Magpasalamat sa Pagkabukas-palad ni Jehova

BUKAS-PALAD na Diyos si Jehova. (Sant. 1:17) Puon sa madiklom na kalangitan na pano nin bituon sagkod sa berdeng mga tinanom na nakakapatos sa daga, nag-aarawit an mga linalang ni Jehova dapit sa pagkabukas-palad.—Sal. 65:12, 13; 147:7, 8; 148:3, 4.

Dakulaon an pasasalamat kan salmista sa saiyang Kaglalang kaya napahiro siyang magsurat nin awit na nag-uumaw ki Jehova huli sa Saiyang mga ginibo. Basahon an Salmo 104. Arog man daw kaiyan an namamatian mo? Sinabi kan salmista: ‘Mag-aawit ako ki Jehova sa sakong pagkabuhay; mag-aawit ako nin pag-umaw sa sakong Diyos mantang ako nabubuhay.’ (Sal. 104:33) Iyan man daw an gusto mong gibuhon?

PINAKAMARAHAY NA HALIMBAWA NIN PAGKABUKAS-PALAD

Gusto ni Jehova na arugon niyato an saiyang halimbawa nin pagkabukas-palad. Nagtao man siya nin marahay na dahilan kun taano ta dapat kitang magin bukas-palad. Mangnuhon an ipinasabong niya ki apostol Pablo na isurat: ‘Pagbutan mo an mayaman sa kinaban na ini na dai sinda magin mapaabaw-abaw; dai sinda magsarig sa mga bagay na dai malalauman arog baga kan kayamanan, kundi magsarig sa Diyos na matinao sa sato kan gabos na bagay para sa satong kaugmahan. Pagbutan mo sinda na magin marahay, magin mayaman sa marahay na mga gibo, magin matinao saka matinabang. Sa siring na paagi, nagtitipon sinda para sa sadiri ninda nin kayamanan na magigin masarig na pundasyon para sa maabot na panahon, tanganing makamtan ninda an tunay na buhay.’—1 Tim. 6:17-19, An Marahay na Bareta Biblia.

Sa ikaduwang surat ni Pablo sa Corinto, idinuon niya an pagkaigwa nin tamang sabuot pag nagtatao. Sinabi niya: ‘An lambang saro tumao siring sa pinagmawot niya sa saiyang puso; bakong sa maraot na buot, o napipiritan, huli ta an Diyos namumuot sa maugmang paratao.’ (2 Cor. 9:7) Pagkatapos, sinambit ni Pablo an mga nakikinabang sa siring na pagkabukas-palad: an mga natatawan, na napapaniguan an pangangaipo; asin an mga nagtatao, na pinapayaman nin espirituwal na mga bendisyon.—2 Cor. 9:11-14.

Tinapos ni Pablo an kabtang na ini kan saiyang surat paagi sa pagsambit kan pinakamakusog na ebidensiya kan pagkabukas-palad nin Diyos. Isinurat niya: “Salamat sa Diyos sa saiyang dai ikaladawan na daing bayad na balaog.” (2 Cor. 9:15, NW) Malinaw na kaiba sa balaog o regalo ni Jehova an gabos na karahayan na itinao niya sa saiyang banwaan paagi ki Jesu-Cristo. Dakulaon nanggad na regalo ini mala ngani ta dai lubos na ikaladawan an halaga kaiyan.

Paano niyato mapapasalamatan si Jehova asin an saiyang Aki sa gabos na ginibo patin gigibuhon pa ninda para sa sato? An sarong paagi iyo an pagigin bukas-palad ta sa pagtao kan satong panahon, kusog, asin materyal na bagay—dikit man iyan o dakul—tanganing maipalakop an dalisay na pagsamba ki Jehova.—1 Cron. 22:14; 29:3-5; Luc. 21:1-4.

Kun Paano Nagkokontribwir an Iba Para sa Pambilog na Kinaban na Gibuhon

Arog kan panahon ni apostol Pablo, dakul ngunyan an ‘naglalain’ o nagtatagama nin kuwarta para ihulog sa mga kahon nin kontribusyon na may nakasurat na “Worldwide Work.” (1 Cor. 16:2) Kada bulan, ipinapadara kan mga kongregasyon an mga kontribusyon na ini sa opisina kan mga Saksi na nakakasakop sa nasyon ninda. Puwede ka man na direktang magpadara nin donasyon sa sarong legal na korporasyon na ginagamit kan mga Saksi sa nasyon nindo. Para maaraman an ngaran kan panginot na legal na korporasyon kan mga Saksi sa nasyon nindo, kontakon tabi an sangang opisina. An adres kaiyan puwedeng makua sa www.jw.org. An mga klase nin donasyon na puwede mong direktang ipadara iyo an minasunod:

DIREKTANG DONASYON

Donasyon paagi sa electronic bank transfer, debit card, o credit card. Sa ibang sangang opisina, posible man ini gamit an jw.org o iba pang designadong website.
Donasyon na kuwarta, alahas, o iba pang mahalagang personal na pagsadiri. Iiba an sarong surat na nagsasabing an kuwarta o an mga bagay na iyan direktang donasyon.

