Magpuka sa “Panahon kan Katapusan”
“Magbantay kamo, magpuka kamo, huli ta dai nindo aram kun noarin an itinalaan na panahon.”—MARCOS 13:33.
1. Ano an maninigo niatong igawe mantang nangyayari an makaoogmang mga pangyayari sa “panahon [na ini] kan katapusan”?
MANTANG nangyayari an makaoogmang mga pangyayari sa “panahon [na ini] kan katapusan,” ano an maninigong igawe nin mga Kristiano? (Daniel 12:4) Dai sinda pinabayaan na magduwaduwa. Isinabi ni Jesu-Cristo an hula na igwa kan may dakol na kabtang na tanda na naootob sa ika-20 siglong ini. Ihinula nia an dakol na kabtang na nagtanda sa panahon na ini poon 1914 bilang pambihira. Mantang aram an hula ni Daniel manongod sa “panahon kan katapusan,” sinundan ni Jesus an saiyang dakulang hula nin pagsadol sa saiyang mga disipulo na “magpuka kamo.”—Lucas 21:36.
2. Taano ta dakula an pangangaipo na magpuka sa espirituwal?
2 Taano ta dapat na magpuka? Huli ta ini an pinakapeligrosong panahon sa kasaysayan nin tawo. Magigin kapahapahamak kun an mga Kristiano padaog sa espirituwal na pagtungka sa panahon na ini. Kun kita magin indiperente o togotan na an satong puso magabatan kan mga kahaditan sa buhay, kita mamumugtak sa peligro. Sa Lucas 21:34, 35, pinatanidan kita ni Jesu-Cristo: “Mag-ingat kamo sa saindo man sana na an saindong mga puso dai manganaan nin kapasloan asin nin kaburatan asin mga paghadit sa buhay, asin sa panale an aldaw na iyan mag-abot sa saindo na siring sa sarong siod. Huli ta madatong iyan sa gabos na nag-eerok sa ibabaw kan bilog na daga.”
3, 4. (a) Ano an boot sabihon ni Jesus sa pagsabi na an aldaw nin kabangisan nin Dios biglang maabot sa mga tawo “siring sa sarong siod”? (b) Mantang bakong an Dios an nagbubugtak kan siod, taano an aldaw na iyan ta dai linalaoman na maabot sa mga tawo sa pankagabsan?
3 May marahay na dahelan na sinabi ni Jesus na an aldaw ni Jehova ‘maabot sa sato na siring sa sarong siod.’ An siod parateng may silaod, asin iyan ginagamit sa pagdakop sa mga gamgam asin hayop. An siod may kiblitan, asin an siisay man na lumaog dian nakikiblit an kiblitan. Dangan minasirra an siod, asin nadakop na an biktima. Ini gabos bigla sanang nangyayari. Sa kaagid na paagi, sabi ni Jesus, an mga dai naghihiro sa espirituwal mabibigla asin aabotan kan “aldaw nin kabangisan” nin Dios.—Talinhaga 11:4.
4 Si Jehova Dios daw an nagbubugtak nin siod sa mga tawo? Bako, dai sia naghahalat na madakop an mga tawo tanganing laglagon sinda. Pero aabotan kan aldaw na iyan an mga tawo sa pankagabsan ta dai ninda tinatawan nin pangenot na konsiderasyon an Kahadean nin Dios. Basta nagpapadagos sinda sa mga gibo-gibo sa buhay, na dai iniintindi an kahulogan kan mga nangyayari sa palibot ninda. Pero ini dai nakaliliwat sa iskedyul nin Dios. May sadiri siang itinalaan na panahon sa paniningil. Asin, huli sa pagkaherak, dai nia pinababayaan na ignorante an katawohan manongod sa saiyang nagdadangadang na paghokom.—Marcos 13:10.
5, 6. (a) Huli sa nagdadangadang na paghokom, anong mamomoton na probisyon an ginibo kan Kaglalang para sa mga tawong linalang, alagad may anong pankagabsan na resulta? (b) Ano an pag-oolayan tanganing matabangan kitang magpuka?
