Kun Paano Ipapahiling an Pagkamuot sa Satong Kapwa

Gabos kita naggikan sa inot na lalaki, si Adan, kaya masasabing saro kitang pamilya. Inaasahan na an mga miyembro nin pamilya mapahiling nin pagkamuot saka respeto sa lambang saro, pero sa panahon ngunyan bihira ta nang mahiling an arog kaiyan na pagkamuot. Bako iyan an gusto kan satong mamumuton na Diyos.

KUN ANO AN SINASABI KAN BANAL NA KASURATAN MANUNGOD SA PAGKAMUOT

‘Kamutan mo an [kapwa] mo nin siring sa saimo man sana.’—LEVITICO 19:18.

“Padagos na kamutan an saindong mga kaiwal.”—MATEO 5:44.

KUN ANO AN BUOT SABIHON KAN KAMUTAN AN KAPWA

Mangnuhon kun paano nin Diyos ilinadawan sa saiyang Tataramon, sa 1 Corinto 13:4-7, an pagkamuot:

“An pagkamuot mapasensiya asin mabuot.”

Pag-isipan: Ano an mamamati mo kun mapasensiya asin mabuot saimo an iba saka dai naaanggot pag nasala ka?

“An pagkamuot bakong maurihon.”

Pag-isipan: Ano an mamamati mo kun mapagsuspetsang marhay saimo an iba o nauuri sinda saimo?

An pagkamuot “dai nag-iisip kan sadiri sanang kapakanan.”

Pag-isipan: Ano an mamamati mo kun iginagalang kan iba an opinyon mo asin dai pirming iniinsistir an saindang opinyon?

An pagkamuot ‘dai pigbibilang an mga maraot na ginibo sa saiya nin iba.’

Pag-isipan: Andam an Diyos na patawadon an nagsusulsol na tawo na nagkasala sa saiya. “An mga sala nin saro dai niya pagpaparahanapon; an maghinanakit sagkod lamang dai man niya gigibuhon.” (Salmo 103:9, NWT) Nagpapasalamat kita pag pinapatawad kita kan saro na nakulgan ta. Kaya dapat na andam man kitang magpatawad pag nakulgan kita kan iba.—Salmo 86:5.

An pagkamuot ‘dai ikinakaugma an karatan.’

Pag-isipan: Pag may maraot na nangyayari sa sato, habo ta na nauugma an iba sa satong pagsakit. Kaya dai kita nauugma pag nagsasakit an iba, dawa bakong magayon an nagin pagtratar ninda sa sato.

Tanganing kamtan an mga biyaya nin Diyos, dapat tang kamutan an gabos na tawo sa arog kaining mga paagi. An sarong praktikal na paagi na magigibo ta ini iyo an pagtabang sa mga nangangaipo.