Naghuhulit daw Kamo na may Katuyohan?
1 Si Jehova sarong Dios nin katuyohan, asin an saiyang mga gibo may katuyohan. Maninigong siring man kaini an totoo sa sato, espesyalmente kun manongod sa satong ministeryo. Pinagbotan ni Jesus an saiyang mga disipulo na maghulit kan maogmang bareta para sa katuyohan na magpatotoo. (Mat. 24:14) Mantang nagkokontribuwer kita sa kaotoban kan pagboot na ini, maninigo man kitang magin mahigos na magpaoswag kan gabos na interes na ipinaheling. Malinaw ini hale sa dugang pang tataramon ni Jesus sa Mateo 28:19, 20.
2 An mga report sa paglilingkod sa langtad nagpapaheling na an pagdalaw liwat dai ginigibo sa gabos na nag-ako nin literatura. An iba tibaad minaontok, na iniisip na solamenteng an may kakayahan na mga parahayag an kuwalipikadong magdalaw liwat. Minsan siring, bako ining masakit siring sa hinohona kan mga parahayag na ini. Alagad maninigo niatong gibohon an satong mga pagdalaw liwat na may katuyohan.
PAGGIBO NIN MAY KATUYOHAN NA MGA PAGDALAW
3 Kun nakanompong kamo nin interesadong tawo, marahay na magbugtak tolos nin pasisikadan para sa saindong pagdalaw liwat. Paano? Nanompongan nin nagkapira na epektibong walatan an kagharong nin sarong hapot na puwedeng simbagon sa masunod na pagdalaw. An iba nagtatampok nin espisipikong punto sa literaturang ikinawaras ninda na puwedeng pag-olayan sa saindang pagbalik. Siertohon na inotar an ngaran kan kagharong, an temang pinag-olayan, an saiyang reaksion, asin an ano man na literaturang ikinawaras. Dangan, bago an pagdalaw liwat, repasohon an impormasyon na ini asin magtao nin may pamibing kaisipan sa kun ano an saindong sasabihon.
4 Durante kan Oktubre igwa kita nin marahay na oportunidad na mag-alok nin mga suskripsion sa Awake! sa mga dinadalaw liwat. Kadakol na parahayag an nagin mapangganang gayo sa pagkukua nin mga suskripsion sa mga dinadalaw liwat. An nagkapirang nag-ako nin mga magasin sa enot na pagdalaw tibaad nagpaheling na mawot nindang magsuskribe. Dangan may mga tawong tibaad igwa kita nin mga porma para sa Suskripsion na Matatapos Na, mga indibiduwal na satuyang ruta nin magasin, o mga tawo na satuyang inadalan kan nakaagi. An suskripsion puwedeng makatabang sa pagpapano kan saindang espirituwal na pangangaipo.—Mat. 5:3.
5 Kun kamo nagbabalik kun saen ginamit nindo an presenteng Topikong Mapag-oolayan, puwede nindong sabihon: “Kan nakipag-olay ako saindo, napag-olayan niato an manongod sa katoninongan asin seguridad asin kun paanong an mga paghingoa nin tawo garo dai magdadanay. Minsan siring na an Naciones Unidas naghihingako na inootob an Isaias 2:4, napatunayan na dai kaya kaini na gibohon iyan. [Basahon an teksto asin pag-olayan.] Ipinakikipag-olay kan magasin na Awake! sa bulan na ini an mismong puntong ini kun paanong an mga guerra matatapos sa paagi nin Dios.” Dangan ipaheling an isyu nin Oktubre 8 asin ialok an suskripsion, na itinotokdo an espisipikong punto sa magasin.
IISKEDYUL AN MGA PAGDALAW
6 An nagkapira dai nagsasagibo nin mga pagdalaw liwat huli ta dai ninda iniiskedyul an siertong panahon para sa sainda. An mga pagdalaw liwat puwedeng gibohon kun mga banggi, sa mga puro nin semana, o sa iba pang kombenyenteng panahon. Taano ta dai magbugtak nin personal na mga pasohan na magkaigwa nin kisuerra sarong pagdalaw liwat lambang semana? Maghagad nin tabang sa mga orog na may eksperyensia sa gibohon na ini. Dai magduwaduwa na hapoton an saindong konduktor sa pag-adal sa libro para sa mga suhestion.
7 Sinambit ni apostol Pablo kapuwa an pagtatanom asin pagbabaribi may koneksion sa Kristianong ministeryo. (1 Cor. 3:6, 7) Kaya igwa kita nin responsabilidad na dumalaw liwat sa mga indibiduwal na may katuyohan na makapoon nin pag-adal sa Biblia. An satuyang kagayagayahan siertong matalubo kun kita naghuhulit na may katuyohan.