‘Magin Andam Kamo’
1 Sa saiyang pambihirang hula mapadapit sa pagtatapos kan sistemang ini nin mga bagay, nagpatanid si Jesus tumang sa pagigin bangkag sa kinabanon na mga kahaditan sa buhay. (Mat. 24:36-39; Luc. 21:34, 35) Mantang puedeng mangyari sa ano man na oras an biglang pag-abot kan dakulang kahorasaan, kaipuhan na himateon niato an konseho ni Jesus: “Magin andam [kamo], huli ta sa oras na dai nindo pinaghohona, an Aki nin tawo madatong.” (Mat. 24:44) Ano an makakatabang sa sato mapadapit digdi?
2 Pakikilaban sa mga Kahaditan Asin Disturbo: An saro sa espirituwal na natatagong mga peligro na dapat tang maanan iyo an “mga kahaditan sa buhay.” (Luc. 21:34) Sa nagkapirang nasyon, depisil an pagkaigwa kan mga pangangaipo sa buhay huli sa kadukhaan, kawaran nin trabaho, asin halangkaw na kantidad nin mga barakalon. Sa ibang kadagaan, ordinaryo na sana an pagkaigwa nin materyal na mga rogaring. Kun materyal na mga bagay na sana an pinagpaparaisip niato, kita namemeligrong mawaran kan satong pagkonsentrar sa mga bagay na tunay dapit sa Kahadean. (Mat. 6:19-24, 31-33) Tinatabangan kita kan Kristianong mga pagtiripon na mapagdanay an pagkonsentrar na iyan. Ginigibo daw nindong pasohan na atenderan an gabos na pagtiripon?—Heb. 10:24, 25.
3 An kinaban ngonyan pano nin disturbo na pasil sanang agawon sa sato an mahalagang marhay na panahon. An paggamit nin komputer puedeng magin siod kun an saro naggagamit nin ngana-nganang oras sa Internet, pagbasa asin pagpadara nin E-mail, o pagkawat sa komputer. Dai mabilang na oras an puedeng mawara sa pagdalan nin telebisyon, mga pelikula, mga apisyon, pagbasa nin sekular na materyales, asin mga isport, kaya kadikit na sanang oras o kosog an natatada sa sato para sa espirituwal na mga aktibidad. Minsan ngani nakapagtatao nin temporaryong pagparepresko an pag-aling-aling asin pagpaharohayahay, nagbubunga nin daing katapusan na mga pakinabang an personal asin pampamilyang pag-adal sa Biblia. (1 Tim. 4:7, 8) Tinutubos daw nindo an panahon tangani na maghorophorop sa Tataramon nin Dios aroaldaw?—Efe. 5:15-17.
4 Kanigoan an pasasalamat niato na nag-areglo an organisasyon ni Jehova nin sarong programa nin espirituwal na pagtotokdo na matabang sa sato na magin “mapanggana sa pagdulag sa gabos na . . . bagay na nakatalagang mangyari, asin sa pagtindog sa atubangan kan Aki nin tawo”! (Luc. 21:36) Logod na lubos niatong aprobetsaran an mga probisyon na ini asin ‘magin andam kita’ tanganing an satong pagtubod magin “dahelan nin pag-omaw asin kamurawayan patin onra sa pagkahayag ni Jesu-Cristo.”—1 Ped. 1:7.