Ihinahapot nin mga Hobenes . . .

Paano daw Ako Magigin Katood nin Dios?

“AN IBANG hobenes nagsasamba sa Dios huli ta ginigibo iyan nin ibang nasa palibot ninda,” an komento nin sarong estudyante sa Nigeria na si Yemisi. Idinugang nia: “Pero dai sia ninda midbid o ibinibilang na persona.” Kaya si Yemisi nagtutubod na huling sala an saindang bilog na punto-de-vista sa bagay, an mga tawo parateng nasusudya na magin katood nin Dios.

Baga man kamo minaoyon sa saiya o dai, an dakol na hobenes duda sa posibilidad na magkaigwa nin relasyon sa Dios—nangorogna an pagigin katood nia. An iba nawaran nin interes huli sa mga relihiyon na ginigibo an Dios na garo baga harayo asin daing malasakit. An iba man naghingoa na makarani sa Dios paagi sa mga droga, transcendental meditation, o okulto—asin nasudya man.

Alagad salang isipon na an Dios harayoon sa sato kaya mayo nin paagi na makadolok sa saiya. Total, siisay an nagtao sa mga gamgam kan saindang maogmang mga awit asin sa mga kahoy asin burak kan saindang magagayon na kolor? Siisay an naggibo sa magagayon na kababan, sa darakulang mga bukid, sa mamuraway na liwanag kan aldaw, asin sa saindong makangangalas na hawak asin isip? Siisay an ginikanan kan dakol na mararahay na abilidad nin tawo? Bako daw na an satong Kaglalang?

Kun siring, tunay na ini nagpapaheling na sia interesadong gayo sa sato. Kun siring garo daw rasonable na irarayo nia an saiyang sadiri sato, gigibohon an saiyang sadiri na dai madolokan? Al kontraryo, sinisierto sato kan Biblia na “sia bakong harayo sa lambang saro sa sato” asin inaagda kita na maghingoang magin katood nia.—Gibo 17:27.

Alagad paano nindo iyan magigibo? Asin paano kamo makikinabang sa pagigin katood nin Dios?

An Hinahagad nin Dios

An Kaglalang dati nang may koneksion sa gabos huli sa pagtao “sa gabos nin buhay asin hinangos.” (Gibo 17:25) Minsan siring, an pagigin katood nin Dios mas haraning relasyon kisa pagigin sanang linalang nin Dios. An kaipuhan sa pagkaigwa nin siring karahay na relasyon iyo an paggibo kan tamang pagdolok. An paliwanag kan Biblia: “An minadolok sa Dios kaipuhan na magtubod na sia iyo nanggad asin na sia iyo an parabalos sa mga maigot na naghahanap sa saiya.”—Hebreo 11:6.

An ‘maigot na paghanap’ sa Dios may kaibang pagmidbid sa saiya bilang Persona. Paano nindo magigibo iyan? May marahay na lohika, sinasabi pa kan Biblia na “an maaaraman manongod sa Dios nahahayag . . . An saiyang dai naheheling na mga kuwalidad . . . namamansayan paagi sa mga bagay na ginibo, minsan an saiyang daing sagkod na kapangyarihan asin pagka-Dios.” (Roma 1:19-28) An mga ginibo nin Dios—an hararayong bitoon, an naghahagubuhob na dagat, an alibangbang, an sadit na dahon—gabos nagpapaheling asin nagtatao nin ideya sa saiyang dakulaon na kapangyarihan, sa saiyang kadonongan, sa saiyang pagkamoot. Kaya an paghorophorop sa saiyang mga linalang sarong paagi na matabang saindo na maapresyar an saiyang pagigin Makangangalas na Persona.

