Malilikayan daw Nindo an Siwang sa Henerasyon?

NARIRIBOK an boot nin mga magurang sa bilog na kinaban kan sarong tendensia na naririsa ninda sa saindang mga aki. Mantang sinda nagdadakula parate na minarayo an boot ninda sa mga magurang. Nagkakaigwa nin siwang sa henerasyon na depisil​—asin sa ibang kaso imposible​—na mahale. Seguro naheling na nindo an problemang ini asin nahadit kamo dian.

Taano ta Nagkakaigwa nin Siwang?

Sierto na maoyon kamo na an mga magurang asin aki dai nag-oolay nin igo. Taano? An sarong komento kan gobyerno nin Hapon iyo na mantang an mga aki duwang oras na nagheheling nin telebisyon kada aldaw, 25 minutos sana sindang nakikipag-olay sa saindang ama asin 40 minutos sa saindang ina.

An saro pang dahelan iyo na sa dakol na pamilya, huli sa mga problema sa ekonomiya, an duwang magurang pareho kaipuhan na magtrabaho tanganing magkaigo an nakukua. Ini nangangahulogan nin mas kadikit na oras para sa saindang mga aki. Bilang resulta, an mga magurang asin aki puwedeng magin estranghero dawa kun magkairiba sa harong. Kun beses, dawa kun may ginigibong paghihingoa na magkomunikar, garo baga iyan nasasala nin direksion huli sa kakulangan nin pakasabot. Arog kan sabi nin sarong editoryal sa diaryo, an mga magurang parateng nagtatao sana nin mga pagboot, arog baga kan “Maghingoa ka sa pag-adal” o, “Areglara an ibabaw kan lamesa mo.” Pero, ini dai nakakapakosog sa saro ni nakahahale man sa siwang sa henerasyon.

Kun Paano Malilikayan an Siwang

Sa Canada an sarong tawo na dakol nang may problemang tin-edyer an nahatolan nagsasadol: “An pinakamarahay na bolong sa [masosopgon na mga tin-edyer] sarong magurang na yaon tanganing maghinanyog, maghinanyog, maghinanyog.” Minsan an Biblia nagsasadol na “magin listo kun dapit sa pagdangog, maluway kun dapit sa pagtaram, maluway kun dapit sa kaanggotan.” (Sant. 1:19) Parate na an magurang nasasala sa pagpapondo sa aki nia huli sa may pagkasumong, “Pondo!” o, “Naiistorbo mo ako!” Kun sa paghona kan aki permi siang aanggotan kada magtaram sia, luway-luway na mapondo siang dumolok sa saiyang mga magurang. Magkakaigwa na nin siwang sa henerasyon.

Sa ibong na kampi, tibaad puwedeng iplano asin gibohon an sarong proyekto bilang pamilya, arog baga kan pag-asikaso sa mga hihirahayon sa harong, pagdekorar sa kuwarto, pagpintura sa sarong napabayaan na lugar, o pagmamasitas sa lagwerta. Dai kaipuhan na halaton sagkod na may dakulang proyekto. Parate na iyan puwedeng arog kasimple sa pagluto kaiba ni nanay o paghirahay sa raot na kasangkapan kaiba ni tatay. An importante iyo na an mga magurang asin aki magkaibanan. Ini man nagbubunga nin kamugtakan para sa pag-estoryahan. Pero mag-ingat na dai magin sobra kamapagtatsar sa trabaho kan aki nindo o maglaom nin dakula sa sainda.

Siyempre, an aki tibaad mas gustong makikawat sa mga amigo nia na kaedad nia, alagad digdi kaipuhan na magsakripisyo an aki tanganing malikayan an siwang sa henerasyon. An mga magurang man kaipuhan na magtao kan iba sa saindang panahon. Tibaad ini mangahulogan nin sakripisyo, pero iyan mas mahalaga ki sa ano man na materyal na bagay na ikakatao nin magurang sa saiyang aki.

Saen daw Makakakua nin Tabang?

Mantang sa enot na mga taon kan buhay nin aki haros mga magurang sana nia an nakakaibanan nia, segurado na habo nindong sayangon an mahahalagang taon na ini.

Minsan siring, tibaad iniisip nindo na dai nindo aram kun paano asin kun ano an itotokdo sa saindong mga aki. Dakol na magurang an nakadiskobre na an Biblia iyo an burabod kan pinakamarahay na katokdoan sa tawo. Ginagamit an Biblia, matatabangan nindo an saindong aki na magkultibar nin halangkaw na mga prinsipyo sa moral, kahigosan, pagpopogol sa sadiri, paggalang sa autoridad, asin dakol pang ibang marahay na kuwalidad. Ngonyan, an minilyon na magurang sa bilog na daga na nagkukuyog sa Biblia sa pagtotokdo sa saindang mga aki nakarealisar sa katotoohan kan Talinhaga 22:​6, na nagsasabi: “Patoodon mo an aki oyon sa dalan para sa saiya; minsan kun sia maggurang dai sia masiko dian.”

Alagad paano matotokdoan nin mga magurang an saindang mga aki sa Biblia? Mantang sadit pa an mga aki, pasil na magkaibanan na magbasa, arog baga sa Biblia. An panahon na ginamit sa paaging ini magigin kapakipakinabang nanggad, ta an mga aki parate na minapoon na mag-estorya, sa siring nakukultibar an pagsarig asin pagkompiar sa lambang saro.

An mga aki naoogma sa mga estorya. An Biblia pano kaini. An marahayon na publikasyon na makatatabang sa mga magurang asin aki na makanood sa Biblia iyo an My Book of Bible Stories, na ipinublikar kan Watchtower Bible and Tract Society of New York, Inc. May dakol na darakula, de kolor na mga ilustrasyon, an librong ini nagsasaysay sa kronolohikong pagkasunodsunod kan mayor na mga pangyayari na nasusurat sa Biblia.

An saro pang marahay na pantabang sa pag-adal na iwinawaras kan mga Saksi ni Jehova iyo an librong Paghinanyog sa Dakulang Paratokdo. Iyan may 46 na haralipot na kapitulo na ginibo tanganing basahon sa saradit na aki, na nagtotokdo sa mga aki nin mahahalagang prinsipyo na matabang sainda sa buhay. Uya an pira sana sa mga kapitulo: “Iniingatan Ka kan Pagkuyog,” “An Duwang Tawo na Dai Nagsabi kan Katotoohan,” asin “Orog na Kaogmahan sa Pagtao.” An pakipag-olay sa saindong mga aki kan materyales na ini matabang sa saindo, saka sa saindong mga aki, na orog na masabotan an mga katokdoan kan Biblia.

Tibaad tin-edyer na an saindong mga aki. Kun iyo, an librong Your Youth​—Getting the Best out of It puwedeng magin makangangalas na pantabang sa saindo bilang magurang na may ipakipag-olay sa saindong mga tin-​edyer. An librong ini realistikong nagpapaliwanag kan mga problema nin tin-edyer. Helinga an mga kapitulong ini: “Growing Into Manhood,” “Moving Into Womanhood,” “What Kind of Friends Do You Want?” asin “What Do You Want out of Life?”

Dai niamo sinasabi na an pagbasa sana sa mga librong iyan iyo an bilog na solusyon. Pero iyan kapinonan sa tamang direksion. An mga magurang makaseseguro na marahay an saindang paghihingoa. (Efeso 6:4) An resulta mas sararong pamilya na may maogmang paglaom para sa mga magurang asin aki. An mga Saksi ni Jehova maoogmang tumabang sa saindo sa pagpopoon nin siring na programa sa saindong harong.​—Juan 17:3.