Tabangan an Iba na Pakinabangon an Saindang Sadiri
1 Tinotokdoan kita ni Jehova kan dapat niatong maaraman. An Salmo 32:8 nagsasabi: “Papangyayarihon ko na ika magkaigwa nin pakarorop asin totokdoan taka sa dalan na saimong lalakawan. Magtatao ako nin sadol na nakatorohok sa saimo.” Boot niato na ipaheling sa iba kun paano sinda makikinabang paagi sa paghimate sa madonong na sadol hale sa Biblia. (Isa. 48:17) Ngonyan na Setyembre magigibo ta ini paagi sa pag-alok kan librong Mabuhay Sagkod Lamang. An manlaenlaen na pag-atubang makapaheheling kan praktikal na halaga kan Biblia.
2 Huli sa lakop na mga problema sa pag-agoman ngonyan, puede nindong pilion na itampok an puntong ini hale sa librong “Mabuhay Sagkod Lamang”:
◼ “Dakol ngonyan an nahahadit na marhay manongod sa grabeng pagdakol nin bakong maogmang pag-agoman. Ano an saboot nindo manongod sa problemang ini? [Pasimbagon.] Dai nasasabotan kan dakol an pundamental na mga causa. Kun sinda gumibo nin sinserong paghihingoa, bako sanang mapagdadanay kan mag-agom an saindang pag-agoman kundi makanonompong man sinda nin tunay na kaogmahan. An liabe manonompongan sa Biblia.” Basahon an Efeso 5:28, 29, 33. Buksan an pahina 243, ipakipag-olay an parapo 16 asin 17.
3 An mga aki nangangaipo nin may kualidad na panahon asin pagsasanay kan saindang mga magurang. Sa pagtampok kan librong “Mabuhay Sagkod Lamang,” puede nindong sabihon:
◼ “Kita gabos may pagmakolog manongod sa kapakanan sa ngapit kan satong mga hoben. Sa saindong opinyon, ano an pinakamarahay na paagi na matabangan kan mga magurang an saindang mga aki na makanompong nin seguradong ngapit? [Pasimbagon.] Hinanyoga an talinhagang ini sa Biblia. [Basahon an Talinhaga 22:6.] Tunay nanggad, an saindang pinakamahalagang pagsasanay itinatao sa harong kan saindang mga magurang. Nagkakaipo iyan nin panahon, atension, asin pagkamoot, alagad bawi nanggad an paghihingoa.” Buksan an pahina 245, ipakipag-olay an parapo 20 asin 21, dangan ipaliwanag kun paano magagamit an libro bilang basihan para sa pampamilyang pag-adal sa Biblia.
4 Tibaad boot nindong ialok an librong “Mabuhay Sagkod Lamang” paagi sa pagpaheling kun paano magigin paraiso an daga:
◼ “Segurado ko na kamo nahahadit manongod sa kun paano an magigin buhay nindo sa ngapit. Sa Pamibi kan Kagurangnan, tinokdoan kita ni Jesus na ipamibi na gibohon an kabotan nin Dios sa daga kun paano sa langit. Paano daw an magigin kamugtakan kan daga kun mangyari na iyan? [Pasimbagon.] [Gamiton an ilustrasyon sa pahina 12 asin 13. Basahon an Isaias 11:6-9.] Bako daw na makawiwili na mabuhay sa siring kaiyan na kinaban? Ipinaheheling kan librong ini kun paano kamo asin an saindong pamilya puedeng mabuhay sa arog kaining paraiso.”
5 An patienot na pag-andam kan saindong pag-atubang sarong liabe sa pagdeterminar kan kapangganahan nindo sa pinto. Seguradohon na igwa kamo nin espisipikong sasabihon manongod sa sarong Makakasuratan na punto. Siring man, isaisip an sarong halipot na komento manongod sa sarong interesanteng kabtang kan magasin o tract na pinaplano nindong ialok kun dai akoon an libro. Aprobetsaran an lambang oportunidad na yaon sa saindo na isabwag an mga banhi nin katotoohan dapit sa Kahadean ngonyan na Setyembre. (Ecl. 11:6) Makatatabang kamo sa iba na mag-ani nin mga pakinabang na magdadanay sagkod lamang.