Mga Reperensiya Para sa Workbook sa Pagtiripon na Pamumuhay Asin Ministeryo
AGOSTO 5-11
KAYAMANAN NA YAON SA TATARAMON NIN DIYOS | 2 TIMOTEO 1-4
“Dai Kita Tinawan nin Diyos nin Espiritu nin Pagkamatalaw”
(2 Timoteo 1:7) Huli ta dai kita tinawan nin Diyos nin espiritu nin pagkamatalaw, kundi nin espiritu nin kapangyarihan asin nin pagkamuot saka nin tultol na isip.
Mga Hoben—Ipaheling an Saindong Pag-oswag
9 Tanganing tabangan si Timoteo, paghaloyhaloy pinagirumdom sia ni Pablo: “An Dios nagtao sa sato bakong nin espiritu nin pagkamatalaw, kundi nin puersa asin nin pagkamoot patin nin toltol na isip.” (2 Tim. 1:7) Kalabot sa “toltol na isip” an kakayahan na mag-isip asin mangatanosan sa madonong na paagi. Kaiba dian an kakayahan na atubangon an aktuwal na situwasyon—dawa dai kutana nindo gusto iyan. An nagkapirang hoben na bakong maygurang nagpapaheling nin espiritu nin pagkamatalaw asin nagpoprobar na mahale sa isip an nakakatension na mga situwasyon paagi sa sobrang pagtorog o pagheling nin mga programa sa TV, pagdroga o pagpangana sa inomon na de alkohol, parateng pag-atender sa mga parti, o seksuwal na imoralidad. An mga Kristiano sinasadol “na isikwal an pagkabakong diosnon asin an kinabanon na mga mawot asin mamuhay na may toltol na isip asin katanosan patin diosnon na debosyon sa tahaw kan presenteng sistemang ini nin mga bagay.”—Tito 2:12.
(2 Timoteo 1:8) Kaya dai mo ikasupog an ginigibo mong pagpatotoo manungod sa satuyang Kagurangnan asin dai mo man ako ikasupog, na sarong bilanggo nin dahil sa saiya, kundi magin andam ka na mag-agi nin kasakitan para sa maugmang bareta paagi sa pagsarig sa kapangyarihan nin Diyos.
‘Magmakosog an Boot Asin Magpakakosog Kamo!’
7 Si Pablo, kan magsurat ki Timoteo, nagsabi: “An Dios nagtao sato bakong nin espiritu nin pagkamatalaw, kundi nin kapangyarihan . . . Kun siring dai mo ikasupog an patotoo dapit sa satong Kagurangnan.” (2 Timoteo 1:7, 8; Marcos 8:38) Pakabasa kan mga tataramon na iyan, puede niatong ihapot sa satong sadiri: ‘Ikinasusupog ko daw an sakong pagtubod, o makosog daw an sakong boot? Sa pinagtatrabawohan (o eskuelahan) ko, ipinamimidbid ko daw sa kairiba ko na ako Saksi ni Jehova, o hinihingoa ko daw na itago iyan? Nasusupog daw akong mapaiba, o ipinag-oorgolyo ko daw na mapalaen huli sa sakong relasyon ki Jehova?’ Kun an siisay man may negatibong saboot manongod sa paghuhulit kan maogmang bareta o sa pagkaigwa nin bakong popular na kombiksion, girumdomon nia an hatol ni Jehova ki Josue: “Magmakosog an saimong boot asin magpakakosog ka.” Nungkang paglingawan, bakong an opinyon kan satong mga katrabaho o satong mga kaeskuela an mahalaga kundi an punto de vista ni Jehova asin ni Jesu-Cristo.—Galacia 1:10.
Maghanap nin Espirituwal na Kayamanan
(2 Timoteo 2:3, 4) Bilang sarong matibay na suldados ni Cristo Jesus, magin andam kang mag-agi nin kasakitan. 4 Mayo nin suldados na nasa serbisyo an nakikilabot sa mga aktibidad na may koneksiyon sa pagnenegosyo, tanganing makamtan niya an pag-uyon kan saro na nagrehistro sa saiya bilang suldados.
Hanapon an Tunay na Kayamanan
13 Si Timoteo igwa nin makusog na pagtubod. Pagkatapos apudon si Timoteo na “sarong matibay na suldados ni Cristo Jesus,” sinabi sa saiya ni Pablo: “Mayo nin suldados na nasa serbisyo an nakikilabot sa mga aktibidad na may koneksiyon sa pagnenegosyo, tanganing makamtan niya an pag-uyon kan saro na nagrehistro sa saiya bilang suldados.” (2 Tim. 2:3, 4) An mga parasunod ni Jesus ngunyan, kaiba na an hukbo nin labing sarong milyon na bilog na panahon na mga ministro, inaaplikar an sadol ni Pablo sagkod sa itinutugot kan saindang kamugtakan. Linalabanan ninda an mga pang-engganyo kan mga advertisement asin kan kinaban na ini. Ginigirumdom ninda an prinsipyong ini: ‘An minautang uripon kan nagpautang.’ (Tal. 22:7) Gusto ni Satanas na ubuson ta an gabos niyatong panahon asin kusog bilang mga uripon kan komersiyo kan kinaban na ini. May mga nangungutang nin dakulaon na halaga tanganing makabakal nin harong o mamahalon na awto, pambayad sa matrikula, o para sa magarbong kasal pa ngani. Kun dai kita mag-iingat puwede kitang magkautang sa laog nin dakul na taon. Nagpapahiling kita nin praktikal na kadunungan kun papasimplehon ta an satong buhay asin babawasan an utang saka mga gastos. Paagi kaiyan, magigin libre kitang maglingkod sa Diyos imbes na magin uripon kan komersiyo kan kinaban ngunyan.—1 Tim. 6:10.
(2 Timoteo 2:23) Saro pa, dai ka nanggad makilabot sa mangmang asin daing saysay na mga debate, huling aram mo na nagbubunga iyan nin iriwal.
