Kita daw Nagdadanay na Puka—Na Linilikayan an mga Nakalilingling?
1 Sa Lucas 21:36, si Jesus nagtao nin sarong patanid: “Magpuka kamo, . . . na magin kamong mapanggana sa pagdulag” sa mga kalamidad na siertong madatong. Kapahamakan an naghahalat sa mga napadadara sa pagtungka sa espirituwal. Sinambit ni Jesus an pagkakan, pag-inom, asin an mga kahaditan sa aroaldaw na pamumuhay. Taano? Huli ta maski an mga bagay na ini puedeng magin mga nakalilingling, asin magcausa nin peligrosong pagtungka sa espirituwal.
2 Usong mga Nakalilingling: An nagkapira nagin sibot-sibot sa sobrang pag-aling-aling, na nagigin mga adikto pa ngani sa TV. Siempre, an paghanap nguna kan Kahadean dai nangangahulogan na dapat niatong likayan an gabos na klase nin pag-aling-aling. Kun kita magin katamtaman sana, an pag-aling-aling puedeng magin kapakipakinabang. (Ikomparar an 1 Timoteo 4:8.) Alagad iyan nakalilingling kun magin nang dakulang bagay sa satong buhay, na iniinaan an satong panahon, paragastos, o an satong kabtang sa paghuhulit kan Kahadean.
3 An saro pang usong nakalilingling iyo an pagmawot nin dai kinakaipuhan na materyal na mga bagay. An nagkapira nalingawan an espirituwal na mga pasohan paagi sa pagkabangkag sa pagkua nin materyal na mga rogaring tanganing magkamit nin mas maginhawang pamumuhay. Mantang kita nangangaipo nin “kakanon asin gubing,” maninigong magmaan kita tumang sa pakapatalubo nin pagkamoot sa kuarta. (1 Tim. 6:8-10) Paagi sa dai ta pakapagpadanay sa satong mga mata na nakasentro sa intereses kan Kahadean, puede kitang magin pabaya sa pag-asikaso sa espirituwal na mga pangangaipo kan satong pamilya asin dai ta magibo an satong ministeryo.—1 Tim. 5:8; 2 Tim. 4:5.
4 Pero an iba tinotogotan pa an saindang ‘mga puso na manganaan nin mga paghadit sa buhay.’ (Luc. 21:34) Kun beses, an paghadit namamatean huli sa mga problema sa salud o pamilya. Alagad an siring na personal na mga kahaditan dai maninigong togotan na inaan an satong pakamangno sa marikas nang nagdadangadang na katapusan kan palakaw na ini nin mga bagay.—Mar. 13:33.
5 Dai nin orog na makapaoogma sa Diablo kisa sa pakapanggana na madara kita sa pagkatungka. Aram ta na “an aldaw ni Jehova madatong na kabaing nin parahabon,” kaya mahalaga na “magpuka kita asin papagdanayon niato an toltol na pag-iisip.” (1 Tes. 5:2, 6) Kun marisa niato an mga tanda nin pagtungka sa satong sadiri, apurado na ‘isikwal niato an mga gibo kan kadikloman.’—Roma 13:11-13.
6 Mga Pantabang Tanganing Magdanay Kitang Puka: An pamibi importante. Dapat kitang mamibi nin daing ontok. (1 Tes. 5:17) An pagigin dayupot sa Kristianong kongregasyon ‘makadadagka sato sa pagkamoot asin sa marahay na mga gibo.’ (Heb. 10:24) An marahay na ugale sa pag-adal magpapadanay sa sato na ‘pinakakakan sa mga tataramon kan pagtubod.’ (1 Tim. 4:6) Kun kita matiaga, makakokompiar kita na malilikayan ta an mga nakalilingling, ‘magin puka, asin magin marigon sa pagtubod.’—1 Cor. 16:13.