5 An patienot na pagpatanid na ini mamomoton na probisyon kan dakulang Kaglalang, na interesado sa ikararahay nin mga tawong linalang digdi sa saiyang simbolikong tongtongan. (Isaias 66:1) Mahal nia an mga nag-eerok sa lugar na namumugtakan kan saiyang mga bitis. Kaya paagi sa saiyang daganon na mga embahador asin sugo, pinatatanidan nia sinda manongod sa mga mangyayari sa maabot. (2 Corinto 5:20) Pero, sa ibong kan gabos na patanid, an mga pangyayaring iyan maabot sa pamilya nin tawo na dai linalaoman arog kun sinda nakatongtong nin siod. Taano? Huli ta an kadaklan torog sa espirituwal. (1 Tesalonica 5:6) Pipira sana an nagdadangog sa patanid asin makaliligtas pasiring sa bagong kinaban nin Dios.—Mateo 7:13, 14.
6 Kun siring, paano kita makapagdadanay na puka sa panahon na ini kan katapusan tangani kitang mapabilang sa mga makaliligtas? Itinatao ni Jehova an kinakaipuhan na tabang. Helingon niato an pitong bagay na magigibo niato.
Labanan an Disturbo
7. Anong patanid manongod sa disturbo an itinao ni Jesus?
7 Enot, kaipuhan niatong labanan an disturbo. Sa Mateo 24:42, 44, si Jesus nagsabi: “Kaya magpuka kamo, huli ta dai nindo aram kun sa anong aldaw madatong an saindong Kagurangnan. Huli kaini kamo man magin andam, huli ta sa oras na dai nindo pinaghohona, an Aki nin tawo madatong.” An pananaram na ginamit digdi ni Jesus nagpaparisa na sa delikadong panahon na ini, dakol an magigin disturbo, asin an disturbo puwedeng magbunga nin kalaglagan. Kan aldaw ni Noe kadakol kan pinagsisibotan nin mga tawo. Bilang resulta, an nadisturbong mga tawo ‘dai nagmangno’ sa nangyayari, asin iinanod sinda gabos kan Baha. Kaya, si Jesus nagpatanid: “Siring man an presensia kan Aki nin tawo.”—Mateo 24:37-39.
8, 9. (a) Paano an ordinaryong mga gibo-gibo sa buhay peligrosong makadisturbo sato? (b) Anong mga patanid an itinao sato ni Pablo asin ni Jesus?
8 Girumdomon man na sa saiyang patanid sa Lucas 21:34, 35, an sinasabi ni Jesus ordinaryong mga bagay sa buhay, arog kan pagkakan, pag-inom, asin mga kahaditan sa paghahanap-buhay. Iyan mga bagay na ordinaryo sa gabos na tawo, pati sa mga disipulo kan Kagurangnan na Jesus. (Ikomparar an Marcos 6:31.) An mga bagay mismong ini tibaad dai nakararaot, pero kun pababayaan, iyan puwedeng makadisturbo sa sato, makapasibot sa sato, asin sa siring makapukaw nin peligrosong espirituwal na pagtungka sa sato.
9 Kun siring, dai niato pagpabayaan an pinakamahalagang bagay—an pagkakamit kan pag-oyon nin Dios. Imbes na mabangkag sa ordinaryong mga bagay sa buhay, gamiton sana niato iyan sa limitadong sokol na kaipuhan tanganing mabuhay kita. (Filipos 3:8) Dai kaiyan maninigong halean nin lugar an intereses kan Kahadean. Arog kan sabi kan Roma 14:17, “an kahadean nin Dios bakong pagkakan asin pag-inom, kundi nangangahulogan nin katanosan asin katoninongan patin kaogmahan na may banal na espiritu.” Girumdoma an mga tataramon ni Jesus kan sia magsabi: “Kaya padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” (Mateo 6:33) Saro pa, sa Lucas 9:62, si Jesus nagsabi: “Mayo nin siisay man na nagkapot sa arado asin nagsalingoy sa mga bagay na nasa hudian na magkakanigo sa kahadean nin Dios.”
10. Ano an peligro kun dai niato papagdanayon an satong mata na diretso an heling sa pasohan?
10 Oras na kita pumoon sa pag-arado, sa piguratibong pagtaram, dapat na magdanay kitang diretso. An paraarado na minasalingoy dai makapadidiretso nin agi. Sia nadidisturbo asin madaling malingling o mapapondo nin nagkapirang olang. Dai niato pag-arogon an agom ni Lot, na nagsalingoy asin nungka na nakaligtas. Kaipuhan na papagdanayon niato an satong mata na diretso an heling sa pasohan. Tanganing magibo iyan kaipuhan na labanan niato an disturbo.—Genesis 19:17, 26; Lucas 17:32.
