Maglingkod ki Jehova na Mayong Nakalilingling

¹ “Maogma an banwaan na an Dios iyo si Jehova!” (Sal. 144:15) An mga tataramon daw na ini ni Hadeng David totoo pa sagkod ngonyan, dawa durante kaining maraot na mga aldaw? (Efe. 5:16) Iyo! An mga Kristiano nakanonompong pa giraray nin kagayagayahan sa paglilingkod ki Jehova. An mga bagay bakong perming pasil para sa sato. Si Satanas ginigibohan kita nin mga kasakitan durante kaining “delikadong mga panahon,” alagad ta dai kita nanluluya. (2 Tim. 3:​1, 2) An nagraraot na mga kamugtakan dugang pang patotoo na harani na an panahon na an Kahadean nin Dios paparaon an nalalapang daan na kinaban na ini asin sasalidahan iyan nin sarong malinig na bagong kinaban. (2 Ped. 3:13) An kadikloman sa kinaban na ini dai sinisigbo an laad kan satong maogmang paglaom; imbes, an satong paglaom sa Kahadean nagliliwanag nin orog pa kakinang. Dai daw kamo naoogma na nakapaglilingkod kamo ki Jehova bilang ilaw sa madiklom na kinaban na ini?​—Fil. 2:15.

² Bilang mga indibiduwal, dapat kitang danay na magrisa kun paano kita naglilingkod ki Jehova. Taano? Huli ta si Satanas sarong dakulang Paralingling. An sarong diksionaryo tinatawan nin kahulogan an “malingling” na “gumilid,” “kuanon o ibalyo (siring kan atension nin saro) pasiring sa laen na bagay o sa laen na mga direksion nin durungan,” asin “sutsutan o ribongon paagi sa magkakatumang na emosyon o motibo.” Magpoon kan iholog digdi sa daga, si Satanas nagin mapanggana sa ‘pagdaya’ sa katawohan. Naggagamit sia nin dakol na pakana tanganing irayo an atension nin tawo sa tunay na mga isyu sa satong aldaw. (Kap. 12:9) Minsan ngani an mga Saksi ni Jehova nagmaigot sa paghuhulit kan Kahadean sa laog kan nakaaging sanggatos na taon, pira katawo an nag-aapresyar sa pinakaimportanteng mga isyu sa pagpakangbanal sa ngaran nin Dios asin sa pagbindikar sa saiyang soberaniya paagi sa Kahadean nin Dios? Pipira sana. (1 Juan 5:19) Kun kayang linglingon ni Satanas an binilyon na tawo sa dagang ini, an yaon perming peligro iyo na kaya nia kitang linglingon o kuanon an satong atension tanganing bayaan niato an paglilingkod ki Jehova. Makamomondo, an ibang tugang niato nataranta kan mga panlingling ni Satanas. Tinogotan ninda an saindang isip na madara sa ibang mga direksion. Yaon an gabos na klase nin nakalilingling ngonyan. Horophoropa an nagkapira sana kaiyan.

³ Mga Problema sa Ekonomiya Asin Pagkamoot sa Materyal na mga Bagay: Sa kadaklan na nasyon sa daga, an kadaihan nin trabaho asin halangkaw na presyo nin barakalon nagkacausa nin mga kahaditan. Totoo, dapat kitang magtagama nin kakanon, gubing, asin istaran para sa satong sadiri asin sa satong pamilya. Pero kun totogotan ta an satong sadiri na magin labi-labi an paghadit manongod sa mga kinakaipuhan sa buhay, an mga kahaditan na ini mangingibabaw sa satong kaisipan. An satong pisikal na pagkabuhay puwedeng magin an pinakaimportante sa buhay imbes na an satong pagsuportar sa isyu sa Kahadean. Si apostol Pablo nagsadol manongod digdi sa Hebreo 13:​5, 6. Sinisierto sato ni Jesu-Cristo na idtong mga hinahanap nguna an Kahadean dai kaipuhan na maghadit; itinatao ni Jehova kun ano an talagang kaipuhan niato. (Mat. 6:​25-34) An mga payunir asin iba pang nasa pambilog na panahon na mga lingkod sa bilog na kinaban makapagpapatunay na totoo ini.

