Kun Paano Ka Puwedeng Mabuhay sa Bagong Kinaban

Ipinapahiling sa sinundan na mga artikulo na madali nang tapuson nin Diyos an maraot na sosyedad na ini nin mga tawo kaiba na an gabos na problema kaiyan. Makakasigurado kita na mangyayari ini. Taano? Huling an Tataramon nin Diyos, an Bibliya, nangangako:

“An kinaban mapapara.”—1 JUAN 2:17.

Makakasigurado kita na may mga makakaligtas huli ta ipinangako man kan tekstong iyan:

“An saro na naggigibo kan kabutan nin Diyos magdadanay sagkod lamang.”

Kaya para maligtas, kaipuhan tang gibuhon an kabutan nin Diyos. Pero para maaraman an kabutan nin Diyos, dapat ta nguna siyang mamidbid o mabisto.

‘MIDBIDON’ AN DIYOS PARA MAKALIGTAS SA KATAPUSAN

Collage: 1. Sarong nars sa ospital na nakatukro ta pagal-pagal na. 2. Nagmimirindal siya sa canteen asin narisa niya an katrabaho niya na maugmang nagbabasa nin sarong magasin. 3. An katrabaho niya na binabasa saiya an sarong teksto sa Bibliya saka tinawan siya nin sarong jw.org contact card.

Sinabi ni Jesus: “Ini nangangahulugan nin buhay na daing katapusan, an mamidbid ninda ika, an iyo sanang tunay na Diyos.” (Juan 17:3) Para makaligtas sa katapusan asin mabuhay sagkod pa man, kaipuhan tang “mamidbid” an Diyos. Bako lang iyan basta pagtubod na igwa nin Diyos o pag-aram nin pirang bagay manungod saiya. Kaipuhan na magin amigo ta siya. Para magin amigo tang marhay an sarong tawo, kaipuhan tang magtao nin panahon sa saiya. Arog man kaiyan sa pakikipag-amigo ta sa Diyos. Aramon ta an nagkapirang mahalagang katotoohan na nanudan ta sa Bibliya na makakatabang sa sato na magkaigwa saka mapagdanay ta an arog kaiyan na pakikipag-amigo sa Diyos.

Mga Katotoohan na Nanudan Ta sa Bibliya

Nanudan niyato na gusto nin Diyos na mabuhay kita sa Paraiso.

Linalang niya an inot na mga tawo, si Adan saka si Eva, tapos pinaistar sinda sa sarong magayunon na lugar na inaapod na hardin nin Eden. Perpekto sinda, tapos itinao nin Diyos an gabos na kaipuhan ninda para magin maugma sinda. Puwede kutana sindang mabuhay nin daing katapusan. Basta amigo sinda nin Diyos, dai sinda magagadan. Pero pinili nindang suwayon an sarong simpleng pagbuot nin Diyos sa sainda.

Nanudan ta kun taano ta nagsasakit kita ngunyan.

Kan sinuway kan inot na tawong si Adan an Diyos, naiwara niya an oportunidad niyang mabuhay nin daing katapusan pati kan bilog na katawuhan. Ipinapaliwanag kan Bibliya: “Paagi sa sarong tawo an kasalan luminaog sa kinaban asin an kagadanan luminaog paagi sa kasalan, asin sa siring an kagadanan luminakop sa gabos na tawo.” (Roma 5:12) Kun paanong puwedeng mamana nin aki sa mga magurang niya an sarong depekto, namana kan gabos na aki ni Adan an pagkabakong perpekto niya. Dahil kaiyan, naggugurang kita tapos nagagadan.

Nanudan ta kun ano na an ginibo nin Diyos para tabangan kita.

