Hapot
◼ Ano an maninigong isaisip kun gusto tang ipamana sa organisasyon ni Jehova an nagkapira o an gabos niatong pagsadiri pagkagadan niato?
Kun magadan an mga tawo, mayo na sindang kontrol sa materyal na mga rogaring ninda. (Par. 9:5, 6) Kaya, dakol an patienot na nagpapagibo nin testamento o trust na nagsasabi kun paano ninda gustong pagbarangaon an saindang mga pagsadiri. (2 Ha. 20:1) Sa pangkagabsan, an legal na dokumentong ini nagsasabi man kun siisay an pinili nin saro bilang trustee o executor. Sa dakol na nasyon, kun dai ikapreparar an dokumento, an mga autoridad an madeterminar kun paano pagbabarangaon an mga pagsadiri kan nagadan. Sa dahelan na iyan, kun igwa kita nin espesipikong mga kagustohan mapadapit sa satong mga pagsadiri, siring baga kan pagpamana nin nagkapira o kan gabos kaiyan sa organisasyon ni Jehova, mahalagang magpagibo kita nin legal na dokumento na espesipikong nagsasabi kaini asin maingat na pilion niato an magigin trustee o executor.
Magabat an responsabilidad kan trustee o executor. Depende sa kantidad kan kuarta o kadakulaan kan propiedad, an pagtipon asin pagbaranga nia kan mga pagsadiri puedeng mangaipo nin dakol na detalye asin makonsumo nin dakol na panahon. Dugang pa, an sekular na mga autoridad parateng igwa nin mga regulasyon na dapat sunodon. Bakong gabos na miembro kan kongregasyon automatikong magigin marahay na trustee o executor. An pipilion niato maninigo na saro na aram tang may kakayahan, mapagtitiwalaan, asin andam na sunodon an mga kagustohan niato.—Hilingon an artikulong “The Wisdom and Benefits of Estate Planning,” sa isyu nin Awake! na Disyembre 8, 1998.
Kun Pakiolayan Ka na Magin Trustee o Executor: Kun pakiolayan ka na iyo an legal na mag-asikaso kan mga propiedad nin saro pagkagadan kaini, siertohon nguna an gabos na bagay na kalabot asin mapagngayongayong aramon kun kaya mo an responsabilidad na ini. (Luc. 14:28-32) Pagkagadan kan tawong iyan, kaipuhan mong paaramon an gabos na nasambitan bilang benepisyaryo. Dangan kun may autoridad ka nang pagbarangaon an mga pagsadiri, obligasyon mo na gibohon iyan nin oyon sa ley asin eksakto siring sa sinabi sa testamento o trust. Maninigong aram kan trustee o executor na baga man dakol o dikit an propiedad, kaipuhan nanggad na gibohon kun ano an nakasurat sa testamento. An ano man na ipinamana sa sarong legal na asosasyon na ginagamit kan Mga Saksi ni Jehova idinusay na pondo para sa organisasyon ni Jehova.—Luc. 16:10; 21:1-4.