⁴ An kinaban ni Satanas pinatatalubo an pagkamoot sa materyal na mga bagay. An pagkaigwa nin dakol na rogaring o pag-iingat kaiyan iyo an nagmomotibar na puwersa sa buhay nin minilyon. An kaparehong mga nakalilingling yaon kan kaaldawan ni Jesus. An sarong mayaman na hoben na poon hinapot si Jesus kun ano an kaipuhan niang gibohon tanganing magmana nin buhay na daing katapusan. Si Jesus nagsimbag: “Kun ika boot na magin sangkap [o, kompleto], pabakalan an saimong mga sadiri asin tawan iyan sa mga dukha asin magkakaigwa ka nin kayamanan sa langit, asin madia sumunod ka sa sako.” (Mat. 19:​16-23) Malinaw na an saiyang dakol na materyal na rogaring nakalingling sa solterong ini sa bilog na pusong paglilingkod sa Dios. An saiyang puso nakasentro sa kayamanan nia. Aram ni Jesus na nakinabang kutana an soltero kun hinale nia sa saiya an mga nakalilingling na ini. Inolang sia kaiyan sa pagigin kompleto sa saiyang debosyon sa Dios. Kumusta man kamo? Nanonompongan daw nindo an saindong sadiri na naggagamit nin mas dakol na oras sa sekular na trabaho tangani sanang mapagdanay an estilo nin buhay na kinatodan nindo? Nakaapektar daw ini sa saindong paglilingkod ki Jehova? An saindo daw na materyal na mga rogaring hinahalean nin lugar an intereses pan-Kahadean? (Mat. 6:24) Puwede daw nindong gibohon na simple an saindong buhay tanganing makadusay nin orog na panahon sa espirituwal na intereses?

⁵ Ordinaryong mga Aktibidad sa Aroaldaw na Buhay: Kun bako kitang maingat, puwede kitang mabangkag sa ordinaryong mga aktibidad sa buhay kaya minapoon kitang pabayaan an espirituwal na mga pinag-aaabot. Girumdoma an mga tawo kan kaaldawan ni Noe. Sibot-sibot sinda sa sosyal na mga aktibidad, pagkakan asin pag-inom, pag-agom asin pagpaagom kan saindang mga aki, kaya dai sinda nagmangno sa nagpapatanid na mensahe ni Noe dapit sa nagdadangadang na Delubyo. Bago ninda narealisar iyan, an Baha nagdatong asin iinanod sinda gabos. An mga nakalilingling nagbunga kan saindang kalaglagan. Si Jesus nagsabi: “Magigin siring man kaiyan an presensia kan Aki nin tawo.” (Mat. 24:​37-39) Iyo nanggad, an kadaklan na tawo ngonyan bangkag na marhay sa saindang buhay na dai na nagtatao nin atension sa nagpapatanid na mensahe na dinadara niato sainda. Nagpapaheling sinda nin grabeng pagkaindeperente sa espirituwal na mga bagay.

⁶ An saindong buhay daw pano-pano nin sosyal na mga aktibidad kaya kakadikit na sanang atension an ikinatatao sa espirituwal na mga bagay? Sa sarong okasyon, si Jesus inimbitaran na magin bisita sa harong ni Marta asin Maria. Si Maria atentong naghinanyog sa sasabihon nia. Sa ibong na kampi, si Marta “nalingling sa pag-asikaso sa dakol na trabaho.” Si Marta nagkaigwa nin dai na maninigong paghadit manongod sa pagigin marahay na parapasakat. Dai nia nasabotan an pangangaipo sa pagtao nin panahon na maghinanyog ki Jesus. Si Jesus maboot na idinoon ki Marta na dai kaipuhan an dakol na andam; an orog na atension maninigong itao sa espirituwal na mga bagay. Kaipuhan daw nindong iaplikar an hatol na iyan? (Luc. 10:​38-42) Si Jesus nagpatanid man na dapat kitang magtao nin atension sa satong sadiri na dai kita magpagutid asin mag-inom nin labi-labi, na nagpapangurol sa satong mga sentido. Sa delikadong panahon na ini sa kasaysayan nin tawo, kaipuhan kitang magin lubos na puka.​—Luc. 21:​34-36.

⁷ Paghanap nin mga Kasingawan: An saro sa pinakadakulang nakalilingling na ginagamit kan Diablo tanganing irayo an atension sa isyu sa Kahadean iyo an paghanap nin kasingawan. An minilyon sa Kakristianohan isinalida sa Dios an kasingawan. Mas gusto nindang naaaling nin dibersion kisa magkaigwa nin seryosong interes sa Tataramon nin Dios. (2 Tim. 3:4) Siyempre, an marahay na aling-alingan asin dibersion mismo bakong sala. Pero an pagpalipas nin labi-labing panahon kada semana sa mga bagay na arog kan telebisyon, sine, video, karawat, sekular na pagbasa, o apisyon tibaad magpatalubo nin madayang puso asin guyodon kita parayo ki Jehova. (Jer. 17:9; Heb. 3:12) Paano iyan puwedeng mangyari? Durante nin Kristianong mga pagtiripon, tibaad manompongan nindo na an saindong isip naglalagawlagaw; tibaad gustohon pa ngani nindo na matapos na an pagtiripon tanganing makabuwelta kamo sa paghanap nin kasingawan. Dai mahaloy, puwedeng manompongan nindo an saindong sadiri na naghahanap nin mga rason na pumirme sa harong imbes na umatender sa mga pagtiripon o maglingkod sa langtad. Ngonyan na an panahon na determinaran nin malinaw kun an mga pinag-aaabot na ini nagin nang nakalilingling sa saindong buhay. (Luc. 8:14) Dai daw puwede na an ibang mahalagang oras na inuubos sa pag-aling-aling orog karahay na gamiton sa espirituwal na pagtalubo?