Mamibi nin Odok Nanggad
11. Ano an idinoon ni Jesus pakapatanidi sato sa peligro nin disturbo?
11 Pero, igwa pa kita nin magigibo tanganing magdanay na puka. An ikaduwang bagay na mahalaga iyo ini: Mamibi nin odok nanggad. Pakapatanidi sato na dai madisturbo kan ordinaryong mga gibo-gibo sa buhay, itinao ni Jesus an hatol na ini: “Kaya magpuka kamo, na sa gabos na panahon nagngangayongayo na magin kamong mapanggana sa pagdulag sa gabos na ining bagay na nakatalagang mangyari, asin sa pagtindog sa atubang kan Aki nin tawo.”—Lucas 21:36.
12. Anong klaseng pamibi an kaipuhan, asin may anong resulta?
12 Kaya, kaipuhan kitang perming magngayongayo manongod sa peligro kan satong kamugtakan asin kan satong pangangaipo na mag-alisto. Kaya dumolok kita sa Dios sa pamibi na may odok na mga pakimaherak. Si Pablo nagsasabi sa Roma 12:12: “Magmaigot sa pamibi.” Asin sa Efeso 6:18, mababasa niato: “Kaiba an gabos na porma nin pamibi asin pagngayongayo padagos kamong mamibi sa gabos na panahon sa espiritu. Asin sa katuyohan na iyan danay na magpuka sa bilog na panahon.” Ini bako sanang pamimibi na garo iyan insidental sanang bagay na daing gayo mahalaga. Namemeligro an mismo niatong pagkabuhay. Kun siring, kaipuhan kitang odok na mag-arang sa banal na tabang. (Ikomparar an Hebreo 5:7.) Sa siring makapagdadanay kita sa lado ni Jehova. Mayo nin mas kapakipakinabang sa pagtabang sato na magibo ini kisa kita ‘magngayongayo sa gabos na panahon.’ Sa siring papagdadanayon kita ni Jehova sa nagbabantay na pagpuka. Kaya napakahalaga nanggad na magpadagos na mamibi!
Magdanay na Dayupot sa Organisasyon nin Dios Asin sa Gibohon Kaiyan
13. Anong klaseng pakikiasosyar an kaipuhan tanganing magdanay na puka?
13 Boot niatong makaligtas sa gabos na bagay na ini na maabot sa kinaban. Boot niatong makatindog sa atubangan kan Aki nin tawo, na inooyonan nia. Sa katuyohan na ini may ikatolong bagay kitang magigibo: Magdanay sa teokratikong organisasyon ni Jehova. Kaipuhan na kita biyong makiasosyar sa organisasyon na iyan asin makikabtang sa mga aktibidad kaiyan. Sa paaging ini daing pagkamalo na ipamimidbid niato an satong sadiri bilang mga Kristiano na nagbabantay.
14, 15. (a) An pakikikabtang sa anong gibohon matabang sato na magdanay na puka? (b) Siisay an madeterminar kun baga tapos na an paghuhulit, asin ano an maninigong magin saboot niato manongod dian? (c) Pakalihis kan dakulang kahorasaan, ano an mamamansayan niato kun salingoyon niato an nagibong paghuhulit kan Kahadean?
14 Konektadong marhay digdi an ikaapat na bagay na makatatabang sato na magpuka. Kaipuhan na kita makabilang sa mga nagpapatanid sa mga tawo manongod sa nagdadangadang na katapusan kan palakaw na ini nin mga bagay. An lubos na katapusan kan daan na palakaw na ini nin mga bagay dai mangyayari sagkod na an “maogmang baretang ini kan kahadean” dai pa ikinahuhulit sa hiwas na katuyohan kan Dios na Makakamhan sa gabos. (Mateo 24:14) An mga Saksi ni Jehova bakong iyo an madeterminar kun noarin tapos na an paghuhulit. Irineserba ni Jehova an diretsong iyan sa saiya man sana. (Marcos 13:32, 33) Pero kita determinado na magmahigos sagkod sa mapupuwede asin sagkod sa kaipuhan sa paghuhulit manongod sa pinakamarahay na gobyerno na makakamtan kan katawohan, an Kahadean nin Dios. An pagputok kan “dakulang kahorasaan” maabot mantang ginigibo pa niato ini. (Mateo 24:21) Sa bilog na panahon na maabot, an mga nakaligtas makasasalingoy asin lubos na makapagpapatotoo na si Jesu-Cristo bakong falsong propeta. (Kapahayagan 19:11) An paghuhulit magigibo sa sokol na labi sa linaoman kan mga nakikakabtang dian.
