Duwang Sinsilyo na Kadikit an Halaga

An sarong importanteng paagi na makakasuportar kita sa intereses kan Kahadean iyo an pagkontribwir nin kuarta sa pambilog na kinaban na paghuhulit. Paano kun limitado an satong kabuhayan?

Sarong beses, naheling ni Jesus an sarong dukhang babaeng balo na nagkontribwir sa kaha sa templo nin duwang sinsilyo na kadikit an halaga. An pagkamoot ki Jehova an nagpahiro sa babaeng balo na magtao dawa ‘sa saiyang kadaihon, kan gabos na saiya, an gabos niang pagbuhay.’ (Mar. 12:​41-44) Tinawan ini ni Jesus nin atension, na nagpaparisang an kontribusyon kan babaeng balo igwa nin dakulang halaga sa pagheling nin Dios. Kaagid kaiyan, dai minansay kan mga Kristiano kan enot na siglo na an responsabilidad na magtao nin pinansial na suporta para sa ministeryo pribilehio sana kan mayaman na mga Kristiano. Sinambit ni apostol Pablo an halimbawa kan mga taga Macedonia, na sa ibong nin grabe o ‘hararom na kadukhaan, sinda nakimaherak na kanigoan an pagngayongayo’ na magkaigwa kan pribilehiong magtao nin may kabootan.​—2 Cor. 8:​1-4.

Kun siring, kun makakakontribwir sana kita nin duwang sinsilyo na kadikit an halaga, maninigo tang girumdomon na an dakol na saradit na kontribusyon puedeng magin dakulang kantidad kun pagtitiriponon. An pagtao niato nin gikan sa puso makakapaogma sa satong matinaong langitnon na Ama, huling “an Dios namomoot sa maogmang paratao.”​—2 Cor. 9:7.