An mga Lingkod ni Jehova ‘Isinisikwal an Karatan’
10 Ngunyan, an mga lingkod ni Jehova bihirang mapaatubang sa apostasya sa laog kan kongregasyon. Pero, kun mapaatubang kita sa mga katukduan na bakong suno sa Kasuratan, sain man hali iyan, dapat na determinado kitang isikwal iyan. Bakong madunong na makipagdebate sa mga apostata, baga man sa personal, sa pagsimbag sa mga blog ninda sa Internet, o sa ano pa man na porma nin komunikasyon. Dawa kun an intensiyon ta iyo na tabangan an indibidwal, an siring na pakikipag-ulay kontra sa pagbuot kan Kasuratan na pinag-ulayan ta pa sana. Imbes, bilang mga lingkod ni Jehova, biyo niyatong linilikayan, iyo isinisikwal, an apostasya.
Pagbasa sa Bibliya
(2 Timoteo 1:1-18) Hali ki Pablo, na sarong apostol ni Cristo Jesus paagi sa kabutan nin Diyos uyon sa panuga mapadapit sa buhay na nagin posible dahil ki Cristo Jesus, 2 para ki Timoteo na sakuyang namumutan na aki: Mapasaimo an daing kapantay na kabuutan, pagkahirak, asin katuninungan hali sa Diyos na Ama asin ki Cristo Jesus na satuyang Kagurangnan. 3 Nagpapasalamat ako sa Diyos, na iyo an tinatawan ko nin sagradong paglilingkod siring kan ginibo kan sakuyang mga apuon, asin sa paggibo ko kaiyan na may malinig na konsiyensiya aldaw-banggi takang danay na ginigirumdom sa sakuyang mga pagngayo-ngayo. 4 Pag nagigirumduman ko an saimong mga luha, lalo kong pigmamawot na mahiling ka, tanganing mapano an sakong puso nin kaugmahan. 5 Huli ta dai ko nalilingawan an saimong pagtubod na mayong pagsagin-sagin, na inot na nahiling sa saimong lolang si Loida asin sa saimong inang si Eunice, na sigurado akong yaon man sa saimo. 6 Dahil kaini, pinapagirumdom taka na palaadon mo na siring sa kalayo an balaog nin Diyos na inako mo kan ipatong ko an sakuyang mga kamot sa saimo. 7 Huli ta dai kita tinawan nin Diyos nin espiritu nin pagkamatalaw, kundi nin espiritu nin kapangyarihan asin nin pagkamuot saka nin tultol na isip. 8 Kaya dai mo ikasupog an ginigibo mong pagpatotoo manungod sa satuyang Kagurangnan asin dai mo man ako ikasupog, na sarong bilanggo nin dahil sa saiya, kundi magin andam ka na mag-agi nin kasakitan para sa maugmang bareta paagi sa pagsarig sa kapangyarihan nin Diyos. 9 Ilinigtas niya kita asin inapod na magin mga banal, bako dahil kan satuyang mga gibo, kundi dahil kan saiyang sadiring katuyuhan asin daing kapantay na kabuutan. An daing kapantay na kabuutan na ini ipinahiling sa sato paagi ki Cristo Jesus kaidto pang haluyon nang panahon, 10 alagad ngunyan iyan urog na nagin malinaw paagi sa pagkahayag kan satuyang Paraligtas, si Cristo Jesus, na puminara sa kagadanan saka nagtaong liwanag mapadapit sa buhay asin pagkadaing kalapaan paagi sa maugmang bareta, 11 na para diyan ako ninombrahan na magin parahulit asin apostol asin paratukdo. 12 Ini an dahilan kaya inaagihan ko man an mga kasakitan na ini, alagad dai ako nasusupog. Huli ta midbid ko an Saro na sa saiya ako nagtutubod, asin may kumpiyansa ako na kaya niyang ingatan idtong ipinagkatiwala ko sa saiya sagkod sa aldaw na iyan. 13 Padagos mong pangaptan an pamantayan nin marahay na mga tataramon na nadangog mo sa sako, mantang ipinapahiling mo an pagtubod asin pagkamuot na resulta nin pagigin kasaro ni Cristo Jesus. 14 Ingatan mo an marahayon na bagay na ini na ipinagkatiwala sa saimo paagi sa banal na espiritu na yaon sa satuya. 15 Aram mo baga na binarayaan ako kan gabos na yaon sa probinsiya nin Asia, kaiba na si Figelo asin Hermogenes. 16 Kahirakan lugod kan Kagurangnan si Onesiforo asin an mga kairiba niya sa harong, huli ta parati niya akong pinapakusog, asin dai niya ikinasupog an sakuyang pagigin preso. 17 Sa katunayan, kan nasa Roma siya, matiyaga niya akong hinanap asin nanumpungan niya ako. 18 Lugod na magkamit siya nin pagkahirak hali sa Kagurangnan na Jehova sa aldaw na iyan. Asin siyertong aram mo an gabos na paglilingkod na ginibo niya sa Efeso.
AGOSTO 12-18
KAYAMANAN NA YAON SA TATARAMON NIN DIYOS | TITO 1–FILEMON
“Magnombra nin mga Magurang sa Kongregasyon”
(Tito 1:5-9) Iwinalat taka sa Creta tanganing maasikaso mo an mga bagay na kaipuhan itanos asin makapagnombra nin mga magurang sa kongregasyon sa kada siyudad, siring kan instruksiyon ko sa saimo: 6 kun igwa nin siisay man na lalaki na laban sa saiya mayo nin mairereklamo, agom nin sarong babayi, igwa nin mga aking nagtutubod na dai mairereklamo nin pagigin delingkuwente asin rebelyoso. 7 Huli ta bilang katiwala nin Diyos, an sarong paraataman dapat na mayo nin mairereklamo laban sa saiya, bakong arogante, bakong arangguton, bakong buratsero, bakong bayolente, bakong mahanab sa materyal na pakinabang, 8 kundi mapag-istimar, may pagkamuot sa karahayan, tultol an isip, matanos, maimbod, may pagpupugol sa sadiri, 9 na nangangapot nin higot sa mapagkakatiwalaan na tataramon kun manungod sa saiyang paagi nin pagtutukdo, tanganing sa siring makapagpakusog siya paagi sa pagtukdo kan marahay na mensahe asin magibo niyang magsaway sa mga nagkokontra.