Minsan siring, kaipuhan na labi pa an maaraman nindo manongod sa Dios kisa ihinahayag sana kan mga linalang. Sa dahelan na ini itinao nia an saiyang nasusurat na Tataramon, an Biblia. Sa malinaw na pagtaram ipinamimidbid kan librong ini an saiyang ngaran, si Jehova, asin an dakol na kabtang kan saiyang ekselenteng personalidad. (Exodo 3:15; 34:6, 7) Sa pag-apresyar kaini, an tugang ni Yemisi na si Kunle nagsasabi: “An Biblia nagin makosog na impluwensia sa sakong buhay. Paorog nang paorog, mantang binabasa ko iyan, naaaraman ko na an Dios may katuyohan para sa mga tawo asin nagtatao nin giya sa sato tangani kitang makapamuhay nin biyong kaoyon sa saiyang kabotan.”

Maheheling man nindo na an pagbasa sana sa Biblia nakaoogma nang eksperyensia. An maingat na pag-adal dian mas kapakipakinabang pa, arog kan nadiskobre ni Kunle. An Tataramon nin Dios nagsasabi: “Kun akoon mo an sakong mga kasabihan asin pahalagahan mo an sakong mga pagboot, . . . masasabotan mo an pagkatakot ki Jehova, asin makukua mo an mismong kaaraman dapit sa Dios.”—Talinhaga 2:1, 5.

Mantang an mga kasabihan na ini ni Jehova yaon sa Biblia, magigin kapakipakinabang para sa saindo na tawan nin oras an pagbasa kaiyan. Dai kamo panluyahan nin boot sa kadakulaan kaiyan. An totoo iyan kompuwesto nin 66 na saradit na libro na pano nin kawiliwiling mga kasaysayan, biograpiya, hula, doktrina, asin hatol manongod sa relasyon sa kapwa tawo asin sa Dios. Paagi sa pagbasa sa laog nin pira sanang minuto aroaldaw, kamo makakokotkot sa kayamanan kaiyan na kaaraman na irarani kamo sa saindong Kaglalang.

An Paagi nin Dios sa Pakikikatood

Alagad, an pag-adal sana manongod sa Dios bakong igo. Kaipuhan na aprobetsaran man nindo an paagi nin Dios sa pakikikatood sa saiya. Si Jesu-Cristo nagpapaliwanag: “Ako iyo an dalan asin an katotoohan patin an buhay. Mayo nin makaduduman sa Ama kun bakong huli sa sako . . . Kun an siisay man namomoot sa sako, ootobon nia an sakong tataramon, asin an sakong Ama mamomoot sa saiya.” (Juan 14:6, 23) Mantang si Jesus “an katotoohan,” an kaaraman sa katotoohan manongod sa Dios asin sa saiyang mga kahagadan makakamtan paagi sa pag-adal sa mga katokdoan ni Jesus. (Juan 1:8; 17:26) Dugang pa, maingat na pag-adalan an buhay ni Jesus, ta ini nagtatao nin buhay na demonstrasyon kun paano makapaoogma sa Dios asin magigin katood Nia.

Alagad, si Jesu-Cristo iyo man “an buhay.” An Biblia nagsasabi: “Si Cristo, mantang kita mga maluya pa, nagadan para sa maraot na mga tawo . . . Ipinamimidbid nin Dios an saiyang pagkamoot sa sato sa paagi na, mantang kita mga parakasala pa, si Cristo nagadan para sa sato . . . [asin] ngonyan na kita nakapakipag-uli na, kita makaliligtas paagi sa saiyang buhay.” (Roma 5:6-10) Kun mayo si Cristo, dai puwedeng makikatood sa Dios, huli ta kita namundag na mga parakasala. Minsan siring, an dugo ni Jesus, na pinabolos bilang atang, “naglilinig sato sa gabos na kasalan” asin ‘ipinakikipag-uli’ kita, ibinabalik kita sa pakikikatood, sa Dios. Ini man nagbubukas para sa sato kan paglaom sa buhay na daing katapusan! (1 Juan 1:7; Juan 17:3) An pagtubod ki Jesu-Cristo bilang “an buhay” kun siring kaipuhan sa satong pagkakamit kan pakikikatood sa Dios.