⁸ Nakauubos nin Oras na Bakong Mahalagang mga Isyu: An iba nababangkag sa mga paghihingoa na resolberan an ordinaryong mga problema sa modernong sosyedad. An mga Kristiano kaipuhan na likayan an mapalabot sa dai matapostapos na mga debate sa kinaban manongod sa mga isyu sosyal o sa daing kamanungdanan na mga pakikilaban kaiyan na itanos an mga inhustisya. (Juan 17:16) Ini gabos kabtang kan pakana ni Satanas na irayo an atension sa hatol kan Biblia asin sa pundamental na katunayan na sasaro sana an panhaloyan na solusyon​—an Kahadean nin Dios. Kun kita nag-agi nin personal na panraraot o inhustisya, dapat kitang mag-ingat tumang sa pagigin labi-labi kaanggot o pagigin benggatibo na nalilingawan ta na kun siisay kita​—mga Saksi ni Jehova. Orog sa gabos, si Jehova an napagkasalaan, asin an saiyang ngaran an dapat niatong pakangbanalon.​—Isa. 43:​10-12; Mat. 6:9.

⁹ Minsan ngani an gabos gustong magpadanay nin marahay na salud, an pagtao nin labi-labing atension sa garo baga daing katapusan na mga teoriya asin remedyong iinaatubang puwedeng papagparapaisipon na sana an saro sa mga bagay-bagay manongod sa salud. Dakol an tawo na nagpapalakop nin kadakol na klase nin kakanon, bolong, asin pagpakarhay sa pisikal asin emosyonal na mga problema, na an kadaklan kaiyan nagkokorontrahan. An ginigibo nin saro manongod sa salud personal na desisyon, pero dai pagtogotan na an saindong panahon asin atension maubos sa siring na mga okupasyon na pinalilipot na kaiyan an saindong kaigotan sa paghuhulit kan Kahadean nin Dios bilang an tunay na remedyo sa mga helang nin katawohan.​—Isa. 33:24; Kap. 21:​3, 4.

¹⁰ Magin Marigon, Dai Natatanyog: Mantang naghaharani an katapusan, dudugangan ni Satanas an saiyang mga paghihingoa na linglingon kamo sa paglilingkod ki Jehova. “Tumangon sia nindo, na marigon sa pagtubod.” (1 Ped. 5:9) Paano? Dapat nindong pakakanon an saindong sadiri kan mga kaisipan nin Dios. (Mat. 4:4) Dai pagtogotan an mga nakalilingling sa kinaban na halean kamo asin an saindong pamilya kan panahon na kaipuhan nindo sa matoninong na paghorophorop sa Tataramon nin Dios. Kun nagkakakan an pamilya, iribang pag-orolayan an nakapakokosog na mga eksperyensia asin iba pang espirituwal na bagay. Sumunod sa dayaday na iskedyul nin personal na pag-adal asin pag-andam para sa mga pagtiripon.

¹¹ Kun may mga kahaditan na nakariribok sa saindong isip, ibugtak an saindong problema ki Jehova sa pamibi. Laomon na sia may pagmakolog saindo. (1 Ped. 5:7) Togoti an katoninongan nin Dios na mag-ingat sa saindong puso asin mga kakayahan nin pag-isip. (Fil. 4:​6, 7) Dai pagtogotan an mga nakalilingling na magpalibog kan saindong espirituwal na pagheling. Papagdanayon si Jehova na perming nasa atubangan nindo, arog kan ginibo ni Jesus. (Gibo 2:25) Papagdanayon an saindong pagheling na nakatorohok sa enotan sa saindong pasohan, arog kan pagdagka sato kan Talinhaga 4:​25-27: “Kun manongod sa saimong mga mata, iyan maninigong magheling sa enotan, iyo, an saimong makinang na mga mata maninigong magheling sa atubangan mo. Husaya an dana kan saimong bitis, asin magin logod marigon an gabos mong dalan. Dai ka magpasikosiko sa too o sa wala.”

¹² Maimbod na atenderan an gabos na pagtiripon, asin disiplinahon an saindong sadiri tangani kamong makatao nin atension sa pagtotokdo gikan sa Tataramon nin Dios. (Heb. 2:1; 10:​24, 25) Asin imbes na hanapon an kasingawan na iinaalok kan hababa an moral na kinaban na ini, gibohon na pasohan nindo na magpadanay nin mabungang ministeryo. Ini an nagtatao nin daing sagkod na kagayagayahan asin satispaksion. (1 Tes. 2:​19, 20) Bilang pangultimo, dai pagtogotan an ano man na bagay o an siisay man na linglingon kamo sa saindong banal na paglilingkod. “Magin kamong marigon, dai natatanyog, na danay na dakol an gigibohon sa gibohon kan Kagurangnan, sa pakaaram na an saindong pagpapagal bakong daing kapakanan dian sa Kagurangnan.”​—1 Cor. 15:58.