Makipagkatuninungan Ka Nguna sa Tugang Mo—Paano?

Imahinara na nakaistar ka sa Galilea kan panahon ni Jesus. Nagpasiring ka sa Jerusalem tanganing iselebrar an Kapiyestahan nin mga Payag-payag. Pano an siyudad nin kapwa mga parasamba na naghali pa sa hararayong lugar. Gusto mong magdulot nin atang para ki Jehova. Kaya guyod-guyod an sarong kanding, nagpuon kang makipagsusuan sa matawong mga kalye kan siyudad para makaduman sa templo. Pag-abot mo sa templo, pano-pano na iyan nin mga tawo na gusto man magdulot nin atang. Sa katapos-tapusi, maitatao mo na sa mga saserdote an dara mong kanding. Kan mismong oras na idto, nagirumduman mo na may kulog nin buot sa saimo an tugang mo na posibleng yaon man sa matawong siyudad na iyan. Ipinaliwanag ni Jesus kun ano an dapat mong gibuhon. (Basahon an Mateo 5:24.) Paano ka asin an tugang na nakulgan mo nin buot makikipagkatuninungan arog kan itinukdo ni Jesus? Sa kada lista sa ibaba, markahan nin tsek an tamang simbag.

AN DAPAT KONG GIBUHON:

• Kaulayon sana an sakong tugang kun sa hiling ko may balido siyang dahilan para maanggot

• Purbaran na itanos an kaisipan kan sakong tugang kun sa pagmati ko sobra siya kasensitibo o may nagibo man siyang sala

• Mapasensiyang dangugon an sakong tugang mantang nagpapaliwanag siya, asin dawa dai ko iyan lubos na nasasabutan, maghagad nin tawad huli sa kulog na namatian niya o sa dai inaasahan na epekto sa saiya kan mga ginibo ko

AN DAPAT GIBUHON KAN SAKONG TUGANG:

• Hagadon an suporta kan iba sa kongregasyon paagi sa pagsabi kun paano ko siya nakulgan

• Anggutan ako, ungkaton an gabos na detalye kan nagibo kong sala, asin piriton akong akuon na ako an may sala

• Isipon an kapakumbabaan asin kusog nin buot na ipinahiling ko para ranihan siya, asin udok sa puso na magpatawad nin lubos

Maski ngani bako nang kabtang kan satong pagsamba ngunyan an pag-atang nin mga hayop, ano an itinutukdo ni Jesus dapit sa koneksiyon kan pakikipagkatuninungan sa satong mga tugang asin sa pagsamba na inaako nin Diyos?