Mga Pagdalaw Liwat na Igwa nin Katuyohan
1 Kun minadalaw liwat, hingoahon na gumamit nin teksto na makadadagdag sa kaaraman kan tawo dapit sa tema sa Biblia na napag-olayan nindo kan nakaagi.
2 Kun ikinapasakamot nindo an artikulong “Sarong Kinaban na Mayo nin Guerra—Noarin?” (An Torrengbantayan, Oktubre 1), puede nindong sabihon:
◼ “Paano an magigin buhay sa dagang ini kun mayo na nin mga guerra? [Pasimbagon.] Togoti akong ipaheling saindo an ipinanuga na gigibohon nin Dios.” Basahon an Salmo 37:10, 11. Ipagirumdom sa tawo an itinokdo ni Jesus na ipamibi kan saiyang mga disipulo siring kan nakarekord sa Mateo 6:9, 10. Tabangan siang mangatanosan sa kahulogan kan mga tataramon ni Jesus. Ialok an suskripsion sa An Torrengbantayan o Awake! asin iareglo na mabalik kamo para sa dugang pang pag-orolay.
3 Kun kamo nagbalik liwat para sa dugang pang pag-orolay sa artikulong “Why is Life So Short?” (Awake!, Oktubre 22), puede kamong pumoon sa arog kaining paagi:
◼ “Kan huring pagsongko ko, nag-olay kita manongod sa lawig nin buhay nin tawo. Siring kan siertong narisa nindo sa mga artikulo sa Awake!, an mga sientista nag-oopresir nin kadikit na paglaom na matabangan kitang mabuhay nin labing 70 o 80 taon. Alagad ano an paghona nindo manongod sa mga panuga kan Biblia? [Pasimbagon.] Ipinaheheling kan Biblia na an Dios igwa nin mas marahay na iniisip para sa tawo.” Dangan basahon asin ipaliwanag an Juan 17:3. Sa kamugtakan na ini tibaad puede kamong mag-alok nin pag-adal sa Biblia sa harong o mag-areglo nin saro pang pag-orolay sa Biblia.
4 An saro sa mga pasohan sa mga pagdalaw liwat sa mga napasakamotan nin magasin iyo na makagibo nin ruta sa magasin. An simpleng pag-atubang na siring kaini tibaad magin epektibo:
◼ “Linalaoman ko na nagustohan nindo an artikulo sa Torrengbantayan na iwinalat ko sa saindo na nagpapaliwanag kun taano ta maninigong matakot kita sa Dios. Ngonyan dara ko an sarong artikulo sa magasin na Awake! na naghahapot, ‘Why is Life So Short?’ Magayon na hapot iyan, bako daw?” Puede kamong magpadagos paagi sa pagsabi: “An bantog na mga tataramon ni Jesus sa Juan 3:16 nanunuga nin buhay na daing katapusan.” Dangan ipaliwanag na mabuelta kamo tanganing darahon an masurunod na isyu asin tibaad orog pang ipakipag-olay kun ano an ipinanuga nin Dios sa makinuyog na katawohan. Girumdomon na kada paghatod nindo kan mga magasin, puede kamong magreport nin pagdalaw liwat.
5 An pagpoon nin pag-adal sa Biblia sarong importanteng pasohan sa satong ministeryo. Tibaad nagkapirang beses na kamong nagsongko sa sarong tawo na nag-ako kan mga magasin. Taano ta dai probaran an pagdolok na ini sa sunod nindong pagsongko?:
◼ “Kadakol kan nagkokorontrahan na paniniwala manongod sa kun taano an Dios ta tinotogotan an karatan o kun taano kita ta naggugurang asin nagagadan.” Buksan an saro sa mga publikasyon sa Biblia na pinag-aadalan niato sa temang hinohona nindo na magigin interesado an kagharong, idemonstrar sa halipot kun paano ginigibo an sarong pag-adal.
6 Si Jehova Dios na may katuyohan. Arogon niato sia ngonyan na Oktubre paagi sa paggibo nin mga pagdalaw liwat na igwa nin katuyohan.