AREGLO SA KONDISYONAL NA DONASYON

Donasyon na kuwarta na may kondisyon na puwedeng ibalik iyan enkaso kaipuhanon kan nagdonar.
Iiba an sarong surat na nagsasabi na iyan kondisyonal na donasyon.

PLANO PARA SA PAG-ABULOY

Apuwera sa mga regalong kuwarta asin mahalagang personal na pagsadiri, may iba pang paagi nin pagdonar para makatabang sa gibuhon na pang-Kahadian sa bilog na kinaban. Nakalista iyan digdi. Ano man na paagi o mga paagi an gusto mo, kontakon nguna tabi an sangang opisina na nakakasakop sa nasyon nindo para maaraman kun arin diyan an puwede. Huling nagkakalain-lain an legal na kahagadan saka ley sa buhis, mahalagang kumonsulta sa kuwalipikadong mga parakonseho sa buhis asin sa ley bago pumili nin pinakamarahay na paagi nin pagdonar.

Insurance: Donasyon na espesipikong sinasabi an ngaran kan korporasyon kan mga Saksi bilang benepisyaryo nin life insurance policy o retirement/pension plan.

Deposito sa Bangko: Deposito sa bangko, sertipiko nin deposito, o indibidwal na deposito sa pagretiro na ibinugtak sa sarong trust para sa korporasyon kan mga Saksi o ginigibong payable sa korporasyon na iyan pagkagadan kan nagdeposito sigun sa lokal na kahagadan kan bangko.

Stocks Asin Bonds: Idinodonar ini sa korporasyon kan mga Saksi bilang direktang regalo o paagi sa nasusurat na kasunduan na ibabalyo an mga ini pagkagadan kan nagdonar.

Daga Asin Harong: Madaling ikapabakal na daga asin harong na idinodonar sa korporasyon kan mga Saksi, puwedeng paagi sa direktang pagregalo o, kun residensiyal na propyedad, paagi sa pagkaigwa nin kontrata na puwedeng padagos na mag-istar diyan an nagdonar sagkod na siya nabubuhay (life estate).

Gift Annuity: Kuwarta o securities na idinodonar sa korporasyon kan mga Saksi paagi sa sarong kontrata na an nagdonar, o an saro na dinesignaran kan nagdonar, maresibi nin espesipikong annuity payment kada taon sagkod na siya nabubuhay. An buhis sa ginaganar kan nagdonar binabawasan para sa taon na naestablisar an gift annuity.

Testamento Asin Trust: Propyedad o kuwarta na puwedeng ipamana sa korporasyon kan mga Saksi paagi sa sarong legal na testamento o trust agreement na nagsasabing an korporasyon an benepisyaryo kaiyan. An areglong ini puwedeng magtao nin nagkapirang bentaha sa pagbuhis.

Siring kan ipinaparisa kan terminong “plano para sa pag-abuloy,” an mga klaseng ini nin donasyon nangangaipong pagplanuhan kan madonar. Para matabangan an mga indibidwal na gustong magkontribwir sa pambilog na kinaban na gibuhon kan mga Saksi paagi sa sarong klase nin pag-abuloy, may brosyur na Charitable Planning to Benefit Kingdom Service Worldwide sa Ingles asin Kastila. Ginibo ini para magtao nin impormasyon dapit sa lain-lain na paagi nin pagtao nin regalo ngunyan o pag-abot nin panahon, arog nin pagpamana pag nagadan. An impormasyon diyan tibaad bako gabos aplikado sa sitwasyon mo huli sa ley sa saindong nasyon dapit sa buhis o iba pa. Huli kaini, pakabasa kan brosyur, maghapot sa mga kinokonsulta mo dapit sa ley o buhis. Sa paggamit kan siring na mga paagi nin pag-abuloy, dakul an nakatabang sa pagsuportar sa satong relihiyoso saka humanitaryong mga aktibidad sa bilog na kinaban asin lubos na naaprobetsaran an itinataong diskuwento sa buhis. Kun igwa kan brosyur na iyan sa saindong nasyon, puwedeng maghagad nin kopya sa sekretaryo kan kongregasyon nindo.

Para sa dugang pang impormasyon, makikomunikar sa sangang opisina.