Magpaheling nin Tunay na Pagmakolog sa Gabos na Interes na Nanompongan
1 An mga nasa organisasyon ni Jehova naggigibo na may pagkaapurado. An pambilog na kinaban na pagbalangibog kan Kahadean matatapos sa dai na mahahaloy, na pakatapos kaiyan lalaglagon an gabos na “dai nakamimidbid sa Dios.” (2 Tes. 1:7-9) Sa siring, an tunay na pagmakolog sa buhay nin iba pinahihiro an banwaan ni Jehova na paabotan kan mensahe kan Kahadean an pinakadakol na mapupuede.—Sof. 2:3.
2 Kada bulan, minilyon na oras an ginagamit sa paghanap sa mga boot na makadangog kan “maogmang bareta dapit sa orog karahay.” (Isa. 52:7) Bilang reaksion sa presenteng alok na literatura, dakol na indibiduwal an nag-ako kan An Torrengbantayan asin Awake! o kan brosyur na Ano an Kahagadan sa Sato nin Dios? An tunay na pagmakolog sa mga tawong ini maninigong pahiroon kita na padagos na pataluboon an gabos na interes na nanompongan.—Tal. 3:27.
3 Magkaigwa nin Tamang mga Rekord: Dakol an magigibo paagi sa pagkaigwa nin kompleto asin tamang rekord kan interes na nanompongan. An impormasyon na siring baga kan ngaran asin adres kan kagharong, aldaw asin oras na suminongko kamo, ikinapasakamot na literatura, asin temang pinag-olayan matabang sa saindo na magin mas epektibo kun nagdadalaw liwat. Siring man, kun isusurat nindo an nagkapirang komento kan kagharong sa saindong enot na pag-orolay, puede nindong helingon iyan sa pagpadagos kan saindong pag-orolay sa pagdalaw liwat.
4 Magin Alisto sa Paggibo nin mga Pagdalaw Liwat: Pira sa mga nag-ako sa saindo nin literatura kan nakaaging bulan an dinalaw na nindo liwat? Uminagi na daw an mga semana na mayo nin ano man na dugang pang pakikipag-olay? An tunay na pagmakolog para sa saindang ikararahay maninigong magpahiro sa saindo na bumalik sa pinakamadaling panahon na mapupuede, mas marahay pakalihis nin nagkapirang aldaw, tanganing an pag-orolay presko pa sa isip. Paagi sa pagbalik tolos, puede nindong maprebentaran an mga paghihingoa ni Satanas bago sia ‘dumatong asin agawon an tataramon na itinanom sa sainda.’—Mar. 4:15.
5 Mahalagang Marhay an Pag-andam: An saindong pagigin epektibo sa mga pagdalaw liwat depende sa kun gurano kamo karahay na nag-aandam. An likod na pahina kan Abril 1997 An Satong Ministeryo sa Kahadean nagtatao nin nagkapirang pag-atubang na puedeng gamiton kun iinaalok nindo an mga magasin o an brosyur na Kahagadan. An sunod iyo an pagsaisip nin nagkapirang punto na ikahihiras sa pagbalik nindo. Ano an puedeng sabihon tangani na makultibar an interes? Paano mapoponan an pag-adal sa Biblia? Puede nindong probaran an mga suhestion na ini.
6 Kun ipinagpapadagos an pag-orolay sa kun ano an kaipuhan na gibohon tanganing malinigan an daga asin gibohon iyan na paraiso, puede nindong sabihon:
◼ “Kan nakaagi kong pagdalaw, uminoyon kita na kaipuhan na gibohon an apuradong mga lakdang bago gibohon an daga na sarong matoninong na paraiso. Sa paghona daw nindo igwa nin abilidad an mga tawo na gibohon ini? [Pasimbagon.] Mangnohon tabi kun taano ta kaipuhan na mag-interbenir an Dios sa mga aktibidad nin tawo.” Basahon an Salmo 37:38. Dangan buksan an leksion 5 kan brosyur na Kahagadan, asin gamiton an piniling mga kabtang kan parapo 4-5 tanganing ipaheling kun paano nin Dios ootobon an hulang ini. Ipadagos paagi sa pag-alok nin pag-adal sa Biblia na ginagamit an brosyur.