Sinasabi kan Bibliya: “An Diyos namuot na gayo sa kinaban kaya itinao niya an saiyang bugtong na Aki, tanganing an siisay man na nagtutubod sa saiya dai malaglag kundi magkaigwa nin buhay na daing katapusan.” (Juan 3:16) Isinugo nin Diyos si Jesus sa daga para itao an saiyang buhay alang-alang sa sato. May koneksiyon sa kapahayagan na iyan nin pagkamuot, ini an sinabi kan 86 anyos na Indian na si Prabhakar: “Ipinapahiling kaiyan an makusugon na pagkamuot ni Jehovaa para sa sako. Dahil sa pagkamuot niya, may paglaom ako na mabuhay nin daing katapusan.”

Nanudan ta kun paano ta maipapahiling an satong pagpapahalaga sa ginibo nin Diyos para sa sato.

Sinasabi sa Bibliya na maipapahiling ta an satong pagpapahalaga sa ginibo nin Diyos para sa sato paagi sa ‘pag-utob sa saiyang mga tugon.’ (1 Juan 2:3) Itinutukdo sa sato kan Diyos na Jehova kun paano kita magigin maugma ngunyan. (Isaias 48:17, 18, nota sa ibaba) Habo nin Diyos na magsakit kita. Nangangako siya na kun susunudon ta an mga instruksiyon niya, magigin maugma na kita ngunyan tapos magkakaigwa pa kita nin oportunidad na mabuhay nin daing katapusan.

AROALDAW NA BASAHON AN TATARAMON NIN DIYOS, AN BIBLIYA

An nars nakahiling sa langit pagkatapos magbasa nin Bibliya mantang nangungudto sa luwas. — Puwede kang makaligtas sa katapusan kan kinaban paagi sa paghagad nin tabang sa Diyos sa pamibi asin paggibo kan saiyang kabutan

Nagkakakan kita aroaldaw para mabuhay. Pero sinabi ni Jesus: “Dapat na bakong sa tinapay sana mabuhay an tawo, kundi sa lambang tataramon na minaluwas sa nguso ni Jehova.”—Mateo 4:4.

Sa ngunyan, mababasa ta an mga tataramon ni Jehova sa Bibliya. Kun pag-aadalan mo an sagradong librong iyan, maaaraman mo an mahahalagang katotoohan manungod sa mga ginibo nin Diyos kaidto, sa mga ginigibo niya ngunyan, saka sa mga gigibuhon niya sa maabot na panahon.

MAMIBI SA DIYOS PARA SA TABANG

Ano an puwede mong gibuhon kun gusto mong sunudon an Diyos, pero nasasakitan kang punduhon an mga bagay na sinasabi niyang sala? Pag arog kaiyan, talagang makakatabang sa saimo kun midbid mong marhay an Diyos.

Halimbawa kaiyan an sarong babayi na aapudon tang Sakura, na nagin imoral an pamumuhay. Kan mag-adal na siya nin Bibliya, naaraman niya an pagbuot nin Diyos na ‘dumulag sa seksuwal na imoralidad.’ (1 Corinto 6:18) Namibi si Sakura sa Diyos para tawanan siya nin kusog, kaya naipundo niya an maraot niyang pamumuhay. Pero may piglalabanan pa man giraray siyang mga sugot. “Pag may imoral na bagay na nagsabong sa isip ko,” an sabi niya, “sinasabi ko iyan gabos ki Jehova sa pamibi, ta aram ko na dai ko kayang labanan iyan kun ako sana. Nakatabang na marhay sa sakuya an pamibi na mas maparani ki Jehova.” Arog ni Sakura, minilyon ngunyan an namimidbid an Diyos. Tinatawan niya sinda kan kusog na kaipuhan ninda para gumibo nin mga pagbabago sa saindang buhay saka mamuhay na nakakapaugma saiya.—Filipos 4:13.

Pag mas namimidbid mo an Diyos, mas ‘namimidbid ka man kan Diyos’ bilang mahalagang marhay na amigo niya. (Galacia 4:9; Salmo 25:14) Huli kaiyan, makakaligtas ka pasiring sa bagong kinaban nin Diyos. Pero ano daw an magigin buhay sa bagong kinaban? Ipapaliwanag iyan sa sunod na artikulo.

a Jehova an pangaran nin Diyos uyon sa Bibliya.