“Dakula an Trabaho”

ORAS na kaidto para sa sarong mahalagang marhay na miting sa Jerusalem. Ipinaapod ni Hading David an gabos niyang prinsipe, opisyal kan palasyo, asin makapangyarihan na mga lalaki. Naugma sinda kan madangog an sarong espesyal na paisi. Inawtorisaran ni Jehova an aki ni David na si Solomon na magtugdok nin sarong ekstraordinaryong estruktura na idudusay para sa pagsamba sa tunay na Diyos. Paagi sa pasabong nin Diyos, itinao sa may edad nang hadi kan Israel an arkitektural na plano asin itinao man niya iyan ki Solomon. “Dakula an trabaho,” an sabi ni David, ‘huli ta an papatindugon bakong palasyo para sa tawo kundi sarong templo para sa Diyos [na Jehova].’—1 Cron. 28:1, 2, 6, 11, 12; 29:1, BPV.a

Dangan naghapot si David: ‘Siisay pa an makakatao nin boluntad na dulot ngunyan para [ki Jehova]?’ (1 Cron. 29:5, BPV) Kun yaon ka duman, ano an gigibuhon mo? Mapapahiro ka daw na suportaran an dakulang trabaho na ini? Huminiro tulos-tulos an mga Israelita. Iyo, sinda ‘nag-ugma sa saindang pagkabukas palad, huli ta sa bilog nindang puso nagdonar sinda [ki Jehova].’—1 Cron. 29:9, An Banal na Biblia.

Pakalihis nin ginatos na taon, may itinugdok si Jehova na mas urog pang dakula kisa sa templo. Inestablisar niya an dakulang espirituwal na templo, an areglo para makadulok sa saiya an mga tawo tanganing sumamba basado sa atang ni Jesus. (Heb. 9:11, 12) Paano ngunyan tinatabangan ni Jehova an mga tawo na makipag-ulian sa saiya? Paagi sa satong gibuhon na paggibo nin disipulo. (Mat. 28:19, 20) Asin bilang resulta kaini, minilyon na pag-adal sa Bibliya an isinasagibo, rinibo an nababawtismuhan, asin ginatos na bagong kongregasyon an nabibilog kada taon.

Huli sa pag-uswag na ini, kaipuhan na mag-imprenta nin mas dakul na literatura na basado sa Bibliya, magtugdok saka magmentenar nin mga Kingdom Hall, asin magkaigwa nin mga lugar para sa asembleya saka kumbensiyon. Minauyon ka daw na sarong dakula asin kapaki-pakinabang na gibuhon an satong paghuhulit kan maugmang bareta?—Mat. 24:14.

An pagkamuot sa Diyos saka sa kapwa asin an pagkaapurado kan paghuhulit kan Kahadian an nagpapahiro sa mga lingkod nin Diyos na ‘magtao nin boluntad na dulot para [ki Jehova]’ paagi sa pagtao nin gikan sa buot na mga donasyon. Nakakaugma nanggad na “[matawan ta] nin onra si Jehova paagi sa mahahalagang bagay na nasa [sato],” asin mahiling kun paano maimbod asin madunong na ginagamit an mga donasyon na iyan para sa pinakadakulang gibuhon sa kasaysayan nin tawo!—Tal. 3:9, NW.