7 Kun pinag-olayan nindo an Kahadean nin Dios asin ikinapasakamot an brosyur na “Kahagadan” sa enot na pagsongko, kun nagdadalaw liwat puede nindong sabihon ini:
◼ “Kan nag-olay kita kan nakaagi, namidbid niato an Kahadean nin Dios bilang an tunay na gobyerno na mamamahala sa enterong daga. Ipinaheheling kan Biblia na si Cristo Jesus an mamamahala dian. Naheheling daw nindo an mga pakinabang sa pagkaigwa kan klaseng ini nin gobyerno asin namamahala?” Pasimbagon. Buksan an brosyur na Kahagadan sa leksion 6. Ginagamit an mga punto sa parapo 6-7 asin an ilustrasyon sa pahina 13, ipaheling kun ano an gigibohon kan Kahadean nin Dios para sa katawohan. Basahon an Daniel 2:44, asin kun angay, iintrodusir an librong Kaaraman asin ialok an pag-adal sa Biblia.
8 Kun nanompongan nindo an saro na uminoyon na an mga relihion sa kinaban nagcausa nin mga problema sa mga tawo, puede nindong ihapot ini sa pagdalaw liwat:
◼ “Napag-isip-isip na daw nindo kun paano niato maaaraman kun arin na relihion an inooyonan nin Dios? [Pasimbagon.] An brosyur na ini na Ano an Kahagadan sa Sato nin Dios? itinatao an nagpapamidbid na mga tanda kan tunay na relihion.” Buksan sa leksion 13, asin itampok an limang italikong punto sa parapo 3-7. Puede kamong magpadagos paagi sa pagsabing: “Bilang dagdag sa paghanap kan tunay na relihion, dapat niatong aramon an kahagadan nin Dios sa sato bilang indibiduwal.” Basahon an Juan 4:23, 24. Ialok na orog pa ining pag-olayan. Buksan sa leksion 1 kan brosyur, asin idemonstrar kun paano kita nag-aadal.
9 Sa pagbalik nindo tanganing ipadagos an pag-orolay manongod sa kaogmahan kan pamilya, puede nindong sabihon an arog kaini:
◼ “Kan enot kitang magkamidbidan, napag-olayan niato an sekreto sa kaogmahan kan pamilya, na iyo an pag-aplikar kan sadol na makukua sa Biblia. Kun tinatratar an mga pangangaipo nin sarong pamilya sa presenteng panahon, naniniwala daw kamo na an Biblia lihis na sa panahon o napapanahon pa?” Pasimbagon. Iatubang an librong Kaaraman. Buksan sa kapitulo 2, asin basahon an kotasyon sa parapo 13. Ginagamit an mga punto sa parapo 3, ialok an pampamilyang pag-adal sa Biblia.
10 An brosyur na Kahagadan napatunayan na sarong magayon na pantabang sa iba na manodan an mga kahagadan nin Dios. An pagigin halipot asin pagigin malinaw kan mensahe kaiyan, asin an magayon na disenyo kaiyan pinapapasil an pagpoon nin mga pag-adal. Sa pinakamadaling panahon na mapupuede, depende sa interes asin abilidad kan estudyante, puedeng ibalyo an pag-adal sa librong Kaaraman.
11 Aprobetsaran niato an lambang oportunidad na ipaheling an tunay na pagmakolog sa gabos na interesado sa satong teritoryo. Paagi sa pagkaigwa nin tamang mga rekord, pag-andam nin marahay, asin pagbalik tolos ikapaheheling niato an pagkamoot sa kataed na makaaakit sa sainda sa katotoohan.—Mat. 22:39; Gal. 6:10.