Paglilingkod ki Jehova sa Ibong nin Masakit na Pagbuhay

Sa dakul na nasyon, nagigin masakit an pagbuhay kan mga tawo huli sa paglangkaw nin presyo kan mga bagay na piggagastusan ninda. Naeeksperyensiyahan man iyan kan mga Saksi ni Jehova. Pero dai sinda nahahadit na marhay huling tiwala sinda na ‘dai nuarin man papabayaan’ ni Jehova an saiyang mga lingkod. (Hebreo 13:5) Pirmi niyang inuutob an panuga na iyan. Nagin totoo iyan sa mga lingkod niya sa Pilipinas, na diyan dakul na tawo an nagtitios, lalo na kan dekada ’70 asin dekada ’80. Kan panahon na iyan, nagin mas masakit na marhay an kamugtakan kan nasyon.

“Minsan naghihibi ako ta kinukulang kami nin kakanon. May mga sitwasyon ngani na bagas, tubig, saka asin lang an igwa kami,” an sabi nin sarong sister na si Vickya. An brother na si Florencio dai kaidto makahanap nin trabaho. Sinabi niya: “Tulong bado saka tulong pantalon lang an pinagriribay-ribay ko sa pag-atender sa mga pagtiripon saka asembleya.” Paano nakayanan kan mga lingkod ni Jehova an masakit na sitwasyon na iyan? Ano an nakatabang sainda na magdanay na makusog sa espirituwal? Asin paano an saindang halimbawa makakatabang sa sato ngunyan kun biglang magbago an satong kamugtakan?

Nagtiwala Sinda ki Jehova

Nakakasiyerto an mga Saksi ni Jehova sa Pilipinas na aatamanon sinda ni Jehova sa masakit na panahon na idto. (Hebreo 13:6) Iyan nanggad an ginibo niya, asin sa parati, sa mga paaging dai ninda inaasahan. Halimbawa, inistorya kan sister na si Cecille: “Su sinapna ming bagas para sa pamahawan mi, iyo na an huring takad nin bagas na igwa kaming apat sa pamilya kan aldaw na idto. Kaya namibi kami na lugod itao samo an pangangaipo mi sa aldaw na idto. Kan namamahaw na kami, may nag-abot na brother na igwang darang limang kilong bagas. Napaluha kami dahil sa pasasalamat saka kaugmahan huli sa bendisyon na idto ni Jehova. Dakulon pa kaming eksperyensiyang arog kaiyan.”

Isinabuhay man kan mga lingkod nin Diyos an praktikal na kadunungan na mahihiling sa Bibliya. (Talinhaga 2:6, 7) Halimbawa, an sister na si Arcelita na bagong bawtisado pa sana asin dai pang agom kan panahon na idto, talagang nasakitan sa pagbuhay. Namibi siya ki Jehova asin sinabi niya an gabos niyang namamatian saka ikinakahadit. Dangan hinurop-hurop niya an Talinhaga 10:4, na an sabi: “An hugakon na mga kamot maresulta sa kadukhaan, pero an mahigos na mga kamot nagdadara nin kayamanan.” Gusto niyang sunudon iyan kaya nagdesisyon siyang maggibo nin hardin para magtanom nin mga gulay. Sinabi niya: “Talagang binendisyunan ni Jehova an paghihinguwa ko. Sa katunayan, diyan ko na kinukua an pangkonsumo kong kakanon saka an iba ipinapabakal ko para may pamasahe ako.”

Dai Ninda Pinabayaan an Pagtiripon

Masakit man para sa mga tugang na magbakal nin daga para tugdukan nin Kingdom Hall ta kulang an saindang pondo. Pero dai iyan nakapapundo sainda na sunudon an pagbuot na magtiripon asin pakusugon an lambang saro. (Hebreo 10:24, 25) Nakibagay sana sinda sa kamugtakan. Halimbawa, sinabi kan sister na si Deborah: “May ginibo kami kaidtong sadit na kubo kan kapartner kong payunir. Mga anom kaming nagtitiripon diyan. Nipa sana an atop kaiyan, asin an lanob gibo sa dahon nin niyog, saka an mga tukawan mi mga tinabas na kahoy nin niyog.”

