Dapat Na Daw Akong Magpundo sa Pagmaneho?

Arog man daw kaiyan an sitwasyon mo? Kun iyo, ano an makakatabang sa saimo na maaraman kun baga dapat ka pang padagos na magmaneho?

Sa nagkapirang nasyon, an mga drayber na nakaabot na sa sarong partikular na edad asin gustong i-renew an saindang lisensiya dapat na magpaeksamin o magkua nin sertipikasyon hali sa sarong doktor. An mga Kristiyano sa mga nasyon na iyan nagsusunod sa ley asin sa desisyon kan mga awtorisado kan gobyerno. (Roma 13:1) Alagad sain ka man nakaistar, may mga paagi para maebalwar an kakayahan mo na makapagmaneho nin ligtas.

EBALWARON AN SAIMONG PAGMANEHO

Sigun sa website kan National Institute on Aging (NIA) sa Estados Unidos, puwede kang magpuon paagi sa paghapot sa sadiri kan minasunod na mga hapot:

• Nasasakitan daw akong basahon an mga karatula sa tinampo o makahiling pag banggi?

• Bako na daw gayong flexible an sakong hawak, na huli kaiyan nasasakitan na akong magkiling tanganing i-check an mga salming (side-view mirror, rear-view mirror, asin iba pa) saka an mga blind spot?

• Bako na daw gayong maliksi an reaksiyon ko, arog kan paglipat kan bitis ko hali sa silinyador pasiring sa preno?

• Maluwayon na daw akong magmaneho asin nakakaapektar na sa trapiko?

• Nagkapirang beses na daw akong dikit-dikitan na maaksidente, o may mga rukmi asin gasgas na daw an lunadan ko dahil sa pagtama sa mga bagay na naaagihan?

• Napara na daw ako nin pulis dahil sa pagmaneho ko?

• Napapikit na daw ako dahil sa tungka mantang nagmamaneho?

• May tinutumar daw akong ano man na bulong na puwedeng makaapekto sa sakuyang pagmaneho?

• Sinabihan na daw ako kan sakong mga kapamilya o mga amigo na nahahadit sinda manungod sa pagmaneho ko?

Kun iyo an simbag mo sa saro o duwa sa mga hapot na ini, tibaad puwede mong pag-isipan na gumibo nin mga pagbabago. Halimbawa, puwede mong bawasan an pagmaneho mo, lalo na sa banggi. Regular na ebalwaron an pagmaneho mo. Puwede mong haputon an sarong kapamilya o amigo kun ano an masasabi niya sa pagmaneho mo. Puwede mo man na pag-isipan na kumua nin safe-driving course. Minsan siring, kun iyo an simbag mo sa nagkapira sa mga hapot sa itaas, tibaad pinakamarahay kun magpundo ka na sa pagmaneho.a

MAGPAGIYA SA MGA PRINSIPYO SA BIBLIYA

Tibaad dai ta naririsa na nagluluya na palan an kakayahan ta sa pagmaneho. Asin an tema manungod sa kun baga dapat na kitang magpundo sa pagmaneho puwedeng magin sensitibong bagay na pag-ulayan. Kaya, anong mga prinsipyo sa Bibliya an makakatabang sa saimo na realistikong hilingon an sitwasyon mo asin makagibo nin madunong na desisyon? Pag-isipan an duwa.

Magin hababa an buot. (Tal. 11:2) Mantang nagkakaedad kita, nagluluya man an satong paghiling, pagdangog, mga kalamnan, asin an reaksiyon kan satong hawak. Halimbawa, an kadaklan na tawo nagpupundo na sa pagkawat nin partikular na mga sports mantang naggugurang na sinda huling narerealisar ninda na mantang mas nagkakaedad sinda, mas madali na man sindang maaksidente dahil maluya na an saindang hawak. Aplikado man sa pagmaneho an kaagid na prinsipyo. Pag nag-abot na sa sarong partikular na edad, tibaad mapakumbabang magdesisyon an sarong tawo na magpundo na sa pagmaneho alang-alang sa saiyang kaligtasan. (Tal. 22:3) Kun an sarong mapakumbabang tawo sinabihan kan iba na nahahadit sinda para sa saiya, andam siyang madangog sa sainda.​—Ikumparar an 2 Samuel 21:​15-17.

Likayan na magkasala sa dugo. (Deu. 22:8) An awto puwedeng magin peligrosong bagay kun dai iyan gagamiton sa ligtas na paagi. Kun an sarong tawo padagos na nagmamaneho dawa ngani nagluya na an kakayahan niya, puwede niyang maisapeligro an buhay niya saka kan iba. Asin kun magin dahilan siya nin aksidente asin may nagadan, puwede siyang magkasala sa dugo.

Kun nasasakitan ka sa pagdesisyon kun baga dapat ka nang magpundo sa pagmaneho, likayan na isipon na tibaad mabawasan na an dignidad o halaga mo bilang tawo. Namumutan ka ni Jehova huli sa magagayon mong kuwalidad, kaiba na an saimong kababaan nin buot, kapakumbabaan, asin pagmalasakit sa kapakanan kan iba. Asin nanunuga siya na tatabangan asin rarangahon ka niya. (Isa. 46:4) Nungka ka niyang papabayaan. Kaya hagadon sa saiya na tabangan kang gamiton an praktikal na kadunungan asin espirituwal na pakamansay mantang nagdedesisyon ka kun baga dapat ka nang magpundo sa pagmaneho.