Hapot Hali sa mga Parabasa
Dawa ngani bakong detalyadong sinasabi kan Kasuratan kun paano ginigibo an kada pagnombra kaidto, may mga mababasa kita na matao sa sato nin ideya kun paano iyan ginigibo. Mababasa ta na kan papuli na si Pablo asin Bernabe hali sa inot nindang pagbiyahe bilang mga misyonero, “nagnombra sinda nin kamagurangan para sa sainda sa lambang kongregasyon, na namimibi na may pag-ayuno, asin ipinagkatiwala ninda sinda ki Jehova, na sa saiya nagturubod sinda.” (Gibo 14:23, NW) Pakalihis nin pirang taon, nagsurat si Pablo sa kaiba-iba niya sa pagbiyahe na si Tito: ‘Iwinalat taka sa Creta tanganing husayon mo an mga bagay na nagkukulang, asin [magnombra] ka nin kamagurangan sa lambang banwaan, siring sa ipinagbuot ko saimo.’ (Tito 1:5) Kaagid kaiyan, minalataw na tinawan man kan siring na awtoridad si Timoteo na nakaibanan ni apostol Pablo sa dakul na pagbiyahe. (1 Tim. 5:22) Kaya malinaw nanggad na an mga pagnombrang ini ginibo kan nagbibiyaheng mga paraataman, bako kan mga apostol asin kamagurangan na lalaki sa Jerusalem.
Nasa isip an arugan na ini sa Bibliya, binago kan Namamahalang Grupo kan Mga Saksi ni Jehova an paagi nin pagnombra sa mga elder asin ministeryal na lingkod. Puon Setyembre 1, 2014, arog na kaini an paagi nin pagnombra: Maingat na rerepasuhon kan kada paraataman nin sirkito an mga rekomendasyon sa saiyang sirkito. Sa pagdalaw niya sa mga kongregasyon, hihinguwahon niyang mamidbid an mga irinerekomendar asin kun posible iibanan sinda sa ministeryo. Pagkatapos na ipakipag-ulay sa lokal na grupo nin kamagurangan an mga rekomendasyon, an paraataman nin sirkito an may paninimbagan na magnombra nin mga elder asin ministeryal na lingkod sa mga kongregasyon sa sirkito niya. An paaging ini mas harani sa areglo nin pagnombra kan inot na siglo.
Sairisay an kalabot sa prosesong ini? Arog kan dati, “an maimbod asin mapagmansay na uripon” an may panginot na paninimbagan na magpakakan sa mga lingkod sa harong. (Mat. 24:45-47, NW) Kaiba digdi an pagsiyasat sa Kasuratan, sa tabang kan banal na espiritu, tanganing magtao nin paggiya kun paano praktikal na iaaplikar an mga prinsipyo sa Bibliya na may koneksiyon sa pag-organisar kan pambilog na kinaban na kongregasyon. An maimbod na uripon man an nagnonombra sa gabos na paraataman nin sirkito asin mga miyembro kan Branch Committee. An kada sangang opisina nagtatao man nin praktikal na tabang sa pagpautob kan itinaong mga instruksiyon. An lambang grupo nin kamagurangan may magabat na paninimbagan na lubos na ebalwaron an maka-Kasuratan na mga kuwalipikasyon kan mga brother na irinerekomendar na nombrahan sa kongregasyon nin Diyos. An lambang paraataman nin sirkito may seryosong paninimbagan na maingat asin may pagpamibi na pag-adalan an mga rekomendasyon kan mga elder dangan nombrahan an makukuwalipikar na mga brother.
Maghanap nin Espirituwal na Kayamanan
(Tito 1:12) May saro sa sainda, na sadiri nindang propeta, an nagsabi: “An mga taga Creta anas kaputikan an pigtataram, garo mga hayop na maisugon, mga paslong hugakon.”
w89 5/15 31 ¶5
Hapot Hali sa mga Parabasa
Siguradong dai man niya inuuyunan an ano man na pang-iinsulto sa rasa o sa nasyon kan mga taga Creta. Makakasigurado kita kaiyan, ta aram ni Pablo na sa Creta igwa nin mahusay na mga Kristiyano na inuyunan nin Diyos asin linahidan kan Saiyang banal na espiritu. (Gibo 2:5, 11, 33) Igwa nin igong bilang nin maimbod na mga Kristiyano para makabilog nin mga kongregasyon sa “kada siyudad.” Dawa ngani an mga Kristiyanong idto bako man mga perpektong tawo, makakasigurado kita na bako sindang mga putikon asin mga paslong hugakon; ta kun iyo, dai kuta sinda padagos na nag-ako kan pag-uyon ni Jehova. (Filipos 3:18, 19; Kapahayagan 21:8) Arog kan mahihiling niyato ngunyan sa gabos na nasyon, posibleng igwa man sa Creta nin mga sadiyosan an puso na namumundo huli sa hababang pamantayan sa moral sa palibot ninda asin andam na maghimati sa mensahe ni Cristo.—Ezequiel 9:4; ikumparar an Gibo 13:48.
(Filemon 15, 16) Siguro, ini man talaga an dahilan kaya naparayo siya sa saimo nin halipot na panahon, tanganing pagbalik niya magdagos-dagos na siyang yaon sa saimo, 16 bako nang bilang uripon kundi urog pa sa sarong uripon—bilang tugang na namumutan, iyo, sarong tugang na napamahal nang gayo sa sako, asin lalo man na mapapamahal sa saimo, bako sana bilang saimong uripon, kundi bilang kapwa mo naglilingkod sa Kagurangnan.
