapamibi niato na logod padagos na bendisyonan ni Jehova an pagwaras kan magasin na iyan sa rebisadong porma kaiyan asin na logod tabangan kaiyan an dakol pang tawo hale sa “gabos na nasyon asin tribo asin banwaan patin tataramon” na umasa sa Kahadean nin Dios bilang solamenteng paglaom ninda.—Kap. 7:9.