Mamumuton Kitang Inaataman kan Satong Kaglalang
1. AN SATONG KAGLALANG PINAPASIRANG AN ALDAW
Naiimahinar mo daw an buhay na mayo nin liwanag kan aldaw? An aldaw an nagtatao nin enerhiya sa mga kahoy para magkaigwa nin mga dahon, burak, bunga, asin mga pisog. Nakakatabang man iyan na masupsop kan kahoy an tubig hali sa daga paagi sa mga gamot pasiring sa mga dahon dangan ilinuluwas iyan bilang alisngaw.
2. AN SATONG KAGLALANG NAGTATAO NIN URAN
An uran sarong mahalagang marhay na regalo hali sa Diyos. Paagi kaiyan, nakakapatubo an daga nin kakanon para sa sato. Tinatawan kita nin Diyos nin uran hali sa langit saka nin abundang ani para magkaigwa kita nin bastanteng kakanon saka mapano nin kaugmahan an satong mga puso.
3. AN SATONG KAGLALANG NAGTATAO NIN KAKANON ASIN MAISUSULOT
Dakul na padre de pamilya an nahahadit kun paano ninda tatawan nin igong kakanon asin maisusulot an saindang pamilya. Mangnuhon an sinasabi kan Kasuratan: “Masdan nindong marhay an mga gamgam sa kalangitan; dai sinda nagsasabwag nin banhi o nag-aani o nagtitipon sa mga kamalig. Pero, pinapakakan sinda kan saindong langitnon na Ama. Bako daw na mas mahalaga kamo kisa sainda?”—Mateo 6:25, 26.
“Makanuod kamo sa mga tanom na may burak sa kalangtadan, kun paano sinda nagtutubo . . . ; alagad sinasabi ko sa saindo na maski si [Hading] Solomon sa gabos niyang kamurawayan dai nasamnuhan nin arog sa saro sa mga ini. Ngunyan, kun binabaduan nin Diyos sa arog kaining paagi an mga tanom sa kalangtadan . . . , bako daw na mas tatawan niya kamo nin ibabado?”—Mateo 6:28-30.
Huling kaya kitang tawan nin Diyos nin kakanon asin maisusulot, siguradong kaya man niya kitang tabangan na makakua kan iba pang mga pangangaipo niyato sa buhay. Kun hihinguwahon tang gibuhon an kabutan nin Diyos, puwede niyang biyayaan an satong pagmamaigot na magtanom para may makakan o puwede niya kitang tabangan na makahanap nin trabaho para mabakal niyato an mga kaipuhan ta.—Mateo 6:32, 33.
May marahay nanggad kitang mga dahilan na kamutan an Diyos pag pinag-iisipan ta an manungod sa aldaw, uran, mga gamgam, asin mga burak. Sa masunod na artikulo, ipapaliwanag kun paano nakikikomunikar sa mga tawo an satong Kaglalang.