Danay na Omawon si Jehova
1 May nagkapirang aktibidad na mahalagang gayo sa sato kaya angay na an mga iyan danay na tawan niato nin atension. Iyan pagkakan, paghangos, asin pagtorog. Si apostol Pablo ibinugtak an pagbalangibog kan maogmang bareta sa kaparehong kategoriya kan sia magdagka: “Danay kitang magdolot sa Dios nin atang nin pag-omaw.” (Heb. 13:15) Kaya an pag-omaw ki Jehova bagay na maninigo niatong hingoahon na gibohon kada aldaw.
2 Si Jesus nagsabi: “Kaipuhan na ipahayag ko an maogmang bareta kan kahadean nin Dios.” (Luc. 4:43) Durante kan saiyang tolo may kabangang taon na ministeryo, an gabos niang ginibo kada aldaw direktang may koneksion sa pirang paagi sa pagpamuraway sa Dios. Arog man kaini an namatean ni Pablo. Mangnoha an 1 Corinto 9:16: “Herak man sa sako kun dai ako maghulit kan maogmang bareta!” An iba pang maimbod na Kristiano dinagka na danay na magin andam na idepensa an saindang paglaom sa iba. (1 Ped. 3:15) Ngonyan an maigot na mga payunir asin parahayag sa kongregasyon nagmamaigot na arogon an siring karahay na mga halimbawa.
3 Kun hinohorophorop niato an kaigotan ni Jesus, napahihiro kitang sunodon nin maingat an saiyang mga lakad. (1 Ped. 2:21) Paano niato maaaprobetsaran sa aroaldaw an mga oportunidad na omawon si Jehova kun kita igwa nin pambilog na panahon na sekular na trabaho? Kumusta man an mga obligasyon sa pamilya na dakol na panahon an hinahagad sa sato? An kadaklan na hoben sibot sa kinakaipuhan na pag-eskuela. An iba tibaad maghonang imposible na aktibong omawon si Jehova kada aldaw. An iba tibaad pinalihis an bilog na bulan na dai man lamang ihiniras an maogmang bareta.
4 Si Jeremias saro na dai puedeng sumilensio. Kan sa halipot na panahon sia dai nakapahayag sa ngaran ni Jehova, sia nakamate nin dai matios na kalayo na naglalaad sa laog nia. (Jer. 20:9) Dawa ngani sia igwa nin mga problema, si Jeremias danay na nakanompong nin mga paagi na itaram an mensahe ni Jehova sa iba. Maaarog daw niato an saiyang halimbawa asin makagigibo nin mga oportunidad na omawon an satong Kaglalang kada aldaw?
5 An satong pakikipag-olay manongod ki Jehova dai maninigong limitado sana sa pormal, patienot na iinareglong mga panahon sa pagpapatotoo kaiba kan ibang parahayag sa teritoryo kan kongregasyon. An kaipuhan sana niato naghihimateng talinga. Nakanonompong kita nin mga tawo aroaldaw—sinda minaabot sa satong harong, kita nagtatrabaho kaiba ninda, o nakakasakay ta sinda sa auto. An kaipuhan sana niato sarong makikatood na pataratara asin sarong nakapupukaw sa isip na hapot o komento na poponan nin pag-orolay. Nanompongan nin dakol na ini an pinakamabungang paagi nin pagpapatotoo. Kun kadakol an satong oportunidad na makipag-olay sa iba manongod sa maogmang bareta, imposibleng mapalihis niato an bilog na bulan na dai nakapagpatotoo sa Kahadean.
6 An pribilehiong omawon si Jehova nungkang maontok, siring sa sinabi kan salmista sa Salmo 150:6. Kun an satuyang puso pinahihiro kitang danay na gibohon iyan, aaprobetsaran niato aroaldaw an mga oportunidad na magtaram manongod ki Jehova asin sa saiyang Tataramon.