Lubos daw Nindong Ginagamit Iyan?

¹ “Gustong-gusto ko nang gamiton iyan sa langtad!” Iyan an isinurat nin sarong tugang na babae pakabasa kan An Torrengbantayan na Enero-Marso 2008. Naestudyaran na daw nindo an nagkapira sa regular na mga kabtang kan pampublikong edisyon, asin nakahanap na daw kamo nin mga paagi tanganing magamit na marhay iyan sa ministeryo sa langtad?

² “Kun Ano an Manonodan Niato ki Jesus”: Tibaad nakatabang sa saindo an kabtang na ini sa pagpoon nin mga pag-adal sa Biblia. Kun dai pa nindo nagibo iyan, probaran na basahon an titulo kan artikulo sa kagharong dangan ipaheling sa saiya an sinabi ni Jesus manongod sa bagay na iyan, na isinasaysay sa enot na parapo. Kun magpaheling nin interes an kagharong, hingoahon na ipadagos an pag-oolay gamit an mga subtema, na ilinaag bilang mga hapot na nakakapukaw sa isip. Pakomentohon sia dapit sa hapot. Ipaliwanag sa halipot an arin man na konektadong retrato, asin magbalyo sa sunod na parapo. Tibaad makaya nindong pag-olayan an enot na kabanga kan artikulo sa enot na pagdalaw dangan an natadang kabanga sa saindong pagbalik. Magin andam na ipadagos an pag-adal sa librong Itinotokdo kan Biblia.

³ “Mga Paagi Para sa Kaogmahan nin Pamilya”: Katuyohan kan seryeng ini, na nagluluwas kada ikatolong bulan sa The Watchtower, na tabangan an mga agom na lalaki, agom na babae, asin mga magurang na maaraman kun paano iaaplikar an mga prinsipyo sa Biblia kun napapaatubang sa mga problemang nagsasapeligro sa katoninongan kan pamilya. Puede man nindong gamiton an mga artikulong ini tanganing tabangan an mga bakong Saksi na maaraman an kadonongan na makukua sa Biblia.​—2 Tim. 3:16, 17.

⁴ Mga Kabtang Para sa mga Hoben: An seryeng “Para sa mga Hoben” ginibo sa pormang nakakapagpaisip sa nagbabasa asin puedeng gamiton sa pagsiyasat sa sarong espesipikong salaysay sa Biblia. Puede nindong gamiton an mga artikulong ini tanganing tabangan an mga hoben na nanonompongan nindo sa ministeryo na maaraman an praktikal na halaga kan pag-adal sa Tataramon nin Dios. (Sal. 119:9, 105) Kun nakikipag-olay sa mga magurang, puede nindong itampok an seryeng “Tokdoan an Saindong mga Aki,” na nagluluwas kada ikaduwang bulan sa The Watchtower. Matatabangan kan mga artikulong ini an mga aki na makanood nin mahalagang mga leksion sa mga karakter sa Biblia. Hiningoa na daw nindo na basahon an mga artikulong ini kaiba kan saindong mga aki?

⁵ Iba Pang Kabtang: Kada bulan sa The Watchtower, sa kabtang na “Naghahapot an mga Parabasa” igwa nin tinotokar na sarong hapot na posibleng marhay na ihapot nin mga bakong Saksi. Puede nindong itampok an artikulong ini kun nag-aalok nin mga magasin sa harong-harong. Sarong buhay na buhay na report hale mismo sa mga misyonero asin iba pa an kabtang na “Surat Hale sa . . .,” na dian ipinapaheling an mga kadepisilan na inaatubang ninda sa paggibo kan saindang ministeryo. Makakatabang an mga artikulong ini sa interesadong mga tawo na maaraman na an maogmang bareta ihinuhulit na sa bilog na daga, bilang kaotoban kan tanda kan presensia ni Cristo.​—Mat. 24:3, 14.

⁶ An bulanan na kabtang sa The Watchtower na “Rumani sa Dios,” na basado sa babasahon sa Biblia para sa Teokratikong Paadalan sa Pagmiministro, tibaad makapahiro sa sinserong mga tawo na booton na makanood nin orog pa manongod ki Jehova. An seryeng “Arogon an Saindang Pagtubod,” na nagluluwas apat na beses sa sarong taon sa The Watchtower, dinisenyo tanganing tabangan an mga tawo na ikaladawan sa isip an mga salaysay sa Biblia asin gibohon na garo buhay sa presenteng mga parabasa an mga karakter sa Biblia​—an saindang mga pinili, an saindang mga kadepisilan, asin an saindang pagtubod.

⁷ Naoogma nanggad kitang marhay na magresibi kada bulan kan sarong bilog na isyu kan The Watchtower asin kada ikatolong bulan kan bilog na isyu kan An Torrengbantayan na dinisenyo para gamiton sa langtad! Magin nanggad kitang pamilyar na marhay sa laog kaiyan asin lubos na gamiton iyan sa satong ministeryo.