Sarong Pribilehio na Bukas Para sa mga Aki
1 An dakol na magurang na ngonyan gustong-gustong girumdomon an sarong pribilehio na ikinaogma ninda bilang mga aki na nagdadakula sa katotoohan—an Aldaw nin Pagmamagasin. Pinonan an gibohon na iyan sa gabos na kongregasyon kan 1949. Sarong aldaw sa laog nin semana, an gabos kaidto kaipuhan na magkonsentrar sa pagdistribwir kan An Torrengbantayan asin Awake! sa mga tinampo, sa harong-harong, sa tindahan, asin sa iba pang paagi. Espesyalmenteng inantisipar kan mga aki pang parahayag na magpartisipar sa gibohon na ini huli ta nagtao iyan sa sainda nin oportunidad na makikabtang sa iyo man sanang aktibidad siring kan sa mga may edad na sa kongregasyon. Totoo man daw ini sa saindo kan kamo aki pa?
2 Ilabot an mga Aki Nindo: Puede pa man giraray na mag-alok nin mga magasin an mga aki pang marhay na bako pang andam na pumoon nin pakikipag-olay sono sa Kasuratan sa pinto. Iyan nagkakaipo nin pag-adal nin saro sanang simpleng pag-atubang na may pirang haralipot na tataramon. Puedeng supisyente na an halipot na komento, tibaad dapit sa ilustrasyon na nasa tutob. An dakol na kagharong tolos na nag-aako nin mga magasin sa satong mga aki, na parateng marahay an komento manongod sa sinseridad asin marahay na gawe-gawe kan mga hoben na ini. Paagi sa dikit na tabang, an paglilingkod na ini sarong bagay na magigibo nanggad na marahay nin mga aki, na nagtatao nin mahalagang kontribusyon sa pagpalakop kan mensahe nin Kahadean. Siempre, mantang nagdadakula an mga aki, bobooton kan mga magurang ninda na tabangan sinda na padagos na umoswag sa pagpatalubo kan saindang mga abilidad sa paghuhulit.
3 Si Manuel nagpoon na maghulit sa harong-harong kan sia tres anyos. Tinokdoan sia kan mga magurang nia na magtuom nin sarong halipot na pag-atubang. Sia maigot na naghuhulit kaiba ninda, na nagpapasakamot nin dakol na magasin, brosyur, asin pulyeto. Sia man impormal na naghuhulit. Sarong beses kan sia ipag-iba kan saiyang mga magurang sa sarong parke para sa pag-aling-aling, sia nagsadiring boot na magpasakamot nin nagkapirang pulyeto sa ibang tawo na yaon duman. Minsan ngani sia aki pang marhay, an entusiasmo ni Manuel para sa ministeryo sarong gikanan nin tunay na pagparigon sa boot para sa saiyang mga magurang asin sa enterong kongregasyon.—Tal. 22:6.
4 An lambang Sabado designado bilang “Aldaw nin Pagmamagasin” sa 2000 Calendar of Jehovah’s Witnesses. Mga magurang, irinerekomendar niamo na pakosogon giraray nindo an interes sa gibohon na ini, na tinatabangan an saindong mga aki na makikabtang nin regular sagkod sa mapupuede sa pribilehiong ini nin paglilingkod.