15 Kaya, sa mahalagang panahon na an gibohon na ini nahaman na sa pagheling nin Dios, posible na mas dakol an nakikakabtang dian kisa ano pa man na nakaaging panahon. Kanigoan nanggad an pagpasalamat niato na kita nakapakikabtang sa makangangalas na gibohon na ini! Sinisierto sato ni apostol Pedro na si Jehova “habo . . . na an siisay man malaglag kundi boot nia na an gabos makapagsolsol.” (2 Pedro 3:9) Kaya, an puwersa aktiba nin Dios na Makakamhan sa gabos mas makosog na naghihiro ngonyan kisa kasuarin pa man, asin an mga Saksi ni Jehova boot na magpadagos sa aktibidad na ini na pinahihiro kan espiritu. Kaya magdanay na dayupot sa organisasyon ni Jehova, asin magmasibot sa ministeryo sa publiko. Ini tabang sa saindong pagdadanay na puka.
Siyasaton an Sadiri
16. Taano ta maninigo niatong siyasaton an satong presenteng espirituwal na kamugtakan?
16 May ikalimang bagay na satuyang magigibo tanganing magdanay na puka. Bilang indibiduwal, maninigo niatong siyasaton an satong presenteng kamugtakan. Ini maninigo ngonyan kisa kasuarin pa man. Kaipuhan na patunayan niato kun kiisay na lado kita desididong nagtitindog. Sa Galacia 6:4, si Pablo nagsabi: “Patunayan nin lambang saro an saiyang gibo.” Siyasaton an sadiri kaoyon sa mga tataramon ni Pablo sa 1 Tesalonica 5:6-8: “Dai kita magkatorog arog kan ginigibo kan iba, kundi magpuka kita asin papagdanayon niato an toltol na pag-iisip. Huli ta an mga natotorog tood na magtorog sa banggi, asin an mga nagbuburat parateng burat sa banggi. Alagad kun para sa sato na manongod sa aldaw, papagdanayon niato an toltol na pag-iisip asin isolog an takop sa daghan na pagtubod asin pagkamoot asin bilang takop sa payo an paglaom sa kaligtasan.”
17. Kun sinisiyasat an sadiri, ano an maninigong mga ihapot niato sa satong sadiri?
17 Kumusta man kita? Kun sinisiyasat niato an satong sadiri sa liwanag kan Kasuratan, naheheling daw niato na kita nagpupuka, na takop sa payo an paglaom sa kaligtasan? Kita daw mga tawo na talagang suminiblag na sa daan na palakaw nin mga bagay asin dai na nag-aako sa mga ideya kaiyan? Kita daw talagang igwa kan espiritu kan bagong kinaban nin Dios? Biyo daw kitang mata sa kun pasaen an palakaw na ini? Kun iyo, dai kita aabotan kan aldaw ni Jehova na garo kita mga parahabon.—1 Tesalonica 5:4.
18. Ano pang mga hapot an tibaad kaipuhan niatong ihapot sa satong sadiri, asin may anong resulta?
18 Pero ano kun ipaheling kan satong pagsiyasat sa sadiri na kita naghihingoang makaestablisar nin magayon, trangkilo, maginhawa, libyanong pamumuhay? Ano kun madiskobre niato na an satong espirituwal na mata magabat huli sa pagtungka asin pagtorog? Kita daw garo nangangatorogan, na pinag-aaabot an sarong kinabanon na pangarap? Kun iyo, magmata na kita!—1 Corinto 15:34.
Horophoropon an Naotob Nang mga Hula
19. Ano an pira sa mga hula na naheling niatong naotob?
19 Nag-abot na kita sa ikaanom na bagay na makatatabang sato na magdanay na puka: Horophoropon an dakol na hula na naotob sa panahon na ini kan katapusan. Nalihisan na niato an ika-77 taon poon kan matapos an itinalaan na panahon kan mga nasyon kan 1914. Sa pagsalingoy niato sa labing tres-kuwarto nin sarong siglo, maheheling niato kun paano naotob an sunod-sunod na hula—an pagbabalik kan tunay na pagsamba; an pagkalda sa linahidan na natatada, kaiba an saindang kairiba, pasiring sa espirituwal na paraiso; an paghuhulit kan maogmang bareta kan Kahadean sa bilog na globo; an paglataw kan dakulang kadaklan. (Isaias 2:2, 3; kapitulo 35; Zacarias 8:23; Mateo 24:14; Kapahayagan 7:9) Napamuraway an dakulang ngaran asin unibersal na soberaniya ni Jehova, saka an sadit nagin sangribo asin an sadangoton nagin makosog na nasyon, na pinarikas ni Jehova sa kapanahonan kaiyan. (Isaias 60:22; Ezequiel 38:23) Asin an mga bisyon ni apostol Juan sa Kapahayagan harani na ngonyan sa kulminasyon kaiyan.