Siertohon an Pakikikatood nin Dios

An Dios, paagi ki Jesus, guminibo na kan inisyatiba sa pakikikatood sa saindo. Alagad ano an maninigong magin reaksion nindo? Mantang kamo orog na nakakanood manongod sa saiya asin nagtatalubo an pag-apresyar sa saiyang karahayan, maninigo kamong mapahiro na kamotan sia asin magmawot na maglingkod sa saiya. Maninigo kamong mawili sa pagsabi sa iba manongod sa saindong langitnon na Katood.—Roma 10:10.

Alagad girumdoma: Puwedeng itokdo sa saindo nin iba an paaging magin katood nin Dios, pero kamo mismo an kaipuhan na humiro! Dai kamo pinipirit ni Jehova. Minimidbid nia kamo bilang indibiduwal asin boot nia na kamo dumolok sa saiya nin boluntad. Arog kan sabi nin sarong daragita na an ngaran Omolara: “Pinasasalamatan ko an sakong mga magurang sa pagtabang sako na mamidbid si Jehova; pero nasa sako an pag-aram kun baga talagang gusto kong maglingkod sa Dios asin gumibo nin marahay o dai.”

Kaya gibohon an paghihingoa. Mantang namimidbid nindo an Dios, togotan na an saindong buhay mamolde kan Tataramon nin Dios imbes na kan kinaban. Pag-abot nin panahon kamo makakukultibar nin “bagong pagkatawo na linalang oyon sa kabotan nin Dios.” Ini nangangahulogan na an tendensia kan saindong isip magigin na ngonyan na kaoyon kan kaisipan nin Dios asin mapahiro saindo na humiro nin mas oyon sa saiyang matanos na mga pamantayan.—Efeso 4:20-24; Colosas 3:10; 1 Juan 2:3, 4.

Ini gabos tibaad sa primero garo baga depisil. Minsan siring, an saro sa mga pakinabang sa pakamidbid ki Jehova asin pagigin midbid nia iyo na kamo puwedeng dumolok sa saiya sa pamibi asin namitan an saiyang tabang asin paggiya sa saindong buhay. Arog kan sabi ni Omolara: “Aram niato na, sa mga panahon nin kamondoan o kun may magagabat na desisyon na kaipuhan kitang gibohon, an Dios yaon tanganing tumabang sa sato. Permi siang andam na tumabang sa sato.” (1 Juan 5:14, 15) An dugang pang tabang makukua sa haraning pakikiasosyar sa mga dati nang katood ni Jehova. Sabi nin nagkapirang hobenes na mga Saksi ni Jehova:

“Nadiskobre ko na an haraning pakikiasosyar sa iba na namomoot ki Jehova nakatatabang sako na magdanay na harani sa saiya.”—Omolara.

“An mga pagtiripon sa kongregasyon nakatabang sako na masabotan an Biblia asin kun paano mamumuhay kaoyon sa mga dalan ni Jehova.”—Kunle.

“An pakikiasosyar sa ibang Saksi asin pakikikabtang sa mga pagtiripon nakatabang sako na mapagdanay an marahay na relasyon ki Jehova.”—Ifeyabo.

Kamo man puwedeng magkaigwa kan kaogmahan na nakakamtan kan mga ini asin kan dakol pang ibang hobenes. Iyo, ‘mag-ogma sa Dios paagi sa satong Kagurangnan na si Jesu-Cristo, na huli sa saiya kita ngonyan nag-ako na kan pakipag-uli.’ (Roma 5:8-11) Aakoon nindo an balos na itinatao nin Dios sa gabos niang katood—buhay na daing katapusan.—Juan 3:16.

[Ritrato sa pahina 26]

An pag-adal sa Biblia magtatao saindo nin haraning kaaraman manongod ki Jehova