Surat Hale sa Ina nin Aking Dai Namundag
AKO 37 anyos, may agom, may tolong magagayon na aki. Kaidtong desisais anyos na an nakaagi nasa ibabaw ako nin lamesa sa kusina mantang an buhay hinale sa sarong persona na mayo nin siisay man na makakamidbid.
An personang iyan nabuhay sana nin tolo may kabangang bulan. Seguro an solamenteng nagin katood kan personang iyan iyo si Jehova Dios. (Salmo 139:13-16) Garo baga mayo nin ibang gusto kaiyan.
Kaidto, 16 anyos na an nakaagi, kolehiyala ako, na nagtatrabaho nin por ora asin nagsosolo sa sarong dakulang siudad sa West Coast. May pangarap akong magin “may sinasabi” sa tahaw kan gabos na “magagayon na tawo.”
Darakula an plano ko para sa ngapit. Mayo nin lugar an aki sa estilo kan sakong buhay. An ama kan aki nagsuhestion na ipakua an aki, asin pareho kaming mayo nin sinabi manongod sa ibang magigibo mi. Dai ko inisip kun ano an aktuwal ming kinukua—an buhay nin sarong buhay na kalag. Ni minsan dai ko inisip kun ano an punto-de-vista nin Dios manongod dian.—Exodo 21:22, 23; Roma 14:12.
Siyempre, an pagpakua sa aki kaidto bakong “legal.” An ama kan aki may nabaretaan na doktor na dinudugangan an nakukua paagi sa pagkua nin aki.
Kaya yaon ako duman sa apartment kan kailusyon ko na pinababayaan an tawong ini na haleon an “kaolangan” na naglaog sa buhay ko. Dai ko inatubang an katunayan kan situwasyon asin huli kaiyan nakaya iyan kan sakong isip. Sa pisikal, bakong areglado an gabos. An nangyari nagkaigwa ako nin impeksion sa laog na huli kaiyan tolong aldaw akong nagdedeliryo sa kalintura. Pakatapos na makapagpabolong nin tama, naomayan na ako.
O iyan an paghona ko. Siisay an nakakaaram kun ano an epekto sa personalidad ko kan pagpatagas sa puso ko tanganing makomitir an grabeng krimen na idto?
Dai ko iinestorya an maraot na kabtang na ini kan sakong nakaagi sa sakong agom. (Dakol nang taon pakalihis kaiyan na kami nagkamidbidan.) Dai ko aram kun may pakinabang na sabihan sia. Kan makanood ako kan katotoohan (kaidtong labi nang sampulong taon an nakaagi) hinagad ko an kapatawadan ni Jehova para sa gabos na kasalan na ginibo ko, kaiba an pagkua sa buhay kan aki kong dai namundag. May pagsarig ako na itinao na Nia an Saiyang pagkaherak paagi sa atang ni Jesus tanganing matahoban an sakong mga kasalan. Mantang an buhay ko nalinigan na kan pag-aplikar kan nanodan ko hale sa Saiyang Tataramon na Biblia, dai ko ginigibong ugale an pagkakasala nin magabat. Pero tibaad noarin man dai ko mapatawad an sadiri ko.—1 Juan 1:7.
Kun ginadan ko an aki ko kan sia pirang bulan na an edad, 6 anyos na, 20 anyos na, minsan paano sia may paglaom sa pagkabuhay liwat sa bagong palakaw nin Dios. (Lucas 23:43; Kapahayagan 20:12, 13) Pero an omboy na ini noarin man dai namundag, noarin man dai nakahangos ni saro. Hinabon ko an buhay na iyan asin an ano man na posibilidad na an buhay na iyan mag-eksister giraray. Dai na mababawi an ginibo ko.
Mientras na naggugurang ako, mas parate akong riniribok kan bagay na ini. Sa nag-aging mga taon dai ko noarin man tinotogotan an sadiri ko na isipon iyan. Basta sumabong sa isip ko an bagay na iyan dai ko tinotogotan na pagparaisipon iyan. Sa isip ko “liniliwat ko tolos an tema.” Dai ko na iyan kayang gibohon. Talagang makologon sa boot na mabuhay na igwa kan dai nahahaleng kasalan na ini. An omboy na idto dai noarin man nagkaoportunidad na kamotan nin siisay man. Seguro igwa nin minsan sarong omboy na magkakaoportunidad.
Iyan an dahelan na isinurat ko ini gabos na nasa irarom kan boot ko sa dakol na taon. Kun an saro na nag-iisip ipakua an aki makabasa sa surat na ini, tibaad magliwat an isip nia asin pabayaan na magpadagos an buhay na iyan. Pabayaan na an aking iyan magkaoportunidad na mabuhay asin kamotan. Rinibo an gustong umampon nin aki. Apuwera kaiyan, sa huri, kun iyan tumama na sa saindong puso asin konsensia, dai kamo mapapaatubang sa bagay na ginadan nindo an sadiri nindong aki. Tibaad dai nindo mamatean an kasalan ngonyan; pero mamamatean nindo iyan pag-abot nin panahon. Asin dai iyan noarin man mahahale!—Isaias 1:18; 55:6, 7.
May odok na pagbasol,
An Ina kan Aking Dai Namundag