20. Ano an marigon na pagtubod kan mga Saksi ni Jehova, asin sinda nagin ano sa aktuwal?
20 Kun siring, orog kisa kasuarin pa man, an mga Saksi ni Jehova marigon na kombensido na tama an saindang pakasabot sa kahulogan kan mga nangyayari sa kinaban poon kan 1914. Mantang igwa kan siring na marigon na pagtubod, sinda nagin instrumento sa kamot kan Kaharohalangkaweng Dios. Sinda an isinugo na magtao kan banal na mensahe sa mahalagang panahon na ini. (Roma 10:15, 18) Iyo, an mga tataramon ni Jehova para sa panahon kan katapusan naotob. (Isaias 55:11) Ini man maninigong magpahiro sato na magpadagos sagkod na maheling niato an ultimong kaotoban kan gabos na panuga nin Dios paagi ki Jesu-Cristo.
An Kaligtasan Mas Harani Kisa kan Kita Tumubod
21. Ano an ikapitong tabang sato sa pagdadanay na puka sa espirituwal?
21 Ultimo, an ikapitong tabang sa satong pagdadanay na puka: Perming girumdomon na an satong kaligtasan mas harani kisa kan kita enot na tumubod. Mas mahalaga, an pagkabindikar kan unibersal na soberaniya ni Jehova asin an pagpakangbanal sa saiyang ngaran mas harani naman. Kaya an pangangaipong magdanay na puka mas mahalaga kisa kasuarin man. Si apostol Pablo nagsurat: “Kamo nakaaaram kan panahon, na oras na para sa saindo na magmata sa pagkatorog, huli ta ngonyan an satong kaligtasan orog na harani kisa kan kita magturubod. An banggi makaaagi na; an aldaw naghaharani na.”—Roma 13:11, 12.
22. Paano kita maninigong maapektaran kan kaharanihan kan satong kaligtasan?
22 Mantang haranihon na an satong kaligtasan, dapat kitang magpuka! Dai niato dapat na togotan an ano man na personal o kinabanon na intereses na magin mas magabat kisa satong pag-apresyar sa ginigibo ni Jehova para sa saiyang banwaan sa panahon na ini kan katapusan. (Daniel 12:3) Kaipuhan kitang magpaheling nin orog na pagkadesidido kisa kasuarin man tanganing dai kita mapahale sa dalan na malinaw na itinotokdo sa sato kan Tataramon nin Dios. (Mateo 13:22) Malinaw na ipinaheheling kan ebidensia na an kinaban na ini nasa huring mga aldaw na. Dai na mahahaloy iyan paparaon sagkod lamang tanganing magtao nin lugar sa bagong kinaban nin katanosan.—2 Pedro 3:13.
23. Sa anong paagi kita tatabangan ni Jehova, asin may anong mapalad na resulta?
23 Kun siring, magdanay kitang puka. Orog kisa kasuarin man, mag-alisto sa kun saen na kita sa dalagan nin panahon. Girumdoma, si Jehova nungka na totorogan an bagay na ini. Imbes, permi nia kitang tatabangan sa pagdadanay na puka sa panahon na ini kan katapusan. An banggi makaaagi na. An aldaw naghaharani na. Kaya magpuka! Sa madali na maeeksperyensiahan niato an aldaw na pinakamagayon sa gabos, mantang inootob kan Mesiyanikong Kahadean an katuyohan ni Jehova sa daga!—Kapahayagan 21:4, 5.
Ano an Simbag Nindo?
◻ Ano an boot sabihon ni Jesus kan sia magsabi na an aldaw nin kabangisan nin Dios maabot sa mga tawo “siring sa sarong siod”?
◻ Taano ta dapat niatong labanan an disturbo, asin paano niato iyan magigibo?
◻ Anong klaseng pamibi an kaipuhan tanganing magdanay na puka?
◻ Anong klaseng pakikiasosyar an kaipuhan?
◻ Taano ta dapat niatong siyasaton an satong espirituwal na kamugtakan?
◻ Ano an kabtang kan hula sa satong pagdadanay na puka?