Balikan an Gabos na Nagpaheling nin Interes Tanganing Makinabang an Iba
1 Kun may saro na magpaheling nin minsan kadikit na interes sa mensahe kan Kahadean, boot niatong gibohon an satong makakaya na pakinabangon an tawong iyan. Kaya kita minadalaw liwat sa katuyohan na kultibaron an interes kan tawo asin ponan an pag-adal sa Biblia sa harong. Paano ini magigibo?
2 Kun an saindong nakaaging pag-orolay manongod sa lakop na mga problema sa pag-agoman ngonyan asin ikinawalat nindo an librong “Mabuhay Sagkod Lamang,” puede nindong ponan an saindong pag-orolay sa paaging ini:
◼ “Kan nakaagi, nag-olay kita manongod sa pag-agoman asin praktikal na hatol kan Biblia na makatatabang sato na makanompong nin orog na kaogmahan. Bako daw na totoo na minsan sa pinakamarahay na mga pamilya, an mga problema minalataw sa panapanahon? [Pasimbagon.] An Biblia nagtatao sato nin ekselenteng hatol na makatatabang sato na resolberan an mga problema sa pampamilyang mga relasyon. An pamilya puedeng makaako nin bendisyon paagi sa iribang pag-adal sa Biblia.” Buksan an pahina 246, parapo 23. Basahon an Juan 17:3, asin ialok an saindong tabang sa pamilya na maponan an pag-adal sa Biblia.
3 Kun kamo nag-olay manongod sa mga aki asin sa saindang pangangaipo nin pagsasanay, puede nindong ipadagos an orolay sa paaging ini:
◼ “Kan nakaagi nag-olay kita manongod sa espirituwal na pagsasanay na kaipuhan kan mga aki asin kun paano sinda matatabangan kan mga magurang. Dakol na magurang an nahahadit na marhay manongod sa maraot na gawe kan kadakol na hoben ngonyan. Ano an paghona nindo manongod sa . . . ? [Magsambit nin halimbawa nin salang paggawe nin hoben na parateng naoobserbaran sa saindong komunidad. Pasimbagon.] Togoti akong ipaheling sa saindo an nagkapirang praktikal na hatol na itinao kan Biblia.” Buksan an parapo 22 sa pahina 246 sa librong Mabuhay Sagkod Lamang, basahon an Efeso 6:4. An kadaklan na aki nagmamawot nin disiplina asin paggiya. Kun itinatao iyan kan mga magurang, mas maogma asin magalang an mga aki. Ipaliwanag kun paano kita nag-aadal sa Biblia kaiba kan satong mga aki.
4 Kun an tema kan saindong pag-orolay Paraiso sa daga, dangan puede nindong sabihon ini tanganing pukawon liwat an interes:
◼ “Namasdan niato an nagkapirang ilustrasyon na nagpaheling sato kan magigin kamugtakan kan daga kun iyan gibohon nang paraiso nin Dios. Iyan bakong gayong makahulogan sa sato kun dai ta makakamtan iyan kaiba kan satong mga namomotan sa buhay. Dai daw kamo maoyon?” [Pasimbagon.] Buksan an pahina 162 sa librong Mabuhay Sagkod Lamang. Basahon an Kapahayagan 21:3, 4, asin ipaliwanag kun paano niato puedeng perming makaiba an satong mga namomotan. Kun marahay an reaksion, basahon an Juan 5:28, 29 tanganing ipaheling na an mga gadan mabubuhay liwat. Itokdo an tutob kan libro asin magsabi: “Iyan talagang totoo—puede kitang mabuhay sagkod lamang sa Paraiso digdi sa daga!” Iareglo an pagdalaw liwat.
5 An katuyohan kan pagdalaw liwat iyo na tabangan an mga interesado na makinabang sa mensahe kan Kahadean. Darahon an saindang atension sa espisipikong mga punto sa literatura na may praktikal na halaga, na idinodoon kun paano iyan makatatabang sa sainda na orog na masabotan an Biblia. An mga pagdalaw liwat na nakaaabot sa pasohan na ini matabang sa iba na pakinabangon an saindang sadiri sa pinakamarahay na paaging mahihimo.