Pag-aatubang kan Maogmang Bareta—Sa mga Aki
1 An pangalagkalag sa kadaklan na teokratikong katiriponan nagtatao nin abundang ebidensia na kadakol kan mga aki na nag-oomaw ki Jehova. (Sal. 148:12) Ini maninigong magpagirumdom sato kan pangangaipo na itao sa mga aking nanonompongan niato sa paglilingkod sa langtad an gabos na oportunidad na makanood manongod ki Jehova asin sa saiyang mga panuga. An satong pagigin alisto asin andam na magpatotoo sa mga aki magtatao sainda kan oportunidad na ini. May nagkapirang bagay na maninigong konsideraron.
2 An positibong kaisipan manongod sa mga aki asin sa saindang kakayahan na mamoot ki Jehova kaipuhan. An mga halimbawa sa Biblia, arog baga ni Samuel, David, asin Timoteo, nagtatao nin garantiya na an mga aki pa sa edad puwedeng magin daing pagliwatliwat na dusay sa Dios. (1 Sam. 2:18; Sal. 71:17; 2 Tim. 3:14, 15) Igwa man nin mga halimbawa sa modernong aldaw.
KUN AKI AN LUMUWAS SA PINTO
3 Kun aki an lumuwas sa pinto, girumdomon na mahalaga man an buhay kan aking iyan. Liwaton an saindong pag-aatubang asin ihiras saiya an maogmang bareta. An simpleng pag-aatubang na nagpapaliwanag kun ano an magigin kamugtakan sa Paraiso o halipot na kapahayagan manongod sa natatagama sa ngapit puwedeng gamiton sa pagpukaw nin interes. An dakol na aki pamilyar sa Pamibi kan Kagurangnan asin madaling makasabot sa komento sa kun ano an magigin kahulogan kan simbag sa pamibing iyan paagi sa naliwat na mga kamugtakan sa kinaban.
4 Sa pagpatotoo sa mga aki, mahalaga na igalang an kapangyarihan nin magurang. Depende sa edad ninda, tibaad maninigo na ihapot kun baga tinotogotan sinda kan saindang mga magurang na pumili kan saindang babasahon. Kun dai sinda puwedeng umako nin babasahon, magpatotoo sa sainda nin berbal asin iareglo na bumalik kun yaon na sa harong an magurang. Ini tibaad magin tangga na matabangan man an mga magurang.
5 An pagigin madaling makibagay asin alisto kaiba an paggirumdom na nasa sato an kaipuhan nin mga aki. Igwa kita nin napapanahon na mga babasahon na sinadya tanganing magustohan nin mga aki minsan anong edad. An Dakulang Paratokdo, Bible Stories, Youth asin Family Life mga libro na magugustohan nin mga akion pa. Asin kanigoan na kayamanan an manonompongan sa mga magasin na Torrengbantayan asin Magmata! An artikulo sa Magmata! na “Ihinahapot nin mga Hobenes . . . ” asin an serye sa Watchtower na “Jesus’ Life and Ministry” angay na ialok sa mga aki. Dai man puwedeng malingawan an de kolor na mga brochure, arog baga kan Enjoy Life on Earth Forever! Kaya kun nag-aandam kamo para sa paglilingkod sa langtad, isipon kun ano an madadara nindo na magugustohan nin mga aki.
6 An paghokom ni Jehova makakaapektar sa gabos, pati sa “soltero asin daraga asin sadit na aki.” (Ezeq. 9:6) Makapagpapaheling kita nin mamomoton na pagmakolog arog kan ginibo ni Jesus asin makapagdadara nin bendisyon paagi sa paghiras sa sainda kan maogmang bareta. (Mat. 19:14, 15) Magin positibo asin tawan nin angay na patotoo an mga aki, na naglalaom na sinda man magin mga paraomaw ki Jehova.