Mapagkakasararo Daw Talaga kan Olympics an mga Tawo?—Ano an Sinasabi kan Bibliya?

Ngunyan na 2024 Summer Olympics, kinakarkulong limang bilyon katawo an mahiling sa mga atleta hali sa 206 na kadagaan na nagpapartisipar sa mga kawat. “Parte kita nin sarong okasyon na pinagkakasararo an kinaban sa katuninungan,” an sabi ni Thomas Bach, na presidente kan International Olympic Committee. “Ipag-ugma niyato an goal kan Olympics na an katawuhan mamuhay nin may katuninungan asin nin may pagkasararo sa ibong kan gabos na pagkakaiba-iba niyato.”

Maaabot daw kan Olympics an kahanga-hangang goal na iyan? May pag-asa pa daw na makamtan ta an tunay na katuninungan asin pagkasararo?

Makakatao daw iyan nin katuninungan asin pagkasararo?

Bako lang manungod sa sports an Olympics ngunyan na taon. Naiduduon sa mga kawat an nakakapabarangang mga isyu sa pulitika asin sosyedad. Kabali sa mga isyung ini an manungod sa mga deretso nin tawo, diskriminasyon huli sa lahi saka relihiyon, asin dai pagkapantay-pantay.

Nakakalibang an internasyonal na mga pakawat arog kan Olympics. Pero, ipinapahiling asin ipinapalakop man kan mga okasyon na ini an nakakapabarangang mga kaisipan, ugali, asin paggawi imbes na magtao nin nagdadanay na katuninungan asin pagkasararo.

Ihinula kan Bibliya an mga kaisipan asin ugali na nakakapadipisil na marhay sa ngunyan na magkaigwa kita nin pagkasararo. (2 Timoteo 3:1-5) Tanganing makanuod nin urog pa manungod sa hulang ini sa Bibliya, basahon an artikulong “Inihula Ba ng Bibliya na Magiging Ganito ang Ugali ng mga Tao sa Ngayon?”

Tunay na pag-asa na magkaigwa nin katuninungan asin pagkasararo sa kinaban

Nagtatao an Bibliya nin tunay na pag-asa na magkakaigwa nin katuninungan asin pagkasararo sa bilog na kinaban. Ipinapanuga kaiyan na an gabos na tawo sa daga magkakasararo sa irarom kan sarong langitnon na gobyerno na inaapod na “Kahadian nin Diyos.”—Lucas 4:43; Mateo 6:10.

An Hadi kan Kahadian na iyan, si Jesu-Cristo, matao nin katuninungan sa bilog na kinaban. Sinasabi kan Bibliya:

• “An matanos magigin marambong, asin an katuninungan magigin abunda.”—Salmo 72:7.

• “Ililigtas niya an dukha na naghahagad nin tabang . . . Sa pang-aapi asin sa kadahasan ililigtas niya sinda.”—Salmo 72:12, 14.

Dawa ngunyan, pinagkakasararo kan mga katukduan ni Jesus an minilyon na tawo sa 239 kadagaan. Bilang mga Kristiyano, nanudan kan mga Saksi ni Jehova sa manlain-lain na parte kan kinaban na magin mapagpatuninong. Para maaraman kun paano, basahon an isyu kan magasin na An Torrengbantayan na may titulong “Pagpundo sa Dai Matapos-tapos na Pagkaungis.”