Tampok na mga Kabtang sa mga Surat ki Tito, ki Filemon, Asin sa mga Hebreo
15, 16—Taano ta dai hinagad ni Pablo ki Filemon na tawan nin katalingkasan si Onesimo? Minawot ni Pablo na estriktong magdanay sa sugo sa saiya na ‘ihulit an kahadean nin Dios asin itokdo an mga bagay mapadapit sa Kagurangnan na Jesu-Cristo.’ Sa dahelan na iyan, pinili nia na dai masangkot sa mga isyu sa sosyedad, siring kan mga isyung may koneksion sa pang-ooripon.—Gibo 28:31.
Pagbasa sa Bibliya
(Tito 3:1-15) Padagos mo sindang pagirumdumon na magpasakop saka magin masinunod sa mga gobyerno asin mga awtoridad, na magin andam sa lambang marahay na gibo, 2 na dai magtaram nin maraot sa kiisay man, na dai magin parapakiiwal, kundi magin rasonable, na nagpapahiling nin lubos na kahuyuan sa gabos na tawo. 3 Huli ta kita man dating mga daing pakasabot, masinuway, nailagalag, uripon nin manlain-lain na pagmawot asin pagpasiram-siram, namumuhay sa karatan asin pagkauri, nakakabaldi, nauungis sa lambang saro. 4 Minsan siring, kan an kabuutan nin Diyos na satuyang Paraligtas asin an saiyang pagkamuot sa katawuhan maihayag 5 (bako dahil sa ano man na matanos na ginibo niyato, kundi dahil sa saiyang pagkahirak), ilinigtas niya kita paagi sa paghugas sa satuya na nagdara sato sa buhay asin paagi sa pagbago sa satuya paagi sa banal na espiritu. 6 Bukas-palad niyang ibinubo sa sato an espiritung ini paagi ki Jesu-Cristo na satuyang Paraligtas, 7 tanganing pagkatapos kitang maipahayag na matanos paagi sa saiyang daing kapantay na kabuutan, kita magin mga paramana uyon sa panuga na buhay na daing katapusan. 8 An mga tataramon na ini mapagkakatiwalaan, asin buot ko na padagos mong iduon an mga bagay na ini, tanganing idtong mga nagtutubod sa Diyos mapagdanay an saindang isip na nakapokus sa marahay na mga gibo. An mga bagay na ini marahay asin kapaki-pakinabang sa mga tawo. 9 Alagad dai ka nanggad makilabot sa mangmang na diriskutiran asin sa mga ginigibong pagsusog sa ginikanan nin lahi asin sa mga pasuruhay saka iriwal manungod sa Katugunan, huling an mga iyan daing pakinabang asin mayong kamanungdanan. 10 Kun manungod sa tawo na nag-iintrodusir nin sarong sekta, isikwal mo siya kun dai siya magdangog pagkatapos nin inot asin ikaduwang patanid, 11 huling an siring na tawo suminuway na sa dalan asin nagkakasala asin an saiya mismong mga kasalan an minakondenar sa saiya. 12 Pag pinadiyan ko sa saimo si Artemas o si Tiquico, hinguwahon mo nanggad na dumanan ako sa Nicopolis, dahil nagdesisyon ako na duman magpalihis nin tiglipot. 13 Gibuhon mo an gabos para maitao an mga pangangaipo ni Zenas, na sarong eksperto sa Katugunan, asin ni Apolos tanganing dai sinda magkulang nin ano man sa biyahe ninda. 14 Alagad kaipuhan man na makanuod an mga tugang niyato na idusay an saindang sadiri sa marahay na mga gibo tanganing makatabang sinda sa mga panahon nin biglaan na pangangaipo, na sa siring pirmi sindang magin mabunga sa saindang paglilingkod. 15 An gabos kong kairiba nagpapaabot sa saimo kan saindang pangungumusta. Pakikumusta diyan sa mga kapagtubod niyato na nagpapadangat sa samo. Lugod na mapasaindo gabos an daing kapantay na kabuutan.
AGOSTO 19-25
KAYAMANAN NA YAON SA TATARAMON NIN DIYOS | HEBREO 1-3
“Kamutan an Katanusan Asin Ikaungis an Karatan”
(Hebreo 1:8) Alagad manungod sa Aki, sinasabi niya: “An Diyos an saimong trono sagkod nuarin pa man, asin an setro kan saimong Kahadian iyo an setro nin katanusan.
Irukyaw si Cristo, an Mamuraway na Hadi!
8 Pinatukaw ni Jehova an saiyang Aki bilang saiyang Mesiyanikong Hadi sa langit kan 1914. Siya maghahadi sa ‘katanusan,’ kaya igwa nin garantiya na matanos asin daing pagpaurog an pamamahala niya. Lehitimo an awtoridad niya, huling si Jehova an pundasyon kan saiyang kahadian. Dugang pa, an trono ni Jesus ‘dai nin katapusan asin magdadanay.’ Dai mo daw ipinag-oorgulyo na naglilingkod ka ki Jehova sa irarom kan siring na makapangyarihan na Hadi na ninombrahan nin Diyos?
(Hebreo 1:9) Namutan mo an katanusan, asin ikinaungis mo an karatan. Iyan an dahilan kaya an Diyos, an saimong Diyos, linahidan ka nin lana asin tinawan ka nin mas dakulang kagaya-gayahan kisa saimong mga kairiba.”
Irukyaw si Cristo, an Mamuraway na Hadi!
7 Basahon an Salmo 45:6, 7. Huli sa hararom na pagkamuot ni Jesus sa katanusan asin pagkaungis sa ano man na puwedeng maglapastangan sa saiyang Ama, linahidan siya ni Jehova bilang Hadi kan Mesiyanikong Kahadian. Linahidan si Jesus kan ‘lana nin [labi-labing] kaugmahan’ nin urog kisa sa saiyang ‘mga kaibahan,’ na iyo an mga hadi kan Juda sa pamilya ni David. Paano? Linahidan si Jesus ni Jehova mismo. Saro pa, linahidan siya ni Jehova bilang Hadi asin Halangkaw na Saserdote. (Sal. 2:2; Heb. 5:5, 6) Dugang pa, si Jesus linahidan bako nin lana kundi nin banal na espiritu, asin an saiyang pagkahadi bakong sa daga kundi sa langit.
