Serye na Makakatabang sa Satong Ministeryo

1. Ano an duwang obheto kan seryeng “Pakikipag-ulay sa Sarong Kagharong”?

¹ Sa pana-panahon, itinatampok sa pampublikong edisyon kan An Torrengbantayan an seryeng “Pakikipag-ulay sa Sarong Kagharong.” An seryeng ini igwa nin duwang obheto—ipresentar sa magayon na paagi an mga itinutukdo kan Bibliya asin ipahiling sa sato kun paano kita puwedeng mangatanusan nin mataktika sa partikular na mga tema. (1 Ped. 3:15) Paano ta epektibong magagamit an mga artikulong ini?

2. Paano ta magagamit an seryeng ini sa satong ministeryo?

² Gamiton Iyan sa Ministeryo: Puwede kamong magsaray nin ekstrang mga kopya kan An Torrengbantayan na igwa kan seryeng ini. Kun an sarong kagharong, interesado, o tinutukduan sa Bibliya magbangon nin hapot o pagkontra na iprinesentar sa saro sa mga artikulo, tawan siya nin kopya kan artikulo asin sabihon na pag-uulayan nindo iyan. Kun mayo kamo nin imprentadong kopya kan magasin na igwa kaiyan, puwede iyan i-download sa jw.org.

3. Paano ta puwedeng ipakipag-ulay sa kagharong an saro sa mga artikulo?

³ Paano nindo puwedeng ipakipag-ulay an saro sa mga artikulo? An ginigibo kan iba ipinapabasa ninda nin makusog sa kaulay an linya kan kagharong, mantang sinda an nagbabasa kan linya kan Saksi. Puwedeng magin epektibo an pamamaaging ini huling tinutugutan kaiyan an indibidwal na masiyasat an satong mga tinutubod sa paagi na dai siya maaalangan.—Deut. 32:2.

4. Paano ta magagamit an mga artikulo sa seryeng ini tanganing sanayon an satong sadiri?

⁴ Sanayon an Sadiri Asin an Iba: Mantang binabasa nindo an mga artikulo, tawan nin atensiyon an mga teksto, ilustrasyon, asin paagi nin pangangatanusan. Mangnuhon an istilo nin pakikipag-ulay. Dangan purbaran iyan sa saindong ministeryo. (Tal. 1:5; 9:9) Sarong sister an nagsabi, “Pag binabasa ko an mga artikulong ini garo man sana ako nakakanuod sa sarong ‘perpektong’ kapartner na payunir—saro na aram pirmi kun ano an tamang sasabihon!”

5. Paano ta matatabangan an satong mga tinutukduan sa Bibliya na mag-andam para sa ministeryo?

⁵ Puwede man nindong gamiton an iprinesentar na mga iskrip tanganing tabangan an saindong mga tinutukduan sa Bibliya na mag-andam para sa ministeryo. Basahon nindo iyan; an tinutukduan sa Bibliya iyo ngaya an parahayag. Sa paaging ini, masasanay sinda na ipaliwanag sa mataktikang paagi an saindang mga tinutubod. (Col. 4:6) Tunay nanggad, an mga artikulong ini saro sa dakul na paagi na tinatabangan kita ni Jehova na lubos na ‘utubon’ an satong ministeryo.—2 Tim. 4:5.