‘Pagdanayon an Pagkasararo kan Espiritu’
DINAGKA ni apostol Pablo an mga Kristiyano sa Efeso na padagos ‘na pagpasensiyahan an lambang saro sa pagkamuot, na maigot na naghihinguwang mapagdanay an pagkasararo kan espiritu sa nakakapasararong bugkos nin katuninungan.’—Efe. 4:2, 3.
“An pagkasararo” na igwa kita resulta iyan “kan espiritu.” Sa ibang tataramon, resulta iyan kan aktibong puwersa nin Diyos. Pero arog kan sinambit ni Pablo, an satong pagkasararo kaipuhan na pagdanayon. Siisay an magibo kaiyan? An lambang Kristiyano. Dapat na gibuhon kan lambang saro sa sato an satong kabtang tanganing “mapagdanay an pagkasararo kan espiritu.”
Para iilustrar, sabihon ta ngayang may nagregalo saimo nin bagong awto. Kiisay na paninimbagan an pagmentenar kaiyan? Aram na niyato an simbag diyan. Dai mo man puwedeng basulon an nagregalo kun maraot an awto dahil dai mo iyan iningatan.
Sa kaagid na paagi, dawa ngani regalo hali sa Diyos an satong Kristiyanong pagkasararo, paninimbagan kan lambang saro sa sato na mentenaron o pagdanayon iyan. Kun mayo kitang matuninong na relasyon sa sarong tugang, kaipuhan tang haputon an satong sadiri, ‘Ginigibo ko daw an sakong kabtang para mapagdanay an pagkasararo kan espiritu paagi sa pagresolber sa samong dai pagkasinabutan?’
‘MAIGOT NA HINGUWAHON’ NA MAPAGDANAY AN PAGKASARARO
Arog kan isinurat ni Pablo, tibaad may mga pagkakataon na kaipuhan tang maigot na hinguwahon na pagdanayon an pagkasararo kan espiritu. Lalo nang totoo iyan kun nakulgan nin sarong tugang an satong buot. Para mapagdanay an katuninungan, kaipuhan daw na sa kada nangyayari an arog kaiyan dudulukon ta an nakakulog sa sato asin pag-uulayan an problema? Dai man. Haputon an sadiri, ‘Kun kukumprontaron ko an tugang manungod sa isyu, makakatabang daw iyan na mapagdanay an pagkasararo o mas magkakawsa nin argumento?’ Kun minsan an madunong na gibuhon iyo na palampason na sana iyan o magpatawad.—Tal. 19:11; Mar. 11:25.
Haputon an sadiri, ‘Kun kukumprontaron ko an tugang manungod sa isyu, makakatabang daw iyan na mapagdanay an pagkasararo o mas magkakawsa nin argumento?’
Arog kan isinurat ni apostol Pablo, lugod na padagos tang ‘pagpasensiyahan an lambang saro sa pagkamuot.’ (Efe. 4:2) Sinasabi sa sarong reperensiya na an fraseng iyan puwede man itradusir na “akuon sinda sa kun ano sinda.” Nangangahulugan iyan na aakuon tang nakakagibo man nin sala an satong mga kapagtubod, kun paanong kita iyo man. Siyempre, hinihinguwa tang isulot “an bagong personalidad.” (Efe. 4:23, 24) Alagad, mayo nin siisay man sa sato an perpektong makakagibo kaiyan. (Roma 3:23) Kun aakuon ta an katotoohan na iyan, magigin mas madali sa sato na pagpasensiyahan an lambang saro, magin mapagpatawad, asin sa siring “mapagdanay an pagkasararo kan espiritu.”
Pag pinapatawad asin linilingawan ta an salang mga nagigibo sato kan iba—dawa kun sa puso lang niyato iyan ginigibo—padagos tang maeeksperyensiyahan an “nakakapasararong bugkos nin katuninungan.” An Griegong termino na itrinadusir na “nakakapasararong bugkos” sa Efeso 4:3 itrinadusir na “mga litid” sa Colosas 2:19. An litid sarong matibay na grupo nin tissue na nagkokonektar sa mga tulang. Sa kaagid na paagi, an katuninungan pati man an pagkamuot sa mga tugang nakakatabang sa sato na magdanay na dayupot sa sainda dawa may mga pagkakataon na nagkakaigwa kita nin dai pagkasinabutan.
Kaya pag may kapagtubod na nakakulog kan saimong buot, nakakapauyam, o nakakairitar sa saimo, hinguwahon na magin mapagmalasakit, o mapagsabot, sa saiya imbes na kritikaron siya. (Col. 3:12) Huling gabos kita bakong perpekto, posibleng marhay na may nakulgan ka na man kaidto nin buot. Kun padagos mong isasaisip iyan, makakatabang iyan na magibo mo an saimong kabtang tanganing “mapagdanay an pagkasararo kan espiritu.”