Padagos na Mamibi Para Makamtan an Pag-uyon nin Diyos

Tinawan nin Diyos an mga tawo nin daing kaagid na regalo—an kakayahan na makikomunikar sa saiya asin ipahayag an saindang namamatian paagi sa pamibi. An propetang si David namibi: ‘Ika naghihinanyog kan pamibi, sa saimo [madulok] an gabos na [tawo].’ (Salmo 65:2) Pero paano kita mamimibi tanganing dangugon asin biyayaan nin Diyos?

MAPAKUMBABANG MAMIBI ASIN UDOK SA PUSO

Pag namimibi ka, nasasabi mo sa Diyos an laog kan saimong puso—naipapahayag mo kun ano talaga an namamatian mo. (Salmo 62:8) Pinapahalagahan kan Makakamhan sa Gabos an sinserong mga pamibi na hali sa puso.

GAMITON AN PERSONAL NA PANGARAN NIN DIYOS

An Diyos igwa nin dakul na titulo, pero igwa sana siya nin sarong personal na pangaran. ‘Ako si Jehova. Iyo ini an sakuyang pangaran.’ (Isaias 42:8) An pangaran na Jehova mababasa nin mga 7,000 na beses sa Banal na Kasuratan. Inapod kan dakul na propeta an Diyos sa saiyang personal na pangaran. Sinabi ni Abraham: “Jehova, . . . pataramon mo pa tabi ako.” (Genesis 18:30, NWT) Dapat ta man na gamiton an pangaran nin Diyos, an Jehova, pag namimibi kita.

MAMIBI SA SADIRI MONG LENGGUWAHE

Nasasabutan nin Diyos an satong mga kaisipan asin namamatian ano man an satong lengguwahe. Sinisiyerto sato kan saiyang Tataramon: “An Diyos mayong pinapalain, kundi sa lambang nasyon an tawong natatakot sa saiya asin naggigibo nin matanos saiyang inaako.”—Gibo 10:34, 35.

Alagad tanganing biyayaan nin Diyos, bako sanang pagpamibi an dapat tang gibuhon. Sa masunod na artikulo, aaramon ta kun ano pa an kaipuhan tang gibuhon.