“Magpuka Kamo”
1 Pakatapos na isaysay an importanteng mga pangyayari na magigin tanda kan huring mga aldaw kan sistemang ini nin mga bagay, sinadol ni Jesus an saiyang mga disipulo na “magpuka.” (Mar. 13:33) Taano ta kaipuhan na magpuka an mga Kristiano? Huli ta kita nabubuhay sa pinakapeligrosong panahon sa kasaysayan nin tawo. Dai kita puedeng magtungka sa espirituwal. Iyan maresulta sa dai niato pagpahalaga sa gibohon na itinao sa sato ni Jehova sa panahon na ini kan katapusan. Ano daw na gibohon iyan?
2 Ipinababalangibog ni Jehova sa saiyang banwaan sa bilog na daga an maogmang bareta dapit sa saiyang Kahadean—an solamenteng paglaom para sa katawohan. An satong dayupot na pakikipagtabangan sa organisasyon nin Dios nagpapamidbid sa sato bilang tunay na mga Kristiano, na mapagmangno sa mga panahon asin sa pangangaipo na tabangan an iba na makadangog kan “mga tataramon nin buhay na daing katapusan.” (Juan 6:68) Paagi sa maigot na pakikikabtang sa pinakaimportanteng gibohon na ini, nagtatao kita nin ebidensia nin pagigin puka sa espirituwal.
3 Napahihiro na Maghulit: Bilang mga Saksi ni Jehova, maninigo kitang magin positibo manongod sa satong ministeryo. An pagkamoot sa Dios asin sa kataed nagpapahiro sa sato personalmente na makikabtang sa paghuhulit. (1 Cor. 9:16, 17) Sa paggibo kaiyan, ililigtas niato an sato man sana siring man idtong mga naghihinanyog sa sato. (1 Tim. 4:16) Magin determinasyon niato na makikabtang nin regular sagkod sa mapupuede asin sagkod na kaipuhan sa paghuhulit dapit sa pinakamarahay na gobyerno na makakamtan kan katawohan kasuarin man—an Kahadean nin Dios!
4 An pagkaapurado kan satong ministeryo itinutudok sa isip niato kan sarong mahalagang katotoohan—an biglang pag-abot kan dakulang kahorasaan mangyayari mantang kita nakikikabtang pa sa gibohon na ini. An satong dai pakaaram kan aldaw asin oras nagkakaipo na kita magpuka asin magin andam sa gabos na panahon, na mapagngayongayong nananarig ki Jehova. (Efe. 6:18) Padagos na naghihiwas an naaabot kan paghuhulit. Alagad madali nang umabot an aldaw na an pinakadakulang pagpatotoo sa kasaysayan nin tawo maabot sa kulminasyon.
5 Fiel na sunodon an pagboot ni Jesus na “magpuka.” Ini orog na importante ngonyan kisa kasuarin pa man. Logod na maghimate kita na may pagkaapurado. Ngonyan asin sa gabos na aldaw, magdanay kita na malinaw an isip, listo, asin aktibo sa espirituwal sa paglilingkod ki Jehova. Iyo, logod na “magpuka kita asin papagdanayon niato an toltol na pag-iisip.”—1 Tes. 5:6.