Mamomoton na Tabangan an mga Nagpapaheling nin Interes
1 Kan giyahan kan anghel ni Jehova pasiring sa sarong Etiope na nagpaheling nin sinserong interes sa Tataramon nin Dios, mamomoton na tinabangan sia ni Felipe na masabotan an saiyang binabasa. (Gibo 8:26-39) Naggigibo daw kita nin espesyal na paghihingoa na tabangan an mga nagpapaheling nin interes? Ano an puwede niatong gibohon tanganing tabangan sinda?
2 Mag-iskedyul nin panahon kada semana para sa paggibo nin mga pagdalaw liwat. Ipadagos an mga puntong pinag-olayan kan enot nindong pagdalaw. Isaisip an pasohan na makapoon nin pag-adal sa Biblia. Regular na dumalaw liwat sa pag-alok kan pinakahuring mga luwas kan mga magasin. Kun manompongan an interes, puwede kamong mag-alok nin mga suskripsion.
3 Kun ipinakipag-olay nindo an halaga kan Biblia kan enot nindong pagdalaw, puwede nindong ipadagos an pag-orolay na ginagamit an sarong suhestion sa pahina 66 kan librong “Reasoning” asin magsabi:
◼ “An iba naghohona na an sadol kan Biblia bakong praktikal sa satong modernong kinaban. Ano an saboot nindo dapit kaiyan? [Pasimbagon.] Dai daw kamo maoyon na praktikal an sarong libro na nagtatao nin sadol kun paano magkakaigwa nin maogmang buhay pampamilya? [Pakomentohon.] An mga pamilya na nag-aaplikar kan sinasabi kan Biblia sa pangenot marigon asin maogma.” Basahon an Colosas 3:18-21.
4 Puwede nindong ponan an pag-orolay manongod sa kamugtakan kan mga gadan paagi kaini:
◼ “Ano sa paghona nindo an nangyayari sa sato kun kita magadan? [Pasimbagon.] An kadaklan na relihiyon nagtotokdo na padagos kitang nag-eeksister sa iba pang porma. Dakol an nagngalas sa pakanood kan sinasabi kan Biblia dapit sa bagay na ini. [Basahon an Eclesiastes 9:5.] Mantang an mga gadan mayo nang pakaaram, dai sinda nalingawan na. Nanuga an Dios na ibabalik sinda sa buhay sa pamamahala kan saiyang Kahadean.” Buksan an Oktubre 15, 1994 Torrengbantayan o an pahina 162 kan librong Mabuhay Sagkod Lamang, asin pag-olayan an mga teksto asin ilustrasyon. Iareglo na mabalik tanganing maponan an pag-adal sa Biblia.
5 Kun mawot nindong magtao nin orog pang paliwanag manongod sa Kristianong punto-de-vista dapit sa guerra sa tahaw kan mga nasyon, puwedeng boot nindong magsabi:
◼ “An iba naniniwala na an pakikilaban iyo an solamenteng paagi na resolberan an mga iriwal. Ano an paghona nindo dapit kaiyan? [Pasimbagon.] Ipinaheheling kan Biblia na boot nin Dios na an mga tawo mamuhay na sararo sa katoninongan. [Basahon an Roma 12:17, 18.] Iyan magigin katunayan sa bilog na kinaban sa pamamahala kan Kahadean nin Dios.” Itokdo sa brochure na An Dios daw Talagang May Pagmakolog sa Sato?, pahina 25-6. Alokon na mabalik kamo tanganing magtao nin orog pang paliwanag sa masunod na panahon.
6 Inadmitir kan kapon na Etiope an saiyang pagkadaing kakayahan sa pagsabot kun mayo nin saro na magiya saiya. (Gibo 8:31) Mamomoton na tinabangan sia ni Felipe. Puwede niatong ikapaheling an satong pagkamoot sa iba paagi sa pagtabang sainda sa kaparehong paagi.