Pero sa parati, sa mga harong nin tugang ginigibo an mga pagtiripon. Sabi kan sister na si Virginia: “Gibo sana sa gugon saka kawayan an sadit ming harong. Kada Sabado, pigririlipat mi su mga gamit mi para maghiwas ta gagamiton iyan sa pagtiripon sa sunod na aldaw.” Sa saro man na harong na ginagamit sa pagtiripon, nagtuturo pag nag-uuran. Sinabi kan brother na si Noel: “Pag nag-uuran, grabe an turo sa laog kan harong kaya naggagamit kami nin mga balde para ipangsalod. Pero, garo mayo lang idto samo ta kairibanan mi sa pagtiripon an samong mga tugang sa espirituwal.”

Napagdanay Ninda an Saindang Kaigutan sa Ministeryo

Kapos man sa materyal an mga Saksi, dai nagluya an saindang kaigutan sa ministeryo. Si Lindina, na nakaistar sa isla nin Negros, nagsabi: “Dahil dakulang pamilya kami tapos si Papa lang an nagtatrabaho, kulang talaga an kuwarta para sa pamasahe mi gabos. Kaya sa parati, naglalakaw sana kami pasiring sa teritoryo. Pero maugmahon idto ta iribanan kami. Aram mi man na napapaugma mi si Jehova.”

Dipisilon man na marhay kaidto na magpasiring sa hararayo saka mabukid na mga teritoryo para maghulit, dahil dikit lang an nagbibiyahe o mayo nganing transportasyon diyan. Si Esther, na nakaistar sa Luzon, nagsabi: “Maagahon kami kaidtong naghahali ta dakul na kilometro an kaipuhan ming baklayon, mga 6 sagkod 12 kaming iribanan sa grupo. Maghapon kami kaiyan na mahulit. May mga balon kaming pagkakan, tapos sa may puon nin kahoy kami nagkakarakan. May mga tugang kaming kaiba na mayong mga balon. Sabi mi sainda, ‘Dai kamo mahadit. Dakul man an dara ming kakanon.’”

Abundang binendisyunan ni Jehova an pagigin mapagsakripisyo kan mga tugang sa Pilipinas. Halimbawa kan 1970, an mga parahayag sa Pilipinas igwa nin 54,789. Pero pag-abot nin 1989, haros doble an ilinangkaw kaiyan na uminabot nin 102,487. Asin kan 2023, an bilang kan mga parabalangibog kan Kahadian sa Pilipinas uminabot na nin 253,876.

“Dawa Pobre Kami, Dai Iyan Nakaulang Samo na Mamutan si Jehova”

Sa ibong nin grabeng sakit sa pagbuhay, nagin maugma an mga Saksi saka sibot sa paglilingkod ki Jehova. “Dawa pobre kami, dai iyan nakaulang samo na mamutan si Jehova,” an sabi kan brother na si Antonio. Sinabi ni Sister Fe Abad: “Pag kami ni agom nasasakitan sa pagbuhay, mas nagsasarig kami ki Jehova kaya mas kontento kami sa pagkaigwa nin simpleng buhay. Dahil diyan, nanudan man kan mga aki mi na magtiwala sa saiya.”

“Bakong problema an pagigin pobre pag naglilingkod kita ki Jehova,” an sabi ni Lucila, na nakaistar sa Samar. Sinabi pa niya na “pag iniinot ta an Diyos, nagigin kontento saka nagdadanay kitang positibo. Sa katunayan, maugmahon ako ta nahiling ko na pinaglingkudan man kan mga tinutukduan ko si Jehova tapos nakaibanan ko sinda sa paglilingkod bilang mga payunir.”

Huling nabubuhay kita sa panahon na daing kasiguraduhan, isapuso niyato an sinabi kan elder na si Rodolfo: “Dawa naeksperyensiyahan ko an grabeng pagsakit kan dekada ’70 asin dekada nin ’80, namati ko an pagtabang ni Jehova. Dawa kinukulang nin kuwarta, dai ko lamang namati na kahirak-hirak ako. Inataman ako ni Jehova. Igwa ako ngunyan kan pinakamarahay na buhay, asin hinahalat-halat ko na an ‘tunay na buhay’ sa Paraiso.”—1 Timoteo 6:19.