Maghanap nin Espirituwal na Kayamanan
(Hebreo 1:3) Siya an repleksiyon kan kamurawayan nin Diyos asin an eksaktong ladawan kan mismong pagkapersona kaini, asin siya an nagsusustenir kan gabos na bagay paagi sa saiyang mapuwersang tataramon. Asin pagkatapos niya kitang dalisayon sa satuyang mga kasalan, nagtukaw siya sa may tuo kan Mahal na Diyos na nasa kaitaasan.
it-1 1185 ¶1
Ladawan
Dai daw nagbago an ipinahiling ni Jesus na pagigin kaagid niya kan saiyang Ama?
An panganay na Aki nin Diyos, na kan huri nagin an tawong si Jesus, ladawan kan saiyang Ama. (2Co 4:4) Huling malinaw na an Aking idto iyo an kaulay kan Diyos kan sabihon niyang, ‘Gibuhon niyato an tawo siring sa satong ladawan,’ an pagigin kaagid kan Aki sa saiyang Ama, an Kaglalang, nagpuon kan lalangon an Aki. (Ge 1:26; Ju 1:1-3; Col 1:15, 16) Kan nasa daga siya bilang sarong perpektong tawo, lubos niyang ipinahiling an mga kuwalidad asin personalidad kan saiyang Ama sa paagi na magigibo nin sarong tawo, kaya masasabi niya na “an siisay man na nakahiling na sa sako nakahiling na man sa Ama.” (Ju 14:9; 5:17, 19, 30, 36; 8:28, 38, 42) Alagad, an pagkakaagid na ini siguradong mas naipahiling pa ni Jesus kan buhayon siya liwat bilang espiritung persona asin kan an “gabos na awtoridad sa langit asin sa daga” itao na sa saiya kan saiyang Ama, an Diyos na Jehova. (1Pe 3:18; Mat 28:18) Huling ilinangkaw kaidto nin Diyos si Jesus sa “sarong mas halangkaw na posisyon,” mas naipahiling kan Aki nin Diyos an kamurawayan kan saiyang Ama nin urog kisa kaidtong bago siya maghali sa langit pasiring sa daga. (Flp 2:9; Heb 2:9) Ngunyan siya na “an eksaktong ladawan kan mismong pagkapersona [nin Diyos].”—Heb 1:2-4.
(Hebreo 1:10-12) Asin: “Sa kapinunan, O Kagurangnan, ibinugtak mo an mga pundasyon kan daga, asin an kalangitan gibo kan saimong mga kamot. 11 An mga iyan magkakaparara, alagad ika magdadanay; asin siring sa sarong bado, gabos iyan magkakaruluma, 12 dangan papatuson mo an mga iyan siring sa sarong alikboy, siring sa sarong bado, asin an mga iyan masasalidahan. Alagad ta ika iyo man giraray, asin an saimong mga taon dai nuarin man magkakaigwa nin katapusan.”
it-1 1063 ¶7
Langit
An mga tataramon sa Salmo 102:25, 26 aplikado ki Jehova Diyos, alagad kinotar iyan ni apostol Pablo na an pinapanungdan iyo si Jesu-Cristo. An dahilan huli ta an bugtong na Aki nin Diyos iyo an personal na Ahente nin Diyos na ginamit niya sa paglalang kan uniberso. Ipinahiling ni Pablo an pagkakalain kan pagigin permanente kan pag-eksister kan Aki kumpara sa pisikal na linalang, na kun gugustuhon nin Diyos, puwede niya iyan ‘patuson siring sa sarong alikboy’ asin isaray.—Heb 1:1, 2, 8, 10-12; ikumparar an 1Pe 2:3.
Pagbasa sa Bibliya
(Hebreo 1:1-14) Kaidtong haloy nang panahon, an Diyos nakipag-ulay sa mga apuon niyato paagi sa mga propeta sa dakul na pagkakataon asin sa dakul na paagi. 2 Ngunyan sa pagtatapos kan mga aldaw na ini, nakipag-ulay siya sa sato paagi sa sarong Aki, na ninombrahan niya na magin tagapagmana kan gabos na bagay, asin paagi sa saiya minukna niya an mga sistema nin mga bagay. 3 Siya an repleksiyon kan kamurawayan nin Diyos asin an eksaktong ladawan kan mismong pagkapersona kaini, asin siya an nagsusustenir kan gabos na bagay paagi sa saiyang mapuwersang tataramon. Asin pagkatapos niya kitang dalisayon sa satuyang mga kasalan, nagtukaw siya sa may tuo kan Mahal na Diyos na nasa kaitaasan. 4 Kaya nagi siyang mas halangkaw kisa sa mga anghel, mala ta nag-ako siya nin sarong ngaran na nakakalabi nanggad sa sainda. 5 Halimbawa, siisay sa mga anghel an sinabihan man lamang nin Diyos nin arog kaini: “Ika an sakuyang aki; sa aldaw na ini ako nagin saimong ama”? Asin nin arog pa kaini: “Ako magigin saiyang ama, asin siya magigin sakuyang aki”? 6 Alagad pag dinara niya giraray sa kinaban an saiyang Panganay, sasabihon niya: “Asin an gabos na anghel nin Diyos magruluhod sa saiya.” 7 Siring man, sinasabi niya manungod sa mga anghel: “Ginigibo niyang makusog na mga puwersa an saiyang mga anghel asin ginigibo niyang naglalaad na kalayo an saiyang mga lingkod.” 8 Alagad manungod sa Aki, sinasabi niya: “An Diyos an saimong trono sagkod nuarin pa man, asin an setro kan saimong Kahadian iyo an setro nin katanusan. 9 Namutan mo an katanusan, asin ikinaungis mo an karatan. Iyan an dahilan kaya an Diyos, an saimong Diyos, linahidan ka nin lana asin tinawan ka nin mas dakulang kagaya-gayahan kisa saimong mga kairiba.” 10 Asin: “Sa kapinunan, O Kagurangnan, ibinugtak mo an mga pundasyon kan daga, asin an kalangitan gibo kan saimong mga kamot. 11 An mga iyan magkakaparara, alagad ika magdadanay; asin siring sa sarong bado, gabos iyan magkakaruluma, 12 dangan papatuson mo an mga iyan siring sa sarong alikboy, siring sa sarong bado, asin an mga iyan masasalidahan. Alagad ta ika iyo man giraray, asin an saimong mga taon dai nuarin man magkakaigwa nin katapusan.” 13 Alagad manungod sa mga anghel, siisay sa sainda an sinabihan man lamang niya nin arog kaini: “Tumukaw ka sa tuo ko sagkod na ibugtak ko an saimong mga kaiwal na magin tungtungan kan saimong mga bitis”? 14 Bako daw na sinda gabos mga espiritu para sa banal na paglilingkod, na isinusugo tanganing maglingkod sa mga magkakamit nin kaligtasan?
AGOSTO 26–SETYEMBRE 1
KAYAMANAN NA YAON SA TATARAMON NIN DIYOS | HEBREO 4-6
“Gibuhon an Pinakamakakaya Mo Para Makalaog sa Kapahingaluan nin Diyos”
(Hebreo 4:1) Kun siring, miyentras na nagdadanay pa an panuga mapadapit sa paglaog sa saiyang kapahingaluan, mag-ingat kita ta tibaad igwa diyan sa saindo nin maibilang na bakong angay na mag-ako kan panugang iyan.
(Hebreo 4:4) Sa sarong parte kaya kan Kasuratan sinabi niya an arog kaini mapadapit sa ikapitong aldaw: “Asin kan ikapitong aldaw an Diyos nagpahingalo sa gabos niyang gibo,”
Kapahingaloan nin Dios—Ano an Kahulogan Kaiyan?
3 May duwang ebidensia kun taano ta makakapagkongklusyon kita na an ikapitong aldaw nagpapadagos pa kaidtong enot na siglo C.E. Enot, estudyare an sinabi ni Jesus sa mga nagkokontra na nagkritika sa saiya huling nagpaomay sia sa Sabbath, na ibinibilang ninda na sarong klase nin gibohon. Sinabi sa sainda kan Kagurangnan: “An sakong Ama sagkod gñunian nagguiguibo, asin ako nagguiguibo.” (Juan 5:16, 17) Ano an punto kaiyan? Si Jesus inakusaran na naggigibo sa aldaw nin Sabbath. Paagi sa pagsabing: “An sakong Ama sagkod gñunian nagguiguibo,” nasimbag nia an akusasyon na iyan. Garo man sana sinabi ni Jesus sa mga nagkikritika sa saiya: ‘Pareho an gibohon ko asin kan sakong Ama. Huling an sakong Ama padagos na naggigibo durante kan saiyang rinibong taon na Sabbath, ako puede nanggad na padagos na maggibo, dawa kun Sabbath.’ Sa siring, ipinarisa ni Jesus na kun dapit sa daga, an dakulang aldaw nin Sabbath na kapahingaloan nin Dios, an ikapitong aldaw, dai natapos kan panahon nia.
4 An ikaduwang ebidensia itinao ni Pablo. Kan kinokotar ni Pablo an Genesis 2:2 mapadapit sa kapahingaloan nin Dios, pinasabngan siang isurat: “Kita na nagtubod naglalaog sa kapahigñaloan.” (Heb. 4:3, 4, 6, 9) Kaya an ikapitong aldaw nagpapadagos pa kan panahon ni Pablo. Gurano pa daw kahaloy magpapadagos an aldaw na iyan nin kapahingaloan?
5 Tanganing masimbag an hapot na iyan, dapat tang girumdomon an katuyohan kan ikapitong aldaw. Ipinapaliwanag kan Genesis 2:3 kun ano iyan: “Benendicionan nin Dios an ikapitong aldao, asin pinakangbanal niya.” An aldaw na iyan “pinakangbanal”—ginibong sagrado, o itinagama ni Jehova—tanganing maotob an saiyang katuyohan. An katuyohan na iyan iyo na an daga magin istaran nin makinuyog na mga tawo na mangangataman kaiyan asin kan gabos na nabubuhay dian. (Gen. 1:28) Tanganing maotob an katuyohan na iyan, si Jehova Dios asin si Jesu-Cristo, an “kagurangnan kan sabbath,” “sagkod gñunian nagguiguibo.” (Mat. 12:8) An aldaw nin kapahingaloan nin Dios magpapadagos sagkod na an katuyohan nia may koneksion dian lubos nang maotob sa katapusan kan Sangribong Taon na Paghade ni Cristo.
(Hebreo 4:6) Kun siring, mantang posible pa para sa nagkapira na makalaog diyan, asin idtong inot na pinahayagan kan maugmang bareta dai nakalaog diyan dahil sa pagsuway,
Kapahingaloan nin Dios—Ano an Kahulogan Kaiyan?
6 Malinaw na ipinaliwanag ki Adan asin Eva an katuyohan nin Dios, alagad dai sinda nakikooperar dian. Iyo, si Adan asin Eva an enot na mga tawo na nagsuway sa Dios. Minilyon pang iba an nagsurunod sa sainda poon kaidto. Paorootrong nagsuway dawa an piniling banwaan nin Dios, an nasyon nin Israel. Asin mahalagang mangnohon na si Pablo nagpatanid sa mga Kristiano kaidtong enot na siglo na dawa an nagkapira sa sainda puede man mabiktima kan silong iyan, arog kan suanoy na mga Israelita. Sia nagsurat: “Kaya magmaigot kita na makalaog sa kapahigñaloan na iyan, tagñaning dai nin siisay man na maholog sa siring na padara nin kasumbikalan.” (Heb. 4:11) Mangnohon na an pagigin masinuway ikinonektar ni Pablo sa dai pakalaog sa kapahingaloan nin Dios. Ano an boot sabihon kaiyan para sa sato? Kun sa ano man na paagi kita marebelde sa katuyohan nin Dios, bako daw na tibaad dai kita makalaog sa kapahingaloan nin Dios? Malinaw nanggad na an simbag sa hapot na iyan mahalagang marhay para sa sato, asin orog pa niatong pag-oolayan iyan. Minsan siring, aramon nguna niato kun ano pa an manonodan niato manongod sa paglaog sa kapahingaloan nin Dios paagi sa pag-estudyar sa maraot na halimbawa kan mga Israelita.
(Hebreo 4:9-11) Kaya igwa pa nin natatadang aldaw nin pahingalo na siring sa Sabbath para sa banwaan nin Diyos. 10 Huli ta an tawo na luminaog na sa kapahingaluan nin Diyos nagpahingalo na man sa sadiri niyang mga gibo, kun paanong an Diyos nagpahingalo man sa saiyang mga gibo. 11 Kaya gibuhon niyato an satong pinakamakakaya na makalaog sa kapahingaluan na iyan, tanganing dai nin siisay man na makaarog sa siring kaidtong pagkamasinuway.
Kapahingaloan nin Dios—Ano an Kahulogan Kaiyan?
16 Pira sanang Kristiano ngonyan an mainsistir na dapat magsunod sa partikular na aspekto kan Ley ni Moises tanganing makaligtas. An ipinasabong na mga tataramon ni Pablo para sa mga taga Efeso malinawon nanggad: “Huli sa biyaya kamo nakaligtas huli sa pagtubod; asin iyan bakong hale sa saindo, kundi balaog nin Dios; bakong huli sa magña guibo, tagñaning dai nin siisay man na managsag.” (Efe. 2:8, 9) Kun siring, ano an boot sabihon para sa mga Kristiano kan paglaog sa kapahingaloan nin Dios? Itinagama ni Jehova an ikapitong aldaw—an aldaw nin saiyang kapahingaloan—tanganing lubos na maotob an katuyohan nia kun dapit sa daga. Kita makakalaog sa kapahingaloan ni Jehova—o makakaibanan nia sa saiyang kapahingaloan—paagi sa masinunod na paggibo kaoyon kan nagpapadagos na katuyohan nia na ihinahayag sa sato paagi sa saiyang organisasyon.
17 Sa ibong na lado, kun mas gusto niatong magin independiente paagi sa pagbaliwala sa hatol na basado sa Biblia na itinatao sa sato paagi sa grupong maimbod asin mapagmansay na oripon, kita minakontra sa ihinahayag na katuyohan nin Dios. Puede kaining isapeligro an matoninong na relasyon niato ki Jehova. Sa sunod na artikulo, pag-oolayan niato an pirang komun na situwasyon na puedeng makaapektar sa banwaan nin Dios asin kun paano maheheling sa satong mga desisyon—magsunod man o magin independiente—kun kita talagang nakalaog na sa kapahingaloan nin Dios.
Maghanap nin Espirituwal na Kayamanan
(Hebreo 4:12) Huli ta an tataramon nin Diyos buhay asin igwa nin puwersa asin mas matarom pa kisa sa ano man na espada na mag-inibong an tarom saka minalagbas sagkod sa mapagsiblag kaiyan an kalag asin an espiritu, saka an mga pagsukmulan asin an mga hutok nin tulang, asin kaya kaiyan na aramon an mga pangangatanusan saka an mga intensiyon kan puso.
Hapot Hali sa mga Parabasa
Ano “an tataramon nin Diyos” na sinasabi sa Hebreo 4:12 na “buhay asin igwa nin puwersa”?
▪ Ipinapahiling kan konteksto na an sinasabi digdi ni Pablo iyo an mensahe, o kapahayagan kan katuyuhan nin Diyos, arog kan mababasa ta sa Bibliya.
Parating kinokotar sa satong mga publikasyon an Hebreo 4:12 tanganing ipahiling na igwa nin puwersa an Bibliya na makapabago nin buhay, asin angay nanggad na aplikasyon iyan. Pero, makakatabang kun sasabuton an Hebreo 4:12 sa mahiwas na konteksto kaiyan. Sinasadol ni Pablo an mga Kristiyanong Hebreo na makikooperar sa mga katuyuhan nin Diyos. An dakul sa mga katuyuhan na iyan mahihiling sa banal na mga kasuratan. Ginamit ni Pablo bilang halimbawa an mga Israelita na ilinigtas sa Ehipto. Igwa sindang paglaom na makalaog sa ipinanugang daga na ‘nagbubulos nin gatas saka tangguli,’ na diyan makakamtan ninda an tunay na kapahingaluan.—Ex. 3:8; Deut. 12:9, 10.
Iyan an ihinayag na katuyuhan nin Diyos. Pero kan huri, pinatagas kan mga Israelita an puso ninda asin dai nagpahiling nin pagtubod, kaya an kadaklan sa sainda dai nakalaog sa kapahingaluan na iyan. (Bil. 14:30; Jos. 14:6-10) Pero, sinabi ni Pablo na yaon pa an “panuga mapadapit sa paglaog sa . . . kapahingaluan [nin Diyos].” (Heb. 3:16-19; 4:1, NW) Malinaw na kabtang kan ipinahayag na katuyuhan nin Diyos an ‘panugang’ iyan. Arog kan mga Kristiyanong Hebreo, nababasa ta an katuyuhan na iyan asin puwede kitang makikooperar diyan. May mga kinotar si Pablo sa Genesis 2:2 asin Salmo 95:11 para iduon na basado sa Kasuratan an panugang ini.
Iyo, dapat na mapahiro an satong buot huling “nagdadanay pa an panuga mapadapit sa paglaog sa . . . kapahingaluan [nin Diyos].” Nagtitiwala kita na talagang posible an basado sa Kasuratan na paglaom na makalaog sa kapahingaluan nin Diyos, asin may ginibo na kitang mga lakdang para makalaog diyan. Pero ginibo ta iyan bako paagi sa maigot na pagsunod sa Katugunan ni Moises o iba pang paagi para makamtan an pag-uyon ni Jehova. Kundi, paagi sa pagkaigwa ta nin pagtubod mantang maugma asin padagos kitang nakikikooperar sa ihinayag na katuyuhan nin Diyos. Pero, arog kan nasambit sa inutan, “an tataramon nin Diyos” na sinasabi sa Hebreo 4:12 puwede man na iaplikar sa Bibliya. Rinibong tawo sa bilog na kinaban an nag-aadal na nin Bibliya asin nanunudan an mga kapahayagan kan katuyuhan nin Diyos. Dakul sa sainda an napahirong baguhon an istilo nin pamumuhay, magpahiling nin pagtubod, asin magpabawtismo. An mga nagin epekto sa sainda malinaw na patotoo na “an tataramon nin Diyos buhay asin igwa nin puwersa.” Nagkaepekto na sa buhay ta an ipinahayag na katuyuhan nin Diyos na nasa Bibliya, asin padagos iyan na magkakaigwa nin puwersa sa satong buhay.
(Hebreo 6:17, 18) Sa paaging kaagid kaini, kan an Diyos magdesisyon na ipahiling nin mas malinaw sa mga tagapagmana kan panuga na an saiyang katuyuhan dai nuarin man mababago, ginarantiyahan niya iyan paagi sa sarong sumpa, 18 tanganing paagi sa duwang bagay na iyan na dai nuarin man mababago, na diyan imposibleng magputik an Diyos, kita na mga nagdurulag pasiring sa saiyang pailihan mapakusog nanggad na pangaptan nin higot an paglaom na ibinugtak sa atubangan niyato.
it-1 1139 ¶2
Paglaom
An paglaom na ini na buhay na daing katapusan asin daing kalapaan para sa “kabilang sa mga inapod pa-langit” (Heb 3:1) igwa nin masarig na basehan asin sarong bagay na talagang masasarigan. Sinusuportaran iyan nin duwang bagay na kun sain imposibleng magputik an Diyos, ini iyo an, saiyang panuga saka sinumpaan, asin an paglaom na yaon ki Cristo, na ngunyan saro nang imortal sa kalangitan. Kaya an paglaom na ini inaapod na “angkla kan kalag, sigurado asin marigon, asin dinadara kita kaiyan sa laog kan kurtina [kun paanong an halangkaw na saserdote naglalaog sa Kabanal-banali sa Aldaw nin Pagbayad sa Kasalan], na diyan may nainot nang naglaog alang-alang sa sato, si Jesus, na nagin sarong halangkaw na saserdote sagkod lamang sa paaging kapareho kan pagkasaserdote ni Melkizedek.”—Heb 6:17-20.
Pagbasa sa Bibliya
(Hebreo 5:1-14) An lambang halangkaw na saserdote na kinua hali sa mga tawo ninombrahan para magsagibo nin paglilingkod sa Diyos alang-alang sa mga tawo, tanganing makapagpresentar siya nin mga dulot asin atang para sa mga kasalan. 2 Nagigibo niyang trataron na may pagmalasakit an mga dai nakakaaram kan tama saka nasasala, huling siya man napapaatubang sa sadiri niyang mga kaluyahan, 3 asin dahil kaiyan kaipuhan niyang magpresentar nin mga dulot para sa sadiri niyang mga kasalan kun paanong ginigibo man niya iyan para sa mga kasalan kan mga tawo. 4 Bako an tawo an minapili kan sadiri niya para sa onorableng katungdan na ini, kundi inaako lang niya iyan pag ninombrahan siya nin Diyos, arog kan nangyari ki Aaron. 5 Kaagid kaiyan, dai pinamuraway kan Cristo an sadiri niya paagi sa paggibo sa saiyang sadiri na magin sarong halangkaw na saserdote, kundi pinamuraway siya kan Saro na nagsabi sa saiya: “Ika an sakuyang aki; sa aldaw na ini ako nagin saimong ama.” 6 Siring kan sinabi man kaini sa saro pang parte kan Kasuratan, “Ika sarong saserdote sagkod lamang sa paaging kapareho kan pagkasaserdote ni Melkizedek.” 7 Sa panahon kan buhay ni Cristo digdi sa daga, nagpahayag siya nin mga pagngayo-ngayo saka mga pakiulay, na may kaibang mga pag-agrangay saka mga luha, sa Saro na may kakayahan na magligtas sa saiya sa kagadanan, asin dinangog an saiyang mga pamibi huli kan saiyang pagkatakot sa Diyos. 8 Minsan ngani aki siya nin Diyos, nanudan niya an pagsunod paagi sa mga kasakitan na inagihan niya. 9 Asin pagkatapos na magin lubos siyang kuwalipikado, siya an nagin paagi para magkamit nin daing sagkod na kaligtasan idtong mga nagsusunod sa saiya, 10 huling pinili siya nin Diyos na magin sarong halangkaw na saserdote sa paaging kapareho kan pagkasaserdote ni Melkizedek. 11 Kadakul ming masasabi manungod sa saiya, alagad masakit iyan ipaliwanag, huli ta kamo nagin maluya sa saindong pagdangog. 12 Dapat kutana mga paratukdo na kamo ngunyan, pero garo kaipuhan pa giraray nindo nin saro na magtutukdo sa saindo puon sa kapinunan kan pundamental na mga bagay mapadapit sa sagradong mga kapahayagan nin Diyos, asin nagin siring giraray kamo sa mga nangangaipo nin gatas, bako nin matagas na kakanon. 13 Huli ta an siisay man na gatas an padagos na pig-iinom daing pakaaram sa matanos na tataramon nin Diyos, huli ta siya sarong sadit na aki. 14 Alagad an matagas na kakanon para sa mga tawong makusog na sa pagtubod, sa mga tawong paagi sa paggamit kan saindang isip sinanay iyan na mamidbid an kalainan